e-LIR / Lexicon
Assistenza e-LIR
Contact
Publicaziun
Sponsurs
|
Lexicon Istoric Retic (LIR)
A B C D E F G H I J K L M N O P Q R S T U V W X Y Z
Club alpin svizzer (CAS)
Organisaziun da tetg dals alpinists svizzers, fundada ils 19-4-1863 sin iniziativa da Rudolf Theodor Simler (magister a la Scola chant. grischuna 1859 e pli tard prof. a l'Universitad da Berna) e tenor il model da l'Alpine Club englais. A la radunanza da fundaziun ad Olten/SO eran sa participads dal Grischun Johann Wilhelm Fortunat Coaz, Gottfried Ludwig Theobald, Paul Lorenz, Josef Schönecker, Robert von Salis ed Eduard Killias. Ils 5-1-1864 è vegnida fundada a Cuira la secziun Rätia (emprima secziun grischuna dal CAS), suandada da las secziuns Tavau (1886), Silvaplauna (1890), Bernina (1891), Engiadina Bassa (1892), Piz Terri (1898), Arosa (1916), Valragn (1920) e Bergiaglia (1927). Il 1980 ha la secziun Rätia fusiunà cun la secziun Cuira dal CAS da las dunnas, fundà il 1918.
Il CAS ha surtut en mira d'avrir e perscrutar scientificamain las Alps, da promover l'alpinissem, il viandar en las muntognas ed il sport da skis ed, en il Grischun, d'organisar il servetsch da guids da muntogna, edir guids da viandar e far turas, organisar l'agid d'urgenza e construir, mantegnair ed administrar las chamonas dal club. La chamona Silvretta, la pli veglia da las 30 chamonas dal CAS en il Grischun, è vegnida erigida il 1865. Il 2006/07 han las chamonas grischunas dumbrà total 71'315 pernottaziuns (Maighels 6'743; Seetal 278).
Litteratura:
100 Jahre Sektion Rätia SAC, 1963; Calanda: Festschrift 125 Jahre Sektion Rätia SAC, edì da P. Meinherz, 1988; Menschen am Piz Bernina, 1990.
Kurt Wanner
© HLS: Tuts dretgs d’autur da questa publicaziun electronica èn tar
il Historisches Lexikon der Schweiz, Berna. Per tut ils texts publitgads a moda
electronica valan las medemas reglas sco per la publicaziun stampada.
| |
|
Redacziun LIS, Gerberngasse 39, Chaum postal 322, 3000 Berna 13, tel. +41 31 313 13 30, e-mail:
|
|
Cloetta, Max