Logo und Banner  

Lexicon Istoric Retic (LIR)

Lemma
Chavazzin  

A
 B  C  D  E  F  G  H I  J  K  L  M  N  O  P  Q  R  S  T  U  V  W  X  Y  Z

stampa
lemma precedents Scola auta da teologia CuiraScola da selviculturs lemma sequent

Scola da dunnas dal Grischun
Fundada il 1895 sut il num Bündnerische Koch- und Haushaltungsschule (pli tard Bündner Frauenschule). Il 1912 ha la Scola da dunnas dal Grischun integrà la Scola da lavur per dunnas Tivoli, fundada il 1888 da Sina Wassali (privat) en sias structuras organisatoricas. Ses origin ha d'engraziar la Scola da dunnas dal Grischun a l'ideal burgais dal 19. tsch.: la mamma che contribuescha, sco dunna da chasa en servetsch dals uffants e da l'um, al bainstar da la famiglia. En la Scola da dunnas dal Grischun savevan las futuras mammas servientas emprender quai ch'ellas duvravan per pudair ademplir lur rolla futura en la fam. e la societad. Il 1917 è la Scola da dunnas dal Grischun vegnida incumbensada da la Regenza d'instruir las magistras da lavurs a maun, ed il 1929-68 è ella daventada ina fundaziun dal Chantun, da la citad da Cuira e da la Societad d'utilitad publica dal Grischun. Alura ha surpiglià il Chantun la scola. Il 1934 ha installà la Scola da dunnas dal Grischun in post da cussegliaziun professiunala per mattatschas. Il 1947 è vegnì affilià il Seminari da mussadras da Claustra a la Scola da dunnas dal Grischun. Ina impurtanza economica directa ha la Scola da dunnas dal Grischun cuntanschì en ils onns da crisa economica tras la fundaziun dal Post central per lavur chasana ch'ha generà il 1939 l'Artisanat indigen grischun (tud. Bündner Heimatwerk). La paletta da l'instrucziun è sa schlargiada en il decurs dals decennis da la scolaziun professiunala fin a curs concentrads en las spartas las pli diversas: scolaziun da mussadras, furmaziun da magistras da lavurs a maun e da tegnairchasa, instrucziun da gidantras en il tegnairchasa, scola preparatorica per professiuns da tgira, da servetsch en chasa, da cusunzas, da cuschinunzas, per curs da taisser, ed auter pli. En ils onns 1970 èn sa scolads ils emprims giuvens a la Scola da dunnas dal Grischun. Il 1995/96 ha la Scola da dunnas dal Grischun instruì en nov partiziuns 328 scolaras e tschintg scolars. Dapi il 2003/04 è ella integrada en la Scola auta da pedagogia dal Grischun.



Litteratura:
E. Schmid, Zwei links – zwei rechts: 1895-1995: 100 Jahre Bündner Frauenschule, 1995; HbBG 3, 226 s.

Adolf Collenberg

lemma precedents Scola auta da teologia CuiraScola da selviculturs lemma sequent

pagina precedenta


© HLS: Tuts dretgs d’autur da questa publicaziun electronica èn tar
il Historisches Lexikon der Schweiz, Berna. Per tut ils texts publitgads a moda
electronica valan las medemas reglas sco per la publicaziun stampada.





Redaktion HLS, Hirschengraben 11, Postfach, 3001 Bern, tel. +41 31 313 13 30, E-mail: :