Logo und Banner  

Lexicon Istoric Retic (LIR)

Lemma
Chavazzin  

A
 B  C  D  E  F  G  H I  J  K  L  M  N  O  P  Q  R  S  T  U  V  W  X  Y  Z

stampa
lemma precedents Menn, BarthélemyMenn, Johann Gaudenz lemma sequent

Menn, Christian
* 3-3-1927 a Meiringen/BE, ref., da Ziràn-Reschen, burgais d'onur da Cuira (2004). Figl da Simon, inschigner da construcziun, e da Marie n. Schneider. ∞ 1) 1958 Eleonora n. Rutz († 1993), figlia da Karl, da Nesslau/SG, 2) 1994 Hedwig n. Kägi, figlia dad Erwin, da Basilea. Scola chant. a Cuira, studi d'inschigner da construcziun a la SPF da Turitg 1946-50 (insch.dipl.). Praticums en biros d'inschigneria ed interpresas da construcziun, assistent a la SPF da Turitg. Dr.sc.tecn. 1956. Agen biro a Cuira 1957-71 ed in ulteriur a Turitg (cun Hans Hugi) a partir dal 1964. Prof. da statica e da construcziun a la SPF da Turitg 1971-92. Pres. da la cumissiun per la norma 162 (construcziuns en betun) da la Societad svizra dals inschigners ed architects (SIA) 1976-91. Dapi l'emeritaziun è el activ sco expert era a l'exteriur. Cun ses projects - tr.a. la punt sur il Rain a Tumein (1962), la punt dal Ganter a la ruta dal Simplon (1980), la punt dal Sunniberg a Claustra-Serneus (1998 ) e la Leonard P. Zakim Bunker Hill Bridge a Boston (1998, averta 2005) -, sias expertisas e ses giudicats exprimids en il rom da concurrenzas ha M. influenzà decisivamain la construcziun da punts. Sin basa da sias atgnas experientschas, accentuescha el la necessitad da cumbinar la creaziun artistica e la valitaziun scientifica per stgaffir ovras d'inschigneria reussidas. Sa referind a Robert Maillart, s'engascha el per furmas che respectan la distribuziun da las forzas e che s'integreschan e moda armoniusa en la cuntrada u en l'ambient urban. M. ha obtegnì numerusas onurificaziuns, tr.a. quella da comm. d'onur da la SIA 1989, la Medaglia Freyssinet 1990, il Premi grischun da cultura 1991 ed il dr.h.c. da pliras universitads.


Ovras:
Stahlbetonbrücken, 1986 (2003³, ens. cun E. Brühwiler); Zustandsermittlung und Instandsetzung von Betonbrücken, 2000.

Litteratura:
D.P. Billington, The Tower and the Bridge, 1983; Christian M., edì da T. Vogel, P. Marti, 1997 (cun reg. d'ovras; 2009²); T.E. Peters, Der entwerfende Schweizer Ingenieur, en: BM, 2004, 227-45.

Bruno Meyer

lemma precedents Menn, BarthélemyMenn, Johann Gaudenz lemma sequent

pagina precedenta


© HLS: Tuts dretgs d’autur da questa publicaziun electronica èn tar
il Historisches Lexikon der Schweiz, Berna. Per tut ils texts publitgads a moda
electronica valan las medemas reglas sco per la publicaziun stampada.





Redaktion HLS, Hirschengraben 11, Postfach, 3001 Bern, tel. +41 31 313 13 30, E-mail: :