e-LIR / Lexicon Assistenza e-LIR Contact Publicaziun Sponsurs	Lexicon Istoric Retic (LIR) Lemma Rumantsch Deutsch Italiano Chavazzin   A  B  C  D  E  F  G  H I  J  K  L  M  N  O  P  Q  R  S  T  U  V  W  X  Y  Z  Murmarera Museum d'art dal Grischun   Müsch Chastè e vischnanca en la provinza tal. da Com, situads da la vart dretga al nord dal Lai da Com, tal. Musso. Lieu da cunfin e fortezza durant il temp che las Trais Lias possedevan las Trais Plaivs. Il chastè da M. è stà dapi il 1406, sco feud milanais, en possess da la fam. Malacrida, enturn il 1500 è el passà al feldmarschal Gian Giacomo Trivulzio ch'aveva laschà renovar la fortezza e construir in port, rendend qua tras l'areal fortifitgà quasi inconquistabel. Trivulzio aveva era laschà installar qua cularias da fier ed ina monetaria. Dapi il 1523 avdava sin il chastè da M. il chastellan Gian Giacomo Medici (numnà il Medeghin u il Müsser) ch'aveva laschà construir sur il chastè en il grip in'ulteriura fortezza munida cun in foss insuperabel, chanuns ed indrizs da defensiun. Cun sia artigliaria controllava el il traffic en tut la part sura dal Lai da Com. Il 1525 ha el declerà la guerra als Grischuns, el è però vegnì battì a Murbegn da truppas grischunas e vuclinaisas; ma el occupava anc Clavenna. Ina delegaziun grischuna sut la direcziun da Gian Travers, ch'aveva negozià senza success per la pasch a Milaun, è vegnida fermada dal chastellan il sett. 1525 en vischinanza da M. e messa en fermanza (ostagis). La separaziun confessiunala da las Trais Lias e da la Confed. ha impedì ina sperta superaziun da la crisa. Pir la primavaira dal 1526 èsi reussì ad in'autra delegaziun dal Grischun, cun il sustegn da la Frantscha e da Vaniescha, da liberar ils praschuniers - cunter il pajament d'ina spendradira e la cessiun da las Trais Plaivs a Milaun - e da concluder ina pasch, cumbain intscherta. En realitad regnava anc adina il status d'in armistizi. Il mars 1531 è il chastellan entrà danovamain en Vuclina ed ha occupà Murbegn, nua ch'el ha procurà ina sconfitta dolurusa als Grischuns ch'han sin quai clamà en agid ils Confederads alliads (Segunda Guerra da Müsch). Friburg, Soloturn ed ils lieus ref. èn suandads il clom, entant che quels cat. da la Svizra Interna han fatg dependent lur sustegn dal return dals Grischuns a la cardientscha veglia. Ensemen cun las truppas fed. han ils Grischuns stgatschà il Medeghin da la Vuclina. Cun il contract da pasch dals 13-2-1532 ha il duca da Milaun renconuschì il possess grischun da la Vuclina, da Buorm e da Clavenna. Ils Grischuns han alura demolì la fortezza da M. Pli tard han ins explotà en la part sura da l'anteriur implant il crap da marmel ch'è vegnì elavurà a moda industriala ed exportà en il 19. e 20. tsch., p.ex. il 1850 per la renovaziun dal dom da Com. Litteratura: L. Carove, Il castello di Musso e le sue cave di marmo, [1914]; G. Travers, La chianzun dalla guerra dagl Chiaste da Müs, edì dad A. e B. Schorta-Gantenbein, en: Annalas, 56/1942, 7-60; F. Bertoliatti, La guerra di Musso e suoi riflessi sui baliaggi, 1948; J. Stüssi, Der Erste Müsserkrieg, en: BM, 1981, 155-76. Martin Bundi  Murmarera Museum d'art dal Grischun   © HLS: Tuts dretgs d’autur da questa publicaziun electronica èn tar il Historisches Lexikon der Schweiz, Berna. Per tut ils texts publitgads a moda electronica valan las medemas reglas sco per la publicaziun stampada. Redacziun LIS, Gerberngasse 39, Chaum postal 322, 3000 Berna 13, tel. +41 31 313 13 30, e-mail: