e-LIR / Lexicon Assistenza e-LIR Contact Publicaziun Sponsurs	Lexicon Istoric Retic (LIR) Lemma Rumantsch Deutsch Italiano Chavazzin   A  B  C  D  E  F  G  H I  J  K  L  M  N  O  P  Q  R  S  T  U  V  W  X  Y  Z  Maissen, Toya Malacrida, Elisäus  Maister da Vuorz † ca. 1350. Da la derivanza dal pictur, chau d'in lavuratori da pictura d'art, na san ins nagut. El vegn perquai numnà tenor in da ses capodovras a Vuorz. Tenor la perscrutaziun pli nova deriva il M. da la regiun dal Lai da Constanza, particularitads da sia tecnica da malegiar renvieschan dentant ad influenzas dal sid che pudessan però era esser vegnidas intermediadas en il Grischun sur tradiziuns dad ateliers dal temp romanic tardiv. Ses temas preferids eran la Passiun ed ils Dudesch Apostels. Ses lavuratori ambulant ha stgaffì en l'emprima mesadad dal 14. tsch. ina gruppa da frescos unica al nord da las Alps, dals quals en sa mantegnids en il Grischun 15 picturas sacralas - tr.a. a Vuorz (ca. 1330) e S. Gieri/Razén (ca. 1350), Cuira (baptisteri da la catedrala, ca. 1330), S. Martin, Glion, Pitasch, Lon, S. Martin/Ziràn (s. Cristoffel), Casti, Dusch/Pasqual (chaplutta), Clugén, Lüen, S. Paul/Razén (segund quart dal 14. tsch.), Claustra, Curvalda (claustra) - sco era scenas davart epopeas d'eroxs medievals (chastè da Brandis a Maiavilla, emprim terz dal 14. tsch.). Las picturas èn per part vegnidas surmalegiadas u cuvridas, suenter l'introducziun da la cretta ref., cun chaltschina e restauradas en il 20. tsch., tr.a. quellas a Vuorz e Lüen. Litteratura: A. Raimann, Gotische Wandmalereien in Graubünden, 1983 (1985²); J. Michler, Gotische Wandmalerei am Bodensee, 1992. Marc Antoni Nay  Maissen, Toya Malacrida, Elisäus  © HLS: Tuts dretgs d’autur da questa publicaziun electronica èn tar il Historisches Lexikon der Schweiz, Berna. Per tut ils texts publitgads a moda electronica valan las medemas reglas sco per la publicaziun stampada. Redacziun LIS, Gerberngasse 39, Chaum postal 322, 3000 Berna 13, tel. +41 31 313 13 30, e-mail: