e-LIR / Lexicon Assistenza e-LIR Contact Publicaziun Sponsurs	Lexicon Istoric Retic (LIR) Lemma Rumantsch Deutsch Italiano Chavazzin   A  B  C  D  E  F  G  H I  J  K  L  M  N  O  P  Q  R  S  T  U  V  W  X  Y  Z  Bansi, Barbara Barandun, Johannes  Bansi, Heinrich * 19-3-1754 a La Punt-Chamues-ch, † 2-10-1835 a Silvaplauna, ref., dad Ardez. Figl da Luzius, plevon. ∞ Ursina n. Lorsa, da Silvaplauna. Scolà a l'institut d'educaziun da ses bab a Chamues-ch, è B. sa rendì il 1769 cun ses bab a Neuwied (Rheinland), in center da la confraternitad dals herrnhuterans. Recepì en la Sinoda retica il 1773, è el daventà il 1776 plevon da Fläsch en successiun da ses bab. Aderent da l'Illuminissem, è el s'engaschà en la Societad dals amis da l'agricultura dal Grischun. El ha prendì part a las debattas da l'efemerica Societad teologica dal Grischun ed, a partir dal 1782, a quellas da la nova Societad grischuna da lectura ed ha tgirà contacts regulars cun Johann Heinrich Pestalozzi, Johann Kaspar Lavater e Johann Caspar Schweizer da Turitg. Il 1785 è B. daventà plevon a Lantsch Sut, el ha però prest stuì bandunar sia plaiv sco partisan dals Patriots ("franzos") ed adversari da la pussanta fam. von Salis. Il 1790 è el vegnì exclus da la Sinoda retica (reabilità pir il 1796). L'atun 1786 è B. sa rendì a Paris, nua ch'el ha surpiglià missiuns dal salun revoluziunar da Johann Caspar Schweizer (tr.a., il 1787, sustegn dal moviment dem. a Genevra). Suenter l'entrada da l'armada austr. en il Grischun l'oct. 1798, ha B. participà a l'occupaziun franz. da Clavenna ed ha installà, sco comm. dal stab general franz., in servetsch da spiunadi en il Grischun vischin. Il dec. 1798 è el vegnì recepì sco burgais helvetic. Sco chapitani en servetsch franz. (1798-1802) ha el agì en tut la Svizra, tr.a. era en l'Engiadina, sco administratur ed agent secret. Suenter la Mediaziun dal 1803, è B. sa retratg definitivamain a Silvaplauna, nua ch'el è s'occupà da studis istorics ed economics. B. è stà confundatur da la Societad per la perscrutaziun da l'istorgia dal Grischun (oz Societad istorica dal Grischun). Ina pravenda n'ha el betg pli surpiglià. Ses engaschament fervent cunter la predominanza dal clan dals Salis e per l'adesiun dal Grischun a la Confed. sco era sia activitad en l'armada franz. mussan ch'il plevon era daventà politicher. Archiv: ASGR, relasch parz. da l'Archiv Tscharner. Ovras: Volk, Sitten und Gesetze eines Gebirgsthals in Graubünden, edì da R. Tönjachen, en: BM, 1941, 289-303, 336-49. Litteratura: J.M. Trepp, Heinrich B., en: JHGG, 1907, 101-267; C. Roedel, Pestalozzi und Graubünden, diss. Berna, 1960; W. Bansi, "Die Bansi's": Chronik einer Bündner Familie, eine "Trilogie" mit Gedichten, 2004. Jürg Simonett  Bansi, Barbara Barandun, Johannes  © HLS: Tuts dretgs d’autur da questa publicaziun electronica èn tar il Historisches Lexikon der Schweiz, Berna. Per tut ils texts publitgads a moda electronica valan las medemas reglas sco per la publicaziun stampada. Redacziun LIS, Gerberngasse 39, Chaum postal 322, 3000 Berna 13, tel. +41 31 313 13 30, e-mail: