Logo und Banner  

Lexicon Istoric Retic (LIR)

Lemma
Chavazzin  

A
 B  C  D  E  F  G  H I  J  K  L  M  N  O  P  Q  R  S  T  U  V  W  X  Y  Z

stampa
lemma precedents RamoschRampa, Franz Konstantin lemma sequent

Ramosch, von
Famiglia nobla en servetsch dals uvestgs da Cuira, dals signurs de Tarasp, da la claustra da Mariamunt e dals conts dal Tirol. Ils R. possedevan en allodi il chastè dal medem num sco era agens bains e possess feudal en l'Engiadina Bassa ed en il Vnuost Superiur. Enturn il 1300 èn els s'acquistads tras ierta il chastè da Wiesberg en il Paznaun. Il connubi cun ils conts de Montfort, ils chastellans de Matsch ed autras schlattas noblas dal Vnuost sco era l'engaschament frequent sco perditgas u garants per ils suverans mussa lur posiziun sociala impurtanta. L'emprim exponent attestà da la fam. è Wetzel che cumpara il 1150 sco ministerial da l'uvestg da Cuira. Nannes (menz. il 1160-70) è stà servitur dals signurs de Tarasp ed ha administrà en feud la migiuria da la chadè da Cuira a R., da la quala l'imp. Heinrich VI aveva privà il 1195 ses frar Swiker (menz. il 1195-1228). En il 13. tsch. han ils R. tgirà relaziuns fitg stretgas cun il contadi dal Tirol. Ultra da Nannes (menz. il 1253-86) èn plirs represchentants da la fam. stads involvids en ina faida cunter ils chastellans de Matsch, en il decurs da la quala è vegnida sblundregiada il 1274 la claustra da Mariamunt e mess en fermanza il 1277 l'avat Konrad (1271-98) tras ses frar Friedrich (menz. il 1258-91). Il 1317 han dus frars partì il possess da la fam., Johann (menz. il 1292-1335) ha surpiglià il chastè da R., Nannes (menz. il 1303-46) quel da Wiesberg. La dispita tr. ils figls da Johann, Swiker (menz. il 1339-83) e Konrad (menz. il 1339-67), per il chastè da R. è vegnida accumadada il 1367 tras ils conts dal Tirol. Suenter che Swiker ha stilettà il 1367 ses frar ed è fugì, ha il Tirol resguardà il chastè sco bandunà ed ha cedì el als chastellans de Matsch. Cun ses unic figl Swiker (menz. il 1365-96), ch'ha vendì il 1369 il possess en l'Engiadina Bassa ed è sa domicilià a Laad, è la schlatta s'extinguida la fin dal 14. tschientaner.


Funtaunas:
BUB.

Litteratura:
F. Hammerl, Die Rechts- und Herrschaftsverhältnisse im Unterengadin, en: JHGG, 1922, 63–146 (manglus); Clavadetscher/Meyer, Burgenbuch, 210–14.

Anna-Maria Deplazes-Haefliger

lemma precedents RamoschRampa, Franz Konstantin lemma sequent

pagina precedenta


© HLS: Tuts dretgs d’autur da questa publicaziun electronica èn tar
il Historisches Lexikon der Schweiz, Berna. Per tut ils texts publitgads a moda
electronica valan las medemas reglas sco per la publicaziun stampada.





Redaktion HLS, Hirschengraben 11, Postfach, 3001 Bern, tel. +41 31 313 13 30, E-mail: :