Logo und Banner  

Lexicon Istoric Retic (LIR)

Lemma
Chavazzin  

A
 B  C  D  E  F  G  H I  J  K  L  M  N  O  P  Q  R  S  T  U  V  W  X  Y  Z

stampa
lemma precedents Rofler [Roffler], ValentinRohan, Henri de lemma sequent

Rogaziun federala
Ils dis da rogaziun pratitgads en il cristianissem èn sortids da la pratica dal  giudaissem. En periodas da miseria durant il temp medieval tardiv vegnivan celebradas festas da rogaziun en il rom da las Dietas confederalas. La tradiziun da la "Gronda rogaziun dals Confederads" è attestada per l'emprima giada il 1517. En temps da pestilenzas e chareschias durant il 16. tsch. decretavan las autoritads dals chantuns ref. dis da rogaziun emnils u mensils (Basilea 1541, Turitg 1571, Berna 1577) che vegnivan colliadas pli tard savens cun exercizis da giginar e cun collectas per concrettaivels basegnus (p.ex. ils Waldens 1655).
Il 1619 han ils chantuns ref. organisà in emprim di da rogaziun cuminaivel per engraziar per il success da la Sinoda salvada a Dordrecht (Ollanda). Il 1639 - durant la Guerra da trent'onns ch'ha influenzà fermamain las praticas da far penetienza en gen. - ha la Dieta evang. da la Confed. decidì d'introducir in di da rogaziun annual en renconuschientscha d'esser vegnids schanegiads fin qua da la guerra. Il 1643 han decidì era ils chantuns cat. da la Confed. da fixar devoziuns e dis da rogaziun. Il fan. dal 1796 ha la Dieta confed. conclus sin proposta da Berna ed en vista a la revoluziun imminenta da celebrar ils 8-9-1796 per l'emprima giada ina rogaziun naziunala. Il di da Rogaziun fed. ha survivì la Helvetica, la Mediaziun e la Restauraziun, era sch'ils cat. e ref. na celebravan betg el il medem di. Durant la Regeneraziun ha la Dieta dal 1-8-1832 fixà il di da Rogaziun fed., sin proposta da l'Argovia, per tut ils chantuns svizzers sin la terza dumengia da settember. Il Grischun percunter ha insistì fin il 1848 da commemorar quel la segunda gievgia da november. Ils chantuns resp. las autoritads supremas da la baselgia ref. e da las diocesas cat. han mantegnì era suenter la fundaziun da la Confed. il 1848 la cumpetenza da fixar il di da Rogaziun federala. En il dretg fed. s'orientescha sulettamain la lescha davart l'andament da las fatschentas, per quai che reguarda il cumenzament da la sessiun fed. d'atun, al di da Rogaziun federala. A l'entschatta relaschavan las regenzas chant. mandats da Rogaziun fed. che s'occupavan, d'in punct da vista religius, da dumondas actualas da tut gener. Gottfried Keller p.ex., a ses temp chancelier dal chantun da Turitg, ha redigì tals mandats tr. il 1863 ed il 1872. Ils uvestgs han decretà il 1886 in urden da festa impegnativ per tut la Svizra cat. ed han publitgà a questa chaschun ina brev pastorala. Dapi il Segund Concil vatican è la Rogaziun fed. in di da festa ecumenic.
Il di da Rogaziun fed. è scumandada la chatscha en il Grischun.


Litteratura:
R. Schaufelberger, Die Geschichte des Eidgenössischen Bettages mit besonderer Berücksichtigung der reformierten Kirche Zürichs, 1920; Theologische Realenzyklopädie 7, 1981, 492-96; P. Ochsenbein, «Das grosse Gebet der Eidgenossen», 1989.

Victor Conzemius

lemma precedents Rofler [Roffler], ValentinRohan, Henri de lemma sequent

pagina precedenta


© HLS: Tuts dretgs d’autur da questa publicaziun electronica èn tar
il Historisches Lexikon der Schweiz, Berna. Per tut ils texts publitgads a moda
electronica valan las medemas reglas sco per la publicaziun stampada.





Redacziun LIS, Gerberngasse 39, Chaum postal 322, 3000 Berna 13, tel. +41 31 313 13 30, e-mail: