e-LIR / Lexicon Assistenza e-LIR Contact Publicaziun Sponsurs	Lexicon Istoric Retic (LIR) Lemma Rumantsch Deutsch Italiano Chavazzin   A  B  C  D  E  F  G  H I  J  K  L  M  N  O  P  Q  R  S  T  U  V  W  X  Y  Z  Giuventetgna Rumantscha (GiuRu) Gliezi [Luzi/Luzius], Son  Glaruna Per tgirar relaziuns politicas intensivas eran ils pass tr. il G. e la Rezia grischuna memia stentus e privlus. Il 1400 èn il G. e la LG s'empermess contractualmain pasch, protecziun ed agid militar vicendaivel sco era il traffic e commerzi liber sur il <elirlink href="aid:3006">Veptga</elirlink> ed il Lucmagn. Nus inscuntrain alura adina puspè derschaders glarunais sco arbiters en Rezia, p.ex. en ils onns 1396, 1418 e 1452. A basa dals contracts stipulads tr. il G. ed auters chantuns da la Confed. cun la LG e la LCD (a partir dal 1498) èn ils Glarunais sa participads a campagnas militaras e battaglias cunter ils Austriacs (1499) sco era a l'emprima Guerra da Müsch (1525). Il refurmatur Glarean († 1532) tgirava stretgs contacts cun ils preditgants grischuns (Johannes Comander e.a.). Il 1538 è cumparida «Die uralt warhafftig Alpisch Rhetia» dad Aegidius (Gilg) Tschudi da G., in'excellenta descripziun istoric-topografica dal Grischun. Il 1580 èn ils chantuns da Turitg e G. s'alliads cun la LDD. La paritad confessiunala dal G. ha pretendì ina neutralitad (relativa) durant ils Scumbigls grischuns. Il 1622 han truppas glarunaisas purtà succurs a la milissa dal Partenz ed il 1624 a l'armada dal general da las Trais Lias, Rudolf von Salis, en Engiadina Bassa. Gieri Genatsch ha recrutà 1'000 Glarunais per la campagna en Vuclina dal 1624-25, e suenter il 1632 han plirs tschients Glarunais prestà servetsch militar al Duca de Rohan. <br />Las relaziuns economicas tr. il Grischun ed il G. èn stadas tut en tut pli impurtantas che quellas politicas, o.t. per la Surselva ed, en dimensiuns pli modestas, era per il Partenz. Il 1343 ha il G. concedì a la claustra da Mustér il passagi liber sur il Veptga e tras il G. Las vias da sauma tr. la Surselva ed il G. n'eran però betg fitg bunas: l'uschen. Gehauener Weg, construì il 1548 cunter la voluntad da la LCD e da la LDD che temevan la concurrenza, era d'ina qualitad plitost mediocra; el tanscheva gist per chatschar muaglia e nursas da la Surselva sin las alps glarunaisas e per manar il muvel sin las grondas fieras d'atun al sid da las Alps (enturn il 1760 p.ex. var 2'700 arments). Martgadants glarunais vegnivan mintgamai il zercladur en Surselva ed en il Partenz a cumprar nursas (il 1776 ca. 6'000 animals) ch'els alpegiavan en il G. Era la vischnanca da Breil e conturns ha laschà pascular fin il 2006 grondas muntaneras da nursas (ca. 1'000 animals l'onn) en la regiun dal <elirlink href="aid:2000">Lembra</elirlink>/Lag da Mut. Il G. uffizial ha empruvà, senza success, da limitar il dumber da nursas e da fixar ils pretschs. Ins quinta ch'ils Glarunais hajan cumprà dal cumin da Rueun enturn il 1790 var 2'000 vatgas (per chargiar lur alps) e var 100 portgs (per consumar la scotga) ch'els chatschavan sur il Veptga. Il 1771, l'onn da fomina, avevan ils Glarunais projectà ina transversala sur il Lucmagn ed il Veptga en la Planira da la Linth per garantir il transport da granezza - in plan che n'è dentant mai vegnì realisà. Era la varianta pli curta sur il Veptga en la regiun da la Greina, skizzada da Placi a Spescha, è restada ina proposta, gist uschè sco ils projects da l'avat Columban Sozzi per ina via dal Sandpass sur l'Alp Cavrein a Mustér (1772) ed il 1872 ina da Dialma a Pigniu. L'avertura da la viafier da Weesen a Sargans (1859) e la colliaziun cun il Gottard sur il Klausen (1899) han interrut ils passadis istorics tr. il Grischun ed il G. (cun excepziun dal Lembra). En ils onns 1930 èn vegnids inoltrads (e refusads) div. projects per tunnels da colliaziun; ils projects per vias d'autos sur il Lembra ed il Veptga, creditads dal Cussegl naz., n'èn betg vegnids realisads. En ils onns 1960 e 1970 existivan plans per ina Viafier Tödi-Greina (Linthal-Trun-Dongio) cun in tunnel da 19,8 km lunghezza ed ina colliaziun a l'Arena Alva. <br /> Rollas marginalas han giugà ils ulteriurs pass e passadis: sur il <elirlink href="aid:2005">Pass dal Segnas</elirlink> vegniva chatschà l'atun biestga da fiera da Dialma sur la Niederalp a Flem, ed il <elirlink href="aid:1996">Pass dal Foo</elirlink> serviva da trapass sch'ils auters passadis eran serrads u periclitads.<br />Stretgas relaziuns tr. il Grischun ed il G. existan dapi il 19. tsch. entaifer las furmaziuns militaras da muntogna, e relaziuns civilas vegnan tgiradas actualmain sin il champ dal sport, tr.a. a chaschun da la Festa da lutga grischun-glarunaisa e da la Festa chant. da gimnastica. </p> Archiv: Ovras: Funtaunas: Litteratura: Zur Frage einer Strassenverbindung Glarus-Graubünden, 1939; J. Hösli, Glarner Land- und Alpwirtschaft in Vergangenheit und Gegenwart, 1948; J. Winteler, Geschichte des Landes Glarus, 2 ts, 1952-54 (1957²); I. Müller, Die Pässe von Glarus nach Graubünden, en: BM, 1962, 57-79. Adolf Collenberg  Giuventetgna Rumantscha (GiuRu) Gliezi [Luzi/Luzius], Son  © HLS: Tuts dretgs d’autur da questa publicaziun electronica èn tar il Historisches Lexikon der Schweiz, Berna. Per tut ils texts publitgads a moda electronica valan las medemas reglas sco per la publicaziun stampada. Redacziun LIS, Gerberngasse 39, Chaum postal 322, 3000 Berna 13, tel. +41 31 313 13 30, e-mail: