e-LIR / Lexicon Assistenza e-LIR Contact Publicaziun Sponsurs	Lexicon Istoric Retic (LIR) Lemma Rumantsch Deutsch Italiano Chavazzin   A  B  C  D  E  F  G  H I  J  K  L  M  N  O  P  Q  R  S  T  U  V  W  X  Y  Z  Montfort, Heinrich von Montfort, von  Montfort, Rudolf von (Feldkirch) * ca. 1275, † 27/28-3-1334 ad Arbon/TG, □ a Constanza. Figl dal cont Rudolf II e dad Agnes, figlia dal cont Hartmann von Württemberg-Grieningen. Nev da Wilhelm e da Friedrich. Canoni da Cuira 1301. Studis a Bologna 1303. Il 1310 ha el obtegnì la regenza dal signuradi da Feldkirch, ens. cun ses frar Ulrich II. Prevost dal chapitel catedral 1307-22, vicari general e substitut da l'uvestg da Cuira 1310-20 ed (il pli tard a partir dal 1316) uffizial. Elegì uvestg da Cuira il 1322, alura administratur da la diocesa fin il 1325 ed uvestg da Constanza 1322-34. Il 1322/23 ha el subì ina sconfitta militara da Donat de Vaz, l'inimi principal da l'uvestgieu da Cuira. El è sa stentà da sanar las finanzas da la diocesa da Constanza. En la dispita per il tron, decidida tr. Friedrich il Bel e Ludwig il Bajuvar, ed en ils conflicts tr. l'imperatur ed il papa è M. sa mess da la vart dals Habsburgs ed ha publitgà ils process dal papa ch'ha excommunitgà Ludwig. Il 1327 ha la citad da Constanza prendì partida per Ludwig ed è vegnida qua tras en conflict cun l'agen uvestg. Per rinforzar la posiziun da M., ha il papa Johannes XXII affidà a M. il 1330 l'administraziun da l'abazia da S. Gagl (fin il 1333). La cunvegna da Ludwig (fatg en il fratemp imperatur tras represchentants da la citad da Roma) cun la Chasa Habsburg-Austria (1330) ha mess el però en ina situaziun delicata. Per betg perder sia diocesa stueva el s'unir cun l'imp. Ludwig, s'exponend uschia a l'excommunicaziun papala. Las regaglias al èn vegnidas concedidas prob. pir il 1333. El è mort excommunitgà, ha dentant survegnì posteriuramain, sut l'uv. Heinrich von Brandis, ina sepultura ecclesiastica a Constanza. Litteratura: HS I/2, 291-97; Gatz, Bischöfe 1198, 292 s.; BBKL 23, 1215-21; NDB 22, 175 s.; A. Bihrer, Der Konstanzer Bischofshof im 14. Jahrhundert, 2005. Veronika Feller-Vest  Montfort, Heinrich von Montfort, von  © HLS: Tuts dretgs d’autur da questa publicaziun electronica èn tar il Historisches Lexikon der Schweiz, Berna. Per tut ils texts publitgads a moda electronica valan las medemas reglas sco per la publicaziun stampada. Redacziun LIS, Gerberngasse 39, Chaum postal 322, 3000 Berna 13, tel. +41 31 313 13 30, e-mail: