e-LIR / Lexicon
Assistenza e-LIR
Contact
Publicaziun
Sponsurs
|
Lexicon Istoric Retic (LIR)
A B C D E F G H I J K L M N O P Q R S T U V W X Y Z
Lags
Vischnanca polit., cirq. Glion, distr. Surselva (avant il 2001 Glogn). La vischnanca è situada sin ina pitschna terrassa cun dus lais sur l'Ual da Mulin sin la spunda nord da la Val dal Rain Anteriur e cumpiglia las fracz. da Salums, Cons, Uletsch, Staderas e Murschetg. 1290/98 Lages, tud. Laax (uffiz.). 1850 277 abit.; 1900 280; 1950 328; 1970 480; 2000 1'150. Craps-scalutta megalitics a Crap Fraissen attesteschan ina preschientscha umana da l'epoca preistorica. In veritabel abitadi era dentant sa constituì pir en il temp autmedieval tras runcadas effectuadas da purs libers da lingua rum. sin pastgira communabla da Sagogn. Da derivanza pli veglia che L. eran ils edifizis a Lavanuz, menz. l'onn 765, cun champs cultivads e prads sauads.
Enturn il 1300 furmava L., cun la fortezza da Cuolm Liung ed il lieu da fiera Marcau, in center dal signuradi da L. e da la communitad dals Libers da sur il guaud da Flem. I n'è dentant betg enconuschent, sche tut ils abitants da L. han appartegnì a questa communitad. Sin plaun ecclesiastic ha L. fatg part fin il 1525 da la pravenda da Sagogn, dapi il 1309 sco chaplania autonoma. Ils patruns-baselgia s. Otmar e s. Gagl cumprovan l'origin tardiv da l'abitadi. Enturn il 1500 èn vegnidas construidas trais chapluttas: quella da s. Giachen a la via veglia per Sagogn, quella da s. Bistgaun a la via veglia per Glion e quella da s. Clau a la via per Flem. Il process da separaziun da la vischnanca da L., da las alps e dad auters bains alpesters da la cuminanza economica cun Sagogn, inizià en il 15. tsch., è vegnì concludì pir en il 19. tschientaner. Ina versiun tud. dals statuts com. datescha dal 1645, in'autra en lingua rum. dal 19. tschientaner. Tr. il 1654 ed il 1732 han gì lieu plirs process da strias. Las fam. dominantas a L. en il 16.-19. tsch. èn stadas ils Jochbergs, Montaltas, Corays e Toggenburgs residents en chasas patrizianas, p.ex. la Casa Liunga (1609). En il 19. tsch. èn vegnids fundads div. manaschis artisanals: in mulin ed ina resgia a l'Ual da Mulin, ina cuntscharia e duas tenscharias a la riva dal Lag Grond (ina pressa da taila è conservada en il Museum retic a Cuira), ina fravgia en vischnanca sco era chavas e furns da chaltschina (caltgeras, menz. il 1550) en ils conturns.
Il svilup da L. ad in lieu da cura climatic ha cumenzà a la fin dal 19. tsch. cun l'avertura da l'emprim hotel, il Seehof (1880, cun stabiliment da bogn) e d'in edifizi per colonias da vacanzas. Il grond boom turistic ha inizià en ils onns 1960-70: las telefericas dal Crap S. Gion (oz Weisse Arena Bergbahnen AG) èn vegnidas amplifitgadas successivamain e las muntognas da Nagiens e dal glatscher dal Vorab avertas sco territoris da skis (da stad). Ultra a quai han ins promovì in'activitad intensiva en il sectur da construcziun (hotels, chasas d'appartaments, parahotellaria) ch'ha schendrà entirs quartiers da vacanzas a Cons, Marcau, Uletsch e Murschetg. Quest svilup ha effectuà in ferm chal dal sectur primar (il 2000 existivan mo anc sis manaschis purils a L.), in augment excessiv dals pretschs da terren ed immissiuns considerablas tras il traffic motorisà. Il 2005 lavuravan radund 86% da la populaziun cun activitad da gudogn a L. en il sectur terziar. La Fundaziun Pro Laax, constituida il 1974, promova la creaziun artistica, las tradiziuns, il sport e surtut era il rumantsch. Meglieraziun generala concludida il 2000; dapi alura dispona L. era d'in museum local. Part da la populaziun da lingua rum.: 1941 91%; 1980 51% (LM); 2000 40,1%/56,2% (ML/Lindic).
Litteratura:
Laax, ina vischnaunca grischuna, red. dad A. Maissen, 1978.
Martin Bundi
© HLS: Tuts dretgs d’autur da questa publicaziun electronica èn tar
il Historisches Lexikon der Schweiz, Berna. Per tut ils texts publitgads a moda
electronica valan las medemas reglas sco per la publicaziun stampada.
| |
|
Redacziun LIS, Gerberngasse 39, Chaum postal 322, 3000 Berna 13, tel. +41 31 313 13 30, e-mail:
|
|
Lags