Logo und Banner  

Lexicon Istoric Retic (LIR)

Lemma
Chavazzin  

A
 B  C  D  E  F  G  H I  J  K  L  M  N  O  P  Q  R  S  T  U  V  W  X  Y  Z

stampa
lemma precedents Ems ChemieEnderlin lemma sequent

En
Flum e district en il Grischun. L'En (tud. Inn, lat. Oenus, Enus) nascha al Piz Lunghin sur Malögia ed ha in intschess da 1'792 km². El traversa l'Engiadin'Ota e Bassa (Engiadina), passa a Finstermünz il cunfin austr. e sbucca suenter 517 km a Passau (Baviera) en il Danubi, dal qual el furma il flum lateral il pli impurtant. La flottaziun da laina en l'En ha giugà fin en la mesadad dal 19. tsch. ina rolla impurtanta surtut per l'export da laina da l'Engiadina a Puntina, en l'uschen. Salzpfanne dad Alla e per part fin a Rosenheim (Baviera), nua che la laina vegniva duvrada en l'industria da minieras. Ils peschs dals lais d'Engiadin'Ota e da l'En vegnivan vendids en l'Italia fin viaden il 19. tschientaner. L'En ha innundà adina puspè l'Engiadin'Ota, p.ex. il 1566 ed il 1951. A la fin dal 19. tsch. è el vegnì corregì tr. Samedan e Zuoz. Las Ovras electricas d'Engiadina SA disponivan a la fin dal 20. tsch. d'ina productivitad annuala media dad 1,3 mia. kw/h. Ils tschains d'aua èn ina funtauna d'entradas impurtanta per las 13 vischnancas concessiunaras da l'Engiadina. L'En tr. La Punt-Chamues-ch e Martina vegn era frequentà da canutists.

Il district d'En cumpiglia 13 vischnancas repartidas sin ils quatter cirquits da Sur Tasna, Suot Tasna, Ramosch e, dapi il 2001, da la Val Müstair. El dumbra 1'197 km² e quintava il 2007 9'411 abitants. Il rumantsch è qua anc la lingua maioritara. Il 1801-02 existiva en il chantun Rezia in district d'En che cumpigliava l'Engiadina Bassa e la Val Müstair.



Litteratura:
Der Inn, catalog d'expos. Rosenheim, 1988.

Paul Eugen Grimm

lemma precedents Ems ChemieEnderlin lemma sequent

pagina precedenta


© HLS: Tuts dretgs d’autur da questa publicaziun electronica èn tar
il Historisches Lexikon der Schweiz, Berna. Per tut ils texts publitgads a moda
electronica valan las medemas reglas sco per la publicaziun stampada.





Redacziun LIS, Gerberngasse 39, Chaum postal 322, 3000 Berna 13, tel. +41 31 313 13 30, e-mail: