Logo und Banner  

Lexicon Istoric Retic (LIR)

Lemma
Chavazzin  

A
 B  C  D  E  F  G  H I  J  K  L  M  N  O  P  Q  R  S  T  U  V  W  X  Y  Z

stampa
lemma precedents Regi, JoosReichenberg, von lemma sequent

Rehanau
R. fa part da la fracz. da La Punt/Rehanau (vischn. da Tumein). Signuradi e chastè a la confluenza dals Rains Anteriur e Posteriur. Il num R. sa referescha a la claustra cun il medem num al Lai da Constanza ch'aveva acquistà dretgs feudals a R. en il temp medieval tempriv. En il temp medieval furmava R. cun Tumein e Trin il signuradi da Crap Sogn Barcazi, il center dal qual era il chastè cun il medem num. Fin il 1428 era il signuradi en possess dals conts von Werdenberg-Heiligenberg, alura dals signurs von Hewen. Il 1568 ha Johann von Planta-Wildenberg acquistà il chastè ch'è passà il 1583 a Rudolf von Schauenstein. Suenter che Trin aveva cumprà ora ils dretgs feudals è R. daventà il 1616 la sedia dal signuradi empitschnì, numnà ussa signuradi da R. Edifizis signurils èn prob. vegnids erigids pir cun il transferiment da la sedia signurila a l'entsch. dal 17. tsch. Suenter l'extincziun dals signurs von Schauenstein è R. passà als Buol-Schauenstein. Enturn il 1755 ha Johann Anton Buol von Schauenstein laschà ampliftgar ils edifizis d'abitar e d'economia. Il 1792 ha Johann Rudolf Buol von Schauenstein vendì il signuradi ad in consorzi da las fam. Bavier, Vieli e Tscharner.

Il 1793 ha Johann Baptista von Tscharner transferì ses Seminari filantropin da Gianin al chastè da R. (Filantropins). Ils scolasts Johann Peter Nesemann e Johann Heinrich Zschokke han procurà per in grond renum a la scola ch'ha existì fin il 1798. Era Louis-Philippe I, il posteriur retg da la Frantscha, ha instruì temporarmain sut il num da Monsieur Chabos al chastè da R. Il 1803 ha la Mediaziun abolì ils dretgs feudals. Il 1820 è il chastè puspè passà a la fam. von Planta ch'ha conferì a quel l'aspect odiern cun sias turettas sin ina culmaina triangulara. Oz appartegna il chastè da R. ad ina cuminanza d'ertavels da la fam. von Tscharner. El vala sco il sulet cumplex signuril da la regiun construì en il stil classicistic che cumpiglia era in spazi exteriur cun in curtin ed edifizis d'economia. Menziun spez. meritan la sala da mangiar dals onns 1820 en l'edifizi principal ed ina saletta en l'ala dal curtin cun paraids ornadas cun ina fina stuccatura dal Rococo. 


Litteratura:
K.A. Bieler, Die Herrschaft Rhäzüns und das Schloss Reichenau, 1916; Kdm GR 4, 23-26; P.E. Müller, Reichenau, en: Graubündens Schlösser und Paläste, 1. part, 1969, 40-57; F. Jörimann, Die Rheinübergänge in Reichenau und Umgebung, en: BM, 1996, 371-428.

Linus Bühler

lemma precedents Regi, JoosReichenberg, von lemma sequent

pagina precedenta


© HLS: Tuts dretgs d’autur da questa publicaziun electronica èn tar
il Historisches Lexikon der Schweiz, Berna. Per tut ils texts publitgads a moda
electronica valan las medemas reglas sco per la publicaziun stampada.





Redacziun LIS, Gerberngasse 39, Chaum postal 322, 3000 Berna 13, tel. +41 31 313 13 30, e-mail: