e-LIR / Lexicon
Assistenza e-LIR
Contact
Publicaziun
Sponsurs
|
Lexicon Istoric Retic (LIR)
A B C D E F G H I J K L M N O P Q R S T U V W X Y Z
Sax, Heinrich de (Mesauc)
* ca. 1418, menz. per la davosa giada il 1479. Figl da Johann. Nev dad Albert. Cont. A partir dal 1436 cumpara S. sco in dals aspirants da l'ierta dal relasch dal davos cont de Toggenburg. La cuminanza d'ierta aristocratica ha surdà il 1437 il chasté da Grinau a Sviz. Il 1439 ha S. impegnà sia cumpart dal contadi d'Uznach a Sviz ed a Glaruna, favurisond qua tras ils lieus rurals visavi la citad da Turitg. S. appartegneva cun ses signuradis en la Val dal Rain Anteriur a la Lia Grischa. Il 1446 ha la dretgira da la LG obligà el da conceder al cumin da Lumnezia-Val il dretg da proponer candidats per l'uffizi dal chastellan resp. dal mastral da la Lumnezia. Il 1457 ha S. decretà, ens. cun ils Lumnezians, prescripziuns cunter l'immigraziun da glieud estra. En ses contadi da Mesauc tschertgava el la concordanza cun Milaun. Il 1450 è el sa mess perina cun il duca Francesco Sforza concernent las pensiuns ed ils privilegis da dazi, ed il 1452 ha el calmà las vischnancas dal Mesauc cun agid da novs statuts. Ses plan dal 1458 da far in'allianza cun Milaun ha provocà percunter ina revolta en la LG. L'avat da Mustér ha quietà la glieud ed ha cuntanschì che S. è s'unì cun il cumin da la Foppa a la Cadi. S. ha empermess als subdits da la claustra da Mustér (Cadi) da tegnair avert ses chastè da Mesauc. Il 1479 è el sa laschà integrar en il conclus da pasch tr. Milaun ed ils Confederads. Il medem onn ha el surdà ses domini a ses figl Johann Peter.
Litteratura:
G. Hofer-Wild, Herrschaft und Hoheitsrechte der S. im Misox, 1949, 52-73, 175.
Florian Hitz
© HLS: Tuts dretgs d’autur da questa publicaziun electronica èn tar
il Historisches Lexikon der Schweiz, Berna. Per tut ils texts publitgads a moda
electronica valan las medemas reglas sco per la publicaziun stampada.
| |
|
Redacziun LIS, Gerberngasse 39, Chaum postal 322, 3000 Berna 13, tel. +41 31 313 13 30, e-mail:
|
|
Sax, de [de Sacco, de Sax-Mesauc]