Logo und Banner  

Lexicon Istoric Retic (LIR)

Lemma
Chavazzin  

A
 B  C  D  E  F  G  H I  J  K  L  M  N  O  P  Q  R  S  T  U  V  W  X  Y  Z

stampa
lemma precedents CirquitClavadätsch lemma sequent

Claustra-Serneus
Vischnanca polit., suletta vischn. dal cirq. da Claustra, distr. Partenz/Tavau (avant il 2001 Landquart Sura), resortida il 1865 tras fusiun da las anteriuras vischn. da Serneus e da Claustra. Il 1973 ha midà Claustra il num en C., tud. Klosters-Serneus (uffiz.). La vischn. da C., situada entadim il Partenz, consista da las fracz. da Platz, Dorf, Selfranga, Äuja e Monbiel. L'abitadi oriundamain sparpaglià furma oz p.p. in'unitad. 1222 ecclesiam sancti Iacobi, 1436 zuo dem Closter. 1850 1'302 abit.; 1900 1'555; 1930 2'558; 1950 2'978; 2000 3'890.
Scuverta dal piz d'ina lantscha dal temp da bronz al Schlappiner Joch. L'abitadi da C. era naschì en il temp medieval tardiv parzialmain sin terren da runcada, el è dentant resortì o.t. da las curts e dals bains da la prepositura da S. Giachen. Insaquants bains avevan furmà aclauns cun pitschens manaschis, sco p.ex. Brüggen cun ses mulin claustral (1514) e sia fuschina al Mönchalpbach. A quels eran s'unids bains prob. da Gualsers immigrads da Tavau, situads per gronda part sin la spunda sanestra da la val. En la val alpina da Schlappin aveva existì, ultra dad in'alp, ina culegna permanenta da Gualsers fin viaden il 16. tschientaner.
La germanisaziun da C. è stada terminada a l'entsch. dal 16. tschientaner. La prepositura dals premonstratens da S. Giachen, fundada sco filiala da Curvalda tr. il 1208 ed il 1222, legada ed avugada prob. dals baruns de Vaz, aveva il domini feudal sur ils abitants da C. Il 1482 è vegnida incorporada la baselgia parochiala da S. Luregn a Saas en la prepositura da S. Giachen, schliada durant la refurmaziun il 1526. Il medem onn è il possess da la claustra vegnì secularisà e transfurmà en in bain-pravenda. En la part al sidost da la baselgia parochiala evang. (anteriura baselgia claustrala) han ins chattà fastizs prob. da la claustra. La tur da la baselgia datescha da l'entsch. dal 13. tsch., il chor dal 1493. La baselgia cat. è vegnida erigida il 1921-22 e reconstruida il 1963 (2000 ca. 2/3 prot., ca. 1/4 cat.). Il cumin da C. è sa furmà da l'uschen. Ammanngericht dal signur feudal (il barun de Vaz fin il 1337/38, alura ils conts de Toggenburg fin il 1436, ils de Montfort fin il 1466/70 e Habsburg-Austria dal 1477-1649). Il 1436 è il cumin da C. s'unì, ens. cun las ulteriuras dretgiras dal cont de Toggenburg (†), a la LDD. En consequenza d'ina dispita tr. ils Rumantschs ed ils Tudestgs per l'uffizi dal mastral, ha il suveran austr. puspè privà il 1489 la vischnanca da sias cumpetenzas electoralas. Il cussegl e la dretgira han consistì durant la Republica - ultra dal mastral - d'in collegi da 16 giurads cun in salter ed in scrivant. Fin il 1851 èn sa dividids il cumin e la dretgira auta da C. en in Inner- ed in Ausserschnitz: Innerschnitz correspundeva territorialmain a la vischnanca polit. odierna da C., Ausserschnitz cumpigliava Saas, Cunter, Cuvlignas e la vart sanestra da la Val da S. Antönia. La separaziun da la dretgira auta è sa manifestada en la nominaziun alternanta dal mastral ed en l'occupaziun dals uffizis administrativs per las Terras subditas grischunas. Il 1803 èn las duas parts vegnidas separadas definitivamain ina da l'autra. Innerschnitz è sa dividida en las corporaziuns da vischinadis che cumpigliavan las vischnancas dadens, d'amez e dadora e che organisavan o.t. la giudida d'alp. Ils maders nunutilisads vegnivan surlaschads a l'utilisaziun privata, exclus ils fulasters. Dal 15.-19. tsch. han ins era cultivà graun sper l'allevament da muvel (export en l'Italia dal Nord).
La dissoluziun da la prepositura da S. Giachen (1526) aveva provocà ina dispita giuridica cun Habsburg-Austria. Il 1621, suenter pliras regulaziuns contractualas stipuladas en il 16. tsch., ha alura l'invasiun da truppas austr. effectuà la restituziun da la claustra. A l'incendi dal 1621 e 1622 è suandada ina fomina il 1623. Il 1649 ha il cumin finalmain pudì sa liberar dals dretgs suverans austriacs. La segunda mesadad dal 17. tsch. è stada caracterisada d'ina obsessiun da strias cun 50 execuziuns ordinadas da la dretgira auta da C. Il 1770 ha ina bova a Monbiel provocà 19 morts e destruì div. edifizis. Da la fin dal 15. tsch. fin l'entsch. dal 20. tsch. han ins explotà en differents lieus temporarmain argent, plum e fier, ma senza success. Cun la construcziun da la via dal Partenz il 1861 è s'augmentà il traffic da martganzia e da persunas. Enturn il 1870 ha cumenzà a flurir il turissem a C.: gia il 1879 èn vegnids construids ils emprims hotels pli gronds (Silvretta, Vereina) en quest "lieu da cura climatic". L'avertura da la lingia da viafier Landquart-C. il 1889 ha effectuà in ulteriur augment dal traffic turistic e la fundaziun da la societad da cura (1890). Suenter l'emprima stagiun d'enviern (1904-05) è la vischnanca da C. s'etablida sco lieu da sport d'enviern. Da las recessiuns tr. las duas guerras e suenter la Segunda Guerra mundiala è ella sa revegnida svelt: il 1921 han ins construì in bogn avert stgaudabel, il 1950 las pendicularas dal Gotschna, il 1966 quellas da Madrisa. Il svilup immens da la parahotellaria en ils davos onns vegn reglà tras ina nova lescha da construcziun en cumbinaziun cun il plan da zonas dal 1973. Il 1999 è vegnì avert il tunnel dal Veraina da la VR (transport d'autos e da persunas), instradà il 1991.


Litteratura:
F. Hew, Geschichte meiner Heimat Klosters, 1945 (1965², cun il titel Klosterser Heimatbuch); H. Plattner, Klosters, 1968; F. Hitz, M. Kasper-Kuoni, Die Kirche St. Jakob in Klosters 1493-1993, 1993; Simmen, Wappen, 311-15.

Florian Hitz

lemma precedents CirquitClavadätsch lemma sequent

pagina precedenta


© HLS: Tuts dretgs d’autur da questa publicaziun electronica èn tar
il Historisches Lexikon der Schweiz, Berna. Per tut ils texts publitgads a moda
electronica valan las medemas reglas sco per la publicaziun stampada.





Redacziun LIS, Gerberngasse 39, Chaum postal 322, 3000 Berna 13, tel. +41 31 313 13 30, e-mail: