e-LIR / Lexicon
Assistenza e-LIR
Contact
Publicaziun
Sponsurs
|
Lexicon Istoric Retic (LIR)
A B C D E F G H I J K L M N O P Q R S T U V W X Y Z
![stampa](img/print.gif) Sigisbert * vers la fin dal 7. tsch., † l'entsch. dal 8. tschientaner. Tenor il num era S. probablamain in Francon ch'era sa domicilià sco eremit da tempra irofrancona en la cuntrada deserta dal stgalim superiur dal Rain Anteriur, numnada Desertina(s), e che vegniva sustegnì dal Ret Placidus. L'ipotesa, tenor la quala el derivava dal circul da s. Columban, n'è betg cumprovada. Per sia resistenza cunter las pretensiuns franconas en Rezia, è Placidus vegnì assassinà, entant che S. è vegnì schanegià, prob. per raschuns politicas. Il "martir" ed il "confessur" han chattà lur fossa en la cripta da la baselgia da S. Martin a Mustér, lur di commemorativ cuminaivel è ils 11 da fanadur. Il 1899/90 ha la Regenza stuì conceder a las scolas cat. da la Surselva - suenter protestas massivas (1898) ed in cumin extraordinari a Glion (1900) - il «S. en Rezia» da Maurus Carnot sco lectura per il stgalim bass enstagl dal «Robinson» e dals «Nibelungs» ch'èn vegnids refusads sco texts "pajauns". Quest'istorgia raquinta da la cristianisaziun ed urbarisaziun da la Rezia, surtut da la Surselva, tras il missiunari S. e ses dus gidanters indigens, il mattatsch Retus ed il mattet Columbin. Quest cudesch ha instruì e delectà trais generaziuns sursilvanas. Litteratura: I. Müller, Disentiser Klostergeschichte, 1942; R. Kaiser, Churrätien im frühen Mittelalter, 1998 (2008²); IG, 251-53.
Carl Pfaff
![pagina precedenta](img/enavos.gif)
© HLS: Tuts dretgs d’autur da questa publicaziun electronica èn tar il Historisches Lexikon der Schweiz, Berna. Per tut ils texts publitgads a moda electronica valan las medemas reglas sco per la publicaziun stampada.
| |
|
![](img/clear.gif)
Redacziun LIS, Gerberngasse 39, Chaum postal 322, 3000 Berna 13, tel. +41 31 313 13 30, e-mail:
|
|