Logo und Banner  

Lexicon Istoric Retic (LIR)

Lemma
Chavazzin  

A
 B  C  D  E  F  G  H I  J  K  L  M  N  O  P  Q  R  S  T  U  V  W  X  Y  Z

stampa
lemma precedents Mer da PatnalMercenaris lemma sequent

Meraun
Citad e lieu da cura en il district tal. dal Burggrafenamt (Tirol dal Sid), situada betg lunsch davent da la sbuccada dal Passer en l'Adisch; tal. Merano, tud. Meran (omaduas furmas uffiz.). 2000 34 236 abitants. En vischinanza da M. sa chattan il vitg da Tirol e ses chastè. Qua residiavan en il temp medieval ils conts dal Tirol. En il 13. e 14. tsch. era M. in lieu da martgà fitg frequentà, nua ch'era nobels da la Currezia faschevan savens lur affars. Il 1239 ha Schwicker von Reichenberg vendì qua il chastè da Tarasp ed ulteriur possess en l'Engiadina al cont Albert von Tirol. Ils uvestgs da Cuira Sigfrid (1299 e 1310) e Johann (1328) han concedì perduns e consecrà baselgias a M. Ils conts de Werdenberg-Sargans possedevan en la citad veglia da M. ina chasa en feud. Durant la Guerra svabaisa, suenter la sconfitta dals Tirolais en la Guerra da la Chalavaina e l'invasiun da rapina dals Grischuns en il Vnuost la fin da matg 1499, è M. entrà en conflict cun las Trais Lias. A quell'occasiun èn vegnids mazzads 36 ostagis grischuns. M. è daventà in lieu da refugi per ils Grischuns proscrits u entretschads en relaziuns da tensiun cun las autoritads. Enturn il 1578 èn sa trategnids qua l'uvestg da Cuira Beatus a Porta e ses frar Caspar, chapitani sin la Fürstenburg. Enturn il 1618 è il chavalier Rudolf von Planta, in aderent da l'Austria, fugì a M. ed ha acquistà la residenza nobla da Rametz ed il 1625 il chastè da Greifen che sa numna anc oz chastè da Planta e che stat sut la protecziun da monuments. Il 1799 è l'uvestg da Cuira, Karl Rudolf Buol, fugì a M. per scappar da l'invasiun franzosa. El ha dirigì da là davent durant otg onns l'uvestgieu da Cuira, per il qual ses chaplon Gottfried Purtscher da Danuder aveva creà in seminari da spirituals. A partir dal fan. 1800 ha M. era dà refugi als comm. da la Regenza interimala ("austriaca") dal Grischun. Cura ch'il Tirol è vegnì cedì a la Baviera tras il contract da pasch da Pressburg il 1805, è l'uvestg vegnì bandischà da M. e spedì a Cuira.
Enturn il 1890 ha in comité d'iniziativa sut la direcziun da l'anteriur cusseglier dals chantuns Florian Gengel preschentà ses plans per la construcziun d'ina viafier a binari normal da Cuira via l'Alvra ed il Pass dal Fuorn a M.; il project n'è dentant mai vegnì realisà. En il 20. tsch. èn sa sviluppads M. e ses conturn ad ina destinaziun turistica preferida da blers Svizzers pervia dal clima miaivel ed il vin da Kalterer.


Funtaunas:
Urkunden zur Schweizer Geschichte aus Oesterreichischen Archiven 1, edì da R. Thommen, 1899; BUB 1-3.

Litteratura:
H. Schmid, Meran, Residenz des Bischofs von Chur, en: BM, 1953, 120-25.

Martin Bundi

lemma precedents Mer da PatnalMercenaris lemma sequent

pagina precedenta


© HLS: Tuts dretgs d’autur da questa publicaziun electronica èn tar
il Historisches Lexikon der Schweiz, Berna. Per tut ils texts publitgads a moda
electronica valan las medemas reglas sco per la publicaziun stampada.





Redacziun LIS, Gerberngasse 39, Chaum postal 322, 3000 Berna 13, tel. +41 31 313 13 30, e-mail: