e-LIR / Lexicon Assistenza e-LIR Contact Publicaziun Sponsurs	Lexicon Istoric Retic (LIR) Lemma Rumantsch Deutsch Italiano Chavazzin   A  B  C  D  E  F  G  H I  J  K  L  M  N  O  P  Q  R  S  T  U  V  W  X  Y  Z  Bavier, Simeon Bavier, [von]  Bavier, Simeon [Simon] * 16-9-1825 a Cuira, † 27-1-1896 a Basilea, ref., da Cuira. Figl da Johann Baptista. ∞ Barbara n. von Salis-Seewis, figlia da Johann Jakob, bundsstatalter da la LDD. Studi d'inschigner da construcziun bassa a las scolas politecnicas da Karlsruhe e Stuttgart 1841-44, alura collavuraziun, sut Richard La Nicca, a la construcziun da las vias tras las Alps dal Grischun, p.ex. a la Via sursilvana ed a quella dal Bernina. Inschigner distr. a Spleia 1850-51. A partir dal 1853 è B. sa deditgà surtut a la construcziun da viafiers en Svizra ed a l'exteriur. Il 1861 ha el dirigì la construcziun da la filandaria da mangola Meiersboden a Cuira. Ses engaschament instancabel per la Viafier da las Alps Orientalas sa lascha declerar tras sia professiun e sia derivanza d'ina da las grondas fam. da spediturs grischunas. B. ha cumenzà sia carriera politica il 1853-54 sco landamma e comm. dal Cussegl grond (per il cirquit da Gianatsch). Dal 1863-78 è el stà cuss. naz. liberal. Il success da sia intermediaziun sco cumissari fed. a chaschun dals Scumbigls tessinais dal 1876-77 ha anc augmentà la reputaziun da B. che valeva gia sco capacitad sin il champ da viafiers. En l'Assamblea fed. è el stà in politicher lib. moderà, ma sceptic envers la revisiun da la Const. fed. (1872-74). Ses engaschament per ina subvenziun dal Gottard (1878) ha liberà el da la critica da promover unilateralmain la Viafier da las Alps Orientalas. Il dec. 1878 è B. vegnì elegì sco cuss. fed. cun ina gronda maioritad da las vuschs dal center lib. fin a la sanestra. Il 1879 ha el dirigì il Dep. da finanzas e da duanas, il 1880-81 quel da las postas e viafiers, nua ch'el è s'engaschà per tariffas pli cleras e per ina meglra surveglianza fed. da las 24 administraziuns da viafier. Il 1882 ha el dirigì, sco pres. da la Confed., il Dep. politic. Suenter sia demissiun per raschuns da sanadad il schan. 1883, è B. stà minister da la Svizra a Roma fin il 1895. Sias ragischs famigliaras e sia furmaziun han fatg dad el in expert da la politica da traffic, sias enconuschientschas dal mund e da las linguas in mediatur e diplomat. Sia influenza era plitost quella d'in spezialist che d'in um da partida. Suenter l'abandun dal project d'ina lingia da viafier en las Alps Orientalas, ha B. sustegnì a moda loiala quella dal Gottard ch'el ha inaugurà il matg 1882 sco pres. da la Confederaziun. Cun gronda luciditad aveva el vis che l'acceleraziun dal traffic da transit alpin purtava bain avantatgs als centers lontans, ma strusch a las regiuns da muntogna pertutgadas. Confundatur dal Museum retic. Archiv: ASGR, relasch fam. B. Ovras: Einige Bemerkungen über Eisenbahnen im Gebirge, 1874; Die Strassen der Schweiz, 1878; Lebenserinnerungen von Bundesrat Simon B. 1825-1896, 1925 (autobiogr.). Litteratura: G. Bener, Ehrentafel bündnerischer Ingenieure und Ingenieurwerke, 1927, 33-37; J. Simonett, Simeon B., en: Die Schweizer Bundesräte, edì dad U. Altermatt, 1991, 224-27. Jürg Simonett  Bavier, Simeon Bavier, [von]  © HLS: Tuts dretgs d’autur da questa publicaziun electronica èn tar il Historisches Lexikon der Schweiz, Berna. Per tut ils texts publitgads a moda electronica valan las medemas reglas sco per la publicaziun stampada. Redacziun LIS, Gerberngasse 39, Chaum postal 322, 3000 Berna 13, tel. +41 31 313 13 30, e-mail: