e-LIR / Lexicon Assistenza e-LIR Contact Publicaziun Sponsurs	Lexicon Istoric Retic (LIR) Lemma Rumantsch Deutsch Italiano Chavazzin   A  B  C  D  E  F  G  H I  J  K  L  M  N  O  P  Q  R  S  T  U  V  W  X  Y  Z  Velleman, Anton Veraguth, Otto  Veptga Passadi a 2407 m che maina da Dialma en la Val Sernft (Glaruna) a Pigniu en la Val dal Rain Anteriur, numnà era Pass Pigniu, tud. Panixerpass. Il V. serviva als Glarunais per il commerzi da muvel e da martganzia a Glion e sur il Cuolm Val ed il Valragn a Clavenna ed a Com resp. sur il Lucmagn a Ligiaun. Il pass vegn menz. en l'urbari habsburgais (1303-07) sco punct da cunfin dal contadi da Lags (unz uffen Wepeh). Il num rum. V. duai esser d'origin gallic tardiv e signifitgar pastgira alpestra. La pasch stipulada il 1343 tr. il Glaruna e la claustra da Mustér dat perditga d'ina senda da sauma sur il V. bain frequentada cun chavals. La Walenbrugg sin l'Alp Wichlen dadens Dialma è doc. il 1344 sco Jätzsteg ed è enconuschenta dapi il 1549 sco punt da crap artgada. L'integraziun explicita dals da Valragn en l'allianza da la LG cun il Glaruna (1400) suttastritga l'impurtanza da questa via da transit nord-sid. Il 1448 ha Wintertur dumandà il Glaruna da proteger ses commerziants da mulestas da vart dals da Dialma. Il 1548 han intimà las dretgiras da Mustér e da Vuorz ils Glarunais da meglierar lur tschancun dal pass ch'il Glaruna ha alura schlargià il 1550 e munì cun lattas da naiv e novas sustas. Il 1561 ha il Glaruna dumandà la LG da procurar per in meglier mantegniment dal V. da la vart grischuna. Il 1567 han il Glaruna e la LG decidì da pretender da commerziants esters ina taxa da transit (pedagi). Tenor Durich Chiampell vegniva enturn la mesadad dal 16. tsch. blera glieud a far bogn en ina funtauna fraida da la vart grischuna dal pass per curar lur malsognas. En il 17. tsch. frequentavan mercenaris, fugitivs e transportaders da graun il V. Il 1771 ha in project, che preveseva in'amplificaziun dal pass cun participaziun internaz., fatg naufragi. Tenor in rapport da viadi dal 1774 durava il passadi cun muvel da Dialma sur il V. ed il Lucmagn a Blinzuna set dis. Ils 6 e 7 d'oct. 1799 ha il gen. russ Alexander Suvorov traversà il pass cun sia armada ed ha subì, causa navaglia e fradaglia, grondas perditas dad umans e material. A partir dal 19. tsch. è sa diminuì il traffic sur il V. cuntinuadamain. Oz vegn el frequentà mo pli dal militar e dad alpinists. Archiv: Acom. Pigniu. Litteratura: I. Müller, Die Pässe von Glarus nach Graubünden, en: BM, 1962, 57-59; W. Fromm, Chronik der Gemeinde Elm, 1985; E. Blumer, Landesfusswege: historische Verkehrswege im Glarnerland, 1989. Martin Bundi  Velleman, Anton Veraguth, Otto  © HLS: Tuts dretgs d’autur da questa publicaziun electronica èn tar il Historisches Lexikon der Schweiz, Berna. Per tut ils texts publitgads a moda electronica valan las medemas reglas sco per la publicaziun stampada. Redacziun LIS, Gerberngasse 39, Chaum postal 322, 3000 Berna 13, tel. +41 31 313 13 30, e-mail: