e-LIR / Lexicon Assistenza e-LIR Contact Publicaziun Sponsurs	Lexicon Istoric Retic (LIR) Lemma Rumantsch Deutsch Italiano Chavazzin   A  B  C  D  E  F  G  H I  J  K  L  M  N  O  P  Q  R  S  T  U  V  W  X  Y  Z  Belmont Belmont, de  Belmont Signuradi dals baruns da B., sortì da la Chasa da Sagogn. La sedia dals signurs locals era la fortezza da B., situada sin in grip a l'ost da Fidaz (vischn. da Flem). Ils dretgs comitals ed ils vegls bains imperials, transmess tras la Chasa da Sagogn, han permess la constituziun dal signuradi. Enturn il 1300 possedevan ils B. surtut dretgs e bains a Domat, Flem e Castrisch sco era en la Val Lumnezia. A l'entsch. dal 14. tsch., suenter l'extincziun da la Chasa da Sagogn e da sias lingias collateralas (de Frauenberg, de Friberg, de Greifenstein e de Wildenberg) sco era dals signurs de Castrisch, han ils B. acquistà lur dretgs, extendend uschia l'atgna signuria en la Foppa. Da quel temp èn ils B. attestads era sco possessurs da la prefectura episcopala a Sagogn, a Glion ed en la Val Lumnezia. La Faida da B. dal 1352 era prob. prorutta surtut per motivs ereditars (Anna, la davosa represchentanta dals Wildenbergs e figlia da la Chasa da Sagogn, era maridada cun Hugo IV de Werdenberg-Heiligenberg). Suenter l'extincziun da la fam. B. en lingia masculina (1371) è il signuradi passà tras maridaglia als signurs de Sax-Mesauc ed il 1483 tras cumpra a l'uvestg da Cuira. Ils signurs de B. resp. lur successurs, ils de Sax-Mesauc, han obtegnì entaifer la LG il dretg da proponer mintga trais onns il chauderschader (landrehter), en alternanza cun l'avat da Mustér ed il represchentant dal signuradi da Razén. Litteratura: Clavadetscher/Meyer, Burgenbuch; J.L. Muraro, Die Freiherren von B., en: Geschichte und Kultur Churrätiens, edì dad U. Brunold, L. Deplazes, 1986, 271-309. Martin Bundi  Belmont Belmont, de  © HLS: Tuts dretgs d’autur da questa publicaziun electronica èn tar il Historisches Lexikon der Schweiz, Berna. Per tut ils texts publitgads a moda electronica valan las medemas reglas sco per la publicaziun stampada. Redacziun LIS, Gerberngasse 39, Chaum postal 322, 3000 Berna 13, tel. +41 31 313 13 30, e-mail: