Logo und Banner  

Lexicon Istoric Retic (LIR)

Lemma
Chavazzin  

A
 B  C  D  E  F  G  H I  J  K  L  M  N  O  P  Q  R  S  T  U  V  W  X  Y  Z

stampa
lemma precedents CampocolognoCamuns lemma sequent

Campodolcino
Vischnanca tal. en la Val Son Giachen, prov. da Sunder, situada a 1071 m al sid dal Pass dal Spleia en vischinanza dal cunfin cun il Grischun. Lieu principal da la val. 1881 1'961 abit.; 1961 1'737; 2004 1'078. C. consista da plirs vitgs ed aclauns che furman oz per part in'unitad: las culegnas da Prestone, Portarezza, Pietra, Tini e Corti en la val principala, la vischnanca da Fraciscio en la Val da la Rabbiosa, ils aclauns da Starleggia e Splughetta (u Porpiano) en la Val di Starleggia e Vho en la part meridiunala da la val. A C. sa chattava prob. il Tarvesede rom., in lieu da susta a la via dal Spleia che serviva da staziun finala per chars e charrotschas e dal qual manavan trais vias al nord: ina lung il Liro ad Isola ed al Cardinel, in'autra a Pianazzo e Teggiate ed ina terza sur Fontana a Madesimo (Pass da Niemet) ed Andossi/Stuetta. Al nord da la baselgia parochiala maina ina marcanta punt artgada (prob. dal 16. tsch.), numnada Ponte romano, sur la Rabbiosa. En il 15. tsch. ha C. remplazzà Son Giachen sco center politic da la val. Ils 21-5-1428 han ils Libers da la Muntogna da Schons suttascrit a Portarezza in contract da pasch cun la glieud da la Val Son Giachen. Las assambleas da la vallada e dals terzals vegnivan convocadas dapi il 16. tsch. a Corti en vischinanza da la baselgia parochiala da S. Gion Battista. Causa sia impurtanza per il traffic da transit giudevan C. e l'entira val ina gronda autonomia administrativa ed han perquai vulì restar tar il Grischun il 1797. Il 1818-20 è vegnida construida, cun sustegn da l'Austria, la via charrabla tr. C. e Pianazzo/Teggiate; ils cranzs e las galarias imposantas da quest tschancun da via (architect: Carlo Donegani) servan per part anc oz al traffic d'autos.


Litteratura:
D. Benetti, M. Guidetti, Storia di Valtellina e Valchiavenna, 1990; Il Commune unico di val San Giacomo, edì da G. Scaramellini, 2007.

Martin Bundi

lemma precedents CampocolognoCamuns lemma sequent

pagina precedenta


© HLS: Tuts dretgs d’autur da questa publicaziun electronica èn tar
il Historisches Lexikon der Schweiz, Berna. Per tut ils texts publitgads a moda
electronica valan las medemas reglas sco per la publicaziun stampada.





Redaktion HLS, Hirschengraben 11, Postfach, 3001 Bern, tel. +41 31 313 13 30, E-mail: :