e-LIR / Lexicon Assistenza e-LIR Contact Publicaziun Sponsurs	Lexicon Istoric Retic (LIR) Lemma Rumantsch Deutsch Italiano Chavazzin   A  B  C  D  E  F  G  H I  J  K  L  M  N  O  P  Q  R  S  T  U  V  W  X  Y  Z  Gengel, Georg Germanisaziun  Germania La noziun politic-geografica Deutschland (avant il 1500 per regla "die deutschen Lande") designava a partir dal 11. tsch. il Stadi (Regnum teutonicum) sortì da l'Imperi ostrofrancon, dapi il 1871 il Segund Reich ed ils stadis successurs.<br /> Cun l'introducziun dal sistem administrativ francon en Rezia l'onn 806 e la separaziun da l'uvestgieu da Cuira da l'archuvestgieu da Milaun e l'annexiun a quel da Magonza è l'elita s'orientada definitivamain vers il nord e la Currezia è vegnida exposta ad ina <elirlink href="aid:1116">germanisaziun</elirlink> progredinta. Il tudestg è s'imponì successivamain sco lingua administrativa ed è daventà, per raschuns praticas, la lingua uffiziala da la Republica da las Trais Lias.<br /> Dapi il temp medieval èn doc. relaziuns economicas da la Rezia cun la G.: <elirlink href="aid:1399">import</elirlink> da granezza, traffic da transit, da persunas e da martganzia (<elirlink href="aid:3377">Traffic e transit</elirlink>). En il 15. tsch. è il pictur e sculptur Ivo Strigel da Memmingen (Baviera) stà activ en baselgias e chapluttas da la Surselva, Bergiaglia e Val Calanca. En il 17. e 18. tsch. percunter èn architects e stuccaturs grischuns - Giovanni Albertalli, Gabriele de Gabrieli - stads da grond'impurtanza per la genesa ed il svilup dal stil baroc en la G. dal Sid. Il 1719 è Andreas Pfeffer, naschì a Frankfurt am Main, vegnì recepì a Cuira sco bundsmann; el e ses bab Johann eran tipografs, e lur manaschi da fam. (stamparia e liaria da cudeschs) è stà d'impurtanza per Cuira. En il 18. tsch. han ils herrnhuterans da Halle influenzà fermamain ils circuls pietistics grischuns, e David Cranz da Naugard (Pomarania), sin missiun herrnhuterana en il Grischun, ha descrit il progress dal <elirlink href="aid:2124">pietissem</elirlink> en ses «Reise-Diarium und Relation von Pündten [...] 1757». Scandal ha fatg Friedrich Schiller cun sia remartga en l'ovra «Die Räuber»: "... reis' du ins Graubündner Land, das ist das Athen der heutigen Gauner." Ultra da prominents Grischuns ha era Christian Carl von Wredow, in immigrant da Hohenburg (Baviera), defendì il Grischun en ina replica apologetica a Schiller. Dal 1803-27 è Wredow alura stà directur da la chanzlia dal novcreà chantun Grischun. Malaveglia ha era chaschunà Hannikel, chapitani legendar d'ina banda da laders e brigants, oriund dal Württemberg, activ era en il Grischun e perpetnisà en il "Hannikelturm" a Cuira. <br /> Ina contribuziun impurtanta al svilup intellectual (en il senn illuministic) dal Grischun a la fin dal 18. tsch. ha prestà Heinrich Ludwig Lehmann da Detershagen (sper Magdeburg), publicist en istorgia e topografia dal Grischun e sias Terras subditas. En quest connex èn da numnar Johann Georg Philipp Thiele da Hamburg, magister al Philanthropinum a Marschlins, rectur e refurmatur da las scolas da la citad da Cuira, e Johann Peter Nesemann da Magdeburg ch'ha manà a partir dal 1761, ens. cun Martin von Planta, il Seminari (filantropin) a Lantsch Sut e dal 1771-77 quel a Marschlins. Nesemann e ses cumpatriot da Magdeburg, Johann Heinrich Zschokke, han dirigì a la fin il Seminari da Johann Baptista von Tscharner en il chastè a La Punt/Rehanau. Zschokke è stà in portavusch dals Patriots grischuns ed autur da «Die drey ewigen Bünde im hohen Rhätien» e d'in «Entwurf zu einer Verbesserung der rhätischen Constitution» (1798). <br /> L'influenza spiertala dad immigrants germans en il 19. tsch. ha cuntinuà en furma dad ideas liberalas. Numerus giuvens intellectuals, smanatschads da l'uschen. persecuziun da demagogs dals reschims monarchic-cons. (Prussia, Austria e.a.) han chattà asil a Cuira sco scolasts a la Scola chant. evangelica, p.ex. Karl Follen, Wilhelm Snell, Karl Völker e Georg Wilhelm Röder. Quest ultim, in teolog provegnint da Kaub (Pfalz), è stà in publicist impurtant davart l'istorgia, la geografia ed il dretg dal chantun Grischun ed ha influenzà fermamain la furmaziun dals scolasts en ils onns 1820-40. Quai vala era per Gottfried Ludwig Theobald dad Allendorf (sper Hanau, Hessen), prof. a la Scola chant. a Cuira a partir dal 1854, emprim cartograf sistematic dal mund alpin dal Grischun e da las Alps Orientalas ed autur da l'emprim guid da viadi per las Alps grischunas (1862). Sia collecziun d'istorgia natirala è stada in fundament impurtant per il Museum retic. Da la plima da l'elita scriventa ed intellectuala da la G. (passants, giasts da cura, dimorants temporars, sco p.ex. il filosof Friedrich Nietzsche a Segl) provegnan numerusas descripziuns, positivas e negativas, dal Grischun e da ses avdants, realisadas dal 17. tsch. fin il di dad oz (<elirlink href="aid:1441">Litteratura da viadi</elirlink>). A partir dal temp medieval tardiv han students grischuns frequentà instituts ed <elirlink href="aid:2898">universitads</elirlink> tudestgas: Heidelberg, Friburg e.Br., Ingolstadt, Dillingen, Jena, Tubinga. En il 19. tsch. è Minca daventà il center da studi da l'elita cat. (Giacun Hasper Muoth, Caspar Decurtins e.a.) e Berlin è sa sviluppà, grazia a Friedrich Carl von Savigny, ad ina buna adressa per giurists; Philipp Hössli, ses student e posteriur landrehter, era entrà qua en relaziun cun Bettina von Arnim. <br /> Il chant rum. ha d'engraziar l'imni surs. «A Trun sut igl ischi» al cumponist Ignaz Heim, oriund da Renchen (Baden). Il linguist Anton Velleman da Cologna, emprim rectur dal Lyceum Alpinum Zuoz (1904), ha regalà als Ladins la «Grammatica teoretica, pratica ed istorica della lingua ladina d'Engiadin'Ota» (1915-24) ed il «Dicziunari scurznieu da la lingua ladina cun traducziun tudais-cha, francesa ed inglaisa» (1929). Ad Erwin Poeschel da Kempten (Allgäu) ha il Grischun d'engraziar tr.a. «Die Kunstdenkmäler des Kantons Graubünden» (7 ts, 1937-48).<br /> En il 18. e 19. tsch. èn massas d'emigrants dal Grischun s'etablids sco pastiziers e cafetiers en citads da la G. (<elirlink href="aid:1078">Emigraziun</elirlink>): a Berlin tr.a. ils Jostys, a Dresden Robbis e Trepps, a Hamburg Maurizios, Perinis, Jostys e plirs emigrants dal Partenz, la Konditorei Bansi &amp; Comp. ha fatg furore cun ses "Bielefelder Tropfen", ed a Hannover eran Robbis activs sco conditers da la curt. Auters èn stads fin otg mais l'onn sco famegls e fantschellas en la G. dal Sid: ils <elirlink href="aid:2790">Schuobacheclers</elirlink>, uffants plazzads o.t. sin bains purils sco forzas da lavur bunmartgadas.<br /> L'<elirlink href="aid:1398">immigraziun</elirlink> da Tudestgs marca il svilup da l'<elirlink href="aid:1395">hotellaria</elirlink> grischuna. Tr. ils piuniers da quella chattain nus il medi Otto Herwig (da Hanau, Hessen) ch'ha realisà ad Arosa l'emprim sanatori per malsauns dal lom. Era Tavau è sa sviluppà, sin iniziativa dal medi tud. Alexander Spengler, ad in center da cura. Ils giasts da cura ed ils fugitivs politics han conferì a Tavau in caracter internaz. (tr.a. Thomas Mann). Il Cup da Spengler (dapi il 1923) ed ils bobs olimpics, ils skeletons e las scarsolas, construids dad August Hartkopf da Kassel (Hessen), han rendì Tavau enconuschent en il mund dal sport. Renum mundial en il sectur da l'art ha Tavau obtegnì tras Ernst Ludwig Kirchner, naschì ad Aschaffenburg (Baviera) e resident qua a partir dal 1918; el viva vinavant en il Museum Kirchner. Il 1878 ha il curant dal lom Hermann Perthes avert a Tavau il Fridericianum, in gimnasi umanistic cun internat per students da la G. En ils onns 1930 è quella scola vegnida sut l'influenza dals naziunalsocialists (<elirlink href="aid:2101">Organisaziuns faschistas e nazistas</elirlink>) ch'avevan a Tavau lur centrala svizra dirigida da Wilhelm Gustloff, assassinà il 1936; il 1945 è quella centrala vegnida serrada, reorganisada e puspè averta sut in auter num (<elirlink href="aid:3361">Affera Gustloff</elirlink>).<br /> Il chastè da Tarasp ha pudì vegnir mantegnì grazia a l'industrial Karl August Lingner da Dresden, inventader da l'"Odol" ch'ha cumprà el il 1900 e sanà (dapi il 2008 en possess da la Fundaziun Pro Chastè da Tarasp). Merits per la cultura engiadinaisa ha era l'architect Max Kettnaker da Stuttgart, autur da las «Hausinschriften» da l'Engadina, da la Val Müstair e da la Val d'Alvra superiura (1988). El ha emprendì rum. sursilvan e ladin ed ha fundà il 1977 la Rätoromanische Gesellschaft Stuttgart. <br /> L'istorgia specificamain "grischuna" da l'immigraziun da Tudestgs (era quella dals <elirlink href="aid:1106">fugitivs</elirlink> durant la Segunda Guerra mundiala) è enconuschenta mo a moda fitg fragmentara.<br /> Dapi il 1972 collavuran il Stadi liber da la Baviera ed il Bundesland Baden-Württemberg cun ils chantuns Grischun, S. Gagl e Tessin entaifer l'Arge Alp.</p> Archiv: Ovras: Funtaunas: Litteratura: Pieth, Bündnergeschichte; Sprecher/Jenny, Kulturgeschichte; Schnyder, Handel und Verkehr; S. Margadant, Land und Leute Graubündens im Spiegel der Reiseliteratur 1492-1800, 1978; C. Zortea, Graubünden im Spiegel der Reiseberichte, der landeskundlichen und topographischen Beschreibungen in der Zeit von 1800 bis 1850, 1987; M. Pfister, Baumeister aus Graubünden - Wegbereiter des Barock, 1993; K. Wanner, Der Himmel schon südlich, die Luft aber frisch, 1993 (20062); HbBG. Adolf Collenberg  Gengel, Georg Germanisaziun  © HLS: Tuts dretgs d’autur da questa publicaziun electronica èn tar il Historisches Lexikon der Schweiz, Berna. Per tut ils texts publitgads a moda electronica valan las medemas reglas sco per la publicaziun stampada. Redacziun LIS, Gerberngasse 39, Chaum postal 322, 3000 Berna 13, tel. +41 31 313 13 30, e-mail: