e-LIR / Lexicon Assistenza e-LIR Contact Publicaziun Sponsurs	Lexicon Istoric Retic (LIR) Lemma Rumantsch Deutsch Italiano Chavazzin   A  B  C  D  E  F  G  H I  J  K  L  M  N  O  P  Q  R  S  T  U  V  W  X  Y  Z  Haas, Peter Hackaert, Jan  Habsburg, von Il 1282, suenter la mort dal cont Rudolf V von Rapperswil, è l'imp. Rudolf von H. sa patrunà da l'avugadia imperiala sur la <elirlink href="aid:2990">Val d'Ursera</elirlink> ch'el ha alura cedì a ses figls. Il 1382 ha la val obtegnì la brev da libertad ed il 1410 il dretg da vischinadi da l'Uri ed è ida qua tras a perder per ils H. e per la claustra da Mustér ch'aveva pudì mantegnair tscherts dretgs en la val. <br />Il 1325 ha Ludwig von Bayern renconuschì l'imp. Friedrich von H. sco cunregent, ma il profit è stà pitschen. En consequenza è ses frar Albrecht II von H. s'occupà pli intensivamain da l'extensiun dal domini territorial ed economic, o.t. en l'<elirlink href="aid:58">Austria</elirlink>. Il 1335 han ils H. acquistà il domini en il ducadi imperial da la Carinzia, ed il 1363 ha la duchessa Margareta Maultasch cedì il <elirlink href="aid:2939">Tirol</elirlink> al duca Rudolf IV von H. Il Tirol furmava ina punt tr. il possess dals H. en Rezia, en la Confed. ed en l'Austria e vegniva regì dal cont dal Tirol che residiava a la curt da <elirlink href="aid:3396">Puntina</elirlink>. Il 1363 han ils von Matsch cedì sut squitsch politic lur feud da Tarasp al cont von Tirol. La pressiun creschenta da vart da quest vischin nov e privlus è era sa manifestada en la fundaziun da la LCD (1367) ed en las faidas dal 1388-1415 tr. l'uv. Hartmann II von Werdenberg-Sargans (sustegnì dals signurs ed avugads von Matsch) cunter l'Austria e Razén. Il 1464 ha Ulrich IX von Matsch vendì il chastè ed il domini da Tarasp per 2000 renschs al duca Sigmund von H. Il passadi dal domini dals von Matsch als H. ha gì tr.a. per consequenza che Tarasp è restà catolic. Quest feud tirolais è restà en possess dals H. fin il 1803, daventond "ina nauscha spina en l'egl" da l'Engiadina Bassa e da la Republica retica (Jacob Anton Vulpius, «Historia Raetica»). Dal 1421-1803 possedeva l'Austria era l'avugadia legitima sur la claustra da Müstair (exequida illegitimamain sco feud ereditar). <br /><br /></p> <elirbold><em>Tensiuns politic-giuridicas e guerras</em></elirbold> <p>Las relaziuns giuridicas d'obedientscha eran fitg diffusas en la regiun da l'Engiadina Bassa, da la Val Müstair e dal Vnuost. Suenter la Sentenzia da cumpromiss da Gluorn dal 1471 concernent ils subdits dal ducadi tirolais en l'Engiadina Bassa, è alura prorutta il 1475 la Guerra da las giaglinas (<elirlink href="aid:1130">Guerras</elirlink>), e las tensiuns politic-giuridicas en la regiun èn finalmain explodidas en la Battaglia a la Chalavaina (1499). Il 1470 ha Sigmund von H. cumprà dal cont Hugo von Montfort-Tettnang las sis dretgiras interiuras da la LDD ch'el ha vendì als conts von Matsch e reacquistà il 1477. Il 1496 ha l'avugà Gaudenz von Matsch vendì las duas dretgiras exteriuras d'Aschera e da Castels a Maximilian. L'avugà austr. sur las (ussa) <elirlink href="aid:3792">Otg Dretgiras</elirlink> ha transferì sia sedia a Castels. <br />Il 1497 ha Maximilian acquistà tras barat dals Zollerns il signuradi da Razén ch'ha permess als H. da controllar il traffic da transit en il Grischun (regiun da La Punt/Rehanau cun Razén, Panaduz, Favugn e Domat) e da far valair sia influenza sin la LG (al signuradi da Razén appartegnevan era Sursaissa e Tenna) e qua tras era sin la politica da la Republica da las Trais Lias. Il signur feudal da Razén proponiva numnadamain mintga trais onns ils trais candidats per l'uffizi da landrehter e controllava ils <elirlink href="aid:2129">plis</elirlink> da ses domini. Suenter esser vegnì administrà da differentas fam. indigenas (Marmels, Stampas, Plantas, Travers), è il pegn vegnì cumprà ora il 1696 ed il signuradi è vegnì suttamess fin il 1803 directamain a l'administraziun tras la Chasa H.-Austria. Il 1819 è el vegnì annectà sin fundament dal conclus dal <elirlink href="aid:811">Congress da Vienna</elirlink> dal 1815 al chantun Grischun.<br /><br /></p> <elirbold><em>Tranter Habsburg-Austria e Habsburg-Spagna<br /> <br /> </em></elirbold> <p>Suenter la Guerra svabaisa han ils contracts conclus il 1500 ed il 1503 a Feldkirch stabilì la pasch e determinà ils cunfins ed ils dretgs da las Lias, da l'uvestgieu e da l'Austria (fin 1641/42). A la Republica da las Trais Lias èsi reussì d'impedir in'expansiun da l'Austria en l'Engiadina Bassa, ed era l'uvestg da Cuira ha pudì defender ses dretgs feudals (subdits da la Chadé) ed ecclesiastics en il Vnuost. Las tensiuns ed <elirlink href="aid:37">allianzas</elirlink> dal temp suenter il 1530 avevan per ordinari motivs confessiunals. En il 16. tsch. èn daventads ils servetschs mercenars en favur da l'Austria pli e pli impurtants, els n'han dentant mai cuntanschì la dimensiun da quels en favur da la Frantscha. <br />Tr. il 1556 ed il 1714 è la lingia H.-Spagna, possessura dal domini en il ducadi da Milaun, stada d'impurtanza primordiala per las Lias, o.t. per la politica proseguida da vart catolica. La <elirlink href="aid:2724">Spagna</elirlink> aveva demonstrà sia pussanza cun eriger il 1603 la fortezza da <elirlink href="aid:1138">Fuentes</elirlink> a Colico sisum il Lai da Com, ed ella è stada omnipreschenta en la politica grischuna durant ils <elirlink href="aid:2803">Scumbigls grischuns</elirlink>. La lingia H.-Austria ha profità da quest'occasiun ed è sa patrunada il 1618 da la dretgira d'Untercalven (subdits episcopals). Il 1621-22 ha ella occupà cun forza armada sut il commando dad Alois Baldirun las valladas grischunas tr. Cuira e l'Engiadina Bassa ed ha dictà il sett. 1622 a las Lias il <elirlink href="aid:815">Contract da Lindau</elirlink> ch'ha privà quellas tr.a. da las Otg Dretgiras e da l'Engiadina Bassa. Suenter la terza invasiun austr. dal 1629 e l'interludi franz. dal 1632-36 (Rohan) han il Capitulat da Milaun (1639, <elirlink href="aid:765">Capitulats da Milaun</elirlink>) ed il Contract da Feldkirch (1641 e 1642) puspè attribuì las <elirlink href="aid:2856">Terras subditas</elirlink> a la Republica da las Trais Lias e restabilì ils cunfins ed ils dretgs d'avant las invasiuns ed occupaziuns militaras estras. L'uvestg ha dentant desistì da la giurisdicziun seculara en las dretgiras da Danuder, Gluorn e Damal ed il 1657 era en quella da Schludern.<br />Dal 1639-1714 èn las Lias puspè stadas sut l'influenza dals partisans da la Spagna-Milaun, represchentada dals ambassadurs Casati. Il 1649-52 èn las Otg Dretgiras sa cumpradas libras da l'avugadia austr., il 1652 era l'Engiadina Bassa (senza Tarasp). L'emprova da cumprar ora il signuradi da Razén n'è dentant betg reussida. Durant la Guerra da successiun spagn. (1701-14) han millis Grischuns cumbattì da la vart franz. (Louis XIV) cunter l'allianza imperiala da Leopold I, al qual il Grischun ha permess plirs passagis da truppas. Suenter la Pasch da Rastatt (mars 1714) ha l'Austria regì sur il ducadi da Milaun, e la Republica è tuttenina stada circumdada da trais varts da l'Austria. Ella è alura sa distanziada politicamain da la Frantscha per s'orientar, ens. cun ils Salis sco exponents dals interess austr., a l'Austria. Suenter il 1714 è sa fatg valair adina pli ferm il dretg penal da la <elirlink href="aid:766">Carolina</elirlink>. Il 1726 han las Lias signà cun l'Austria-Milaun il Segund Capitulat da Milaun, ed il 1728 ha l'uv. Joseph Benedikt von Rost vendì la Val Müstair a l'Austria (cumprada enavos il 1762 cun perdita da Tuer). La renovaziun dal (Terz) Capitulat da Milaun il 1763 ha provocà in desaster: la Republica da Vaniescha ha expulsà per vendetga tut ils mastergnants e commerziants grischuns (plirs millis) da ses territori, dond qua tras a l'emigraziun grischuna in auter caracter e novas destinaziuns.<br /><br /></p> <elirbold><em>La fin da la dominanza austriaca en il Grischun<br /> <br /> </em></elirbold> <p>En spetga d'attatgas franz. e sin dumonda da las autoritads grischunas han truppas austr. occupà l'oct. 1798 il Grischun, ellas èn dentant vegnidas rebattidas il 1799. Il Contract d'armistizi da Parsdorf ha attribuì a l'Austria l'Engiadina sco zona d'occupaziun ch'è vegnida guvernada pauc temp (stad 1800) da la Regenza interimala "austriaca", presidiada dad Anton von Salis-Soglio, davent da Zernez (<elirlink href="aid:1394">Helvetica</elirlink>).<br />Il 1803 ha l'Acta da <elirlink href="aid:2063">Mediaziun</elirlink> privà l'Austria dal domini grischun, ed en il Tractat da Schönbrunn dals 14-10-1809 han ils H. cedì il signuradi da Razén a Napoleun. Il Congress da Vienna ha alura surdà il 1815 al chantun Grischun la cumplaina suveranitad entaifer ses territori, ed il 1819 è Razén vegnì annectà formalmain al Grischun. L'Austria ha obtegnì las anteriuras Terras subditas (Buorn, Vuclina e Clavenna). Las ultimas emprovas da reacquistar ils bains grischuns pers tras la <elirlink href="aid:808">Confisca</elirlink> èn vegnidas interprendidas cun success modest en ils onns 1830. <br />La preschientscha dals H. en il Grischun è sa limitada a partir da quel mument a singuls represchentants. Suenter sia abdicaziun sfurzada è Carl I, l'ultim imperatur da l'Austria-Ungaria, vegnì exilià en Svizra, ed intgins da ses uffants han passentà l'enviern 1919/20 e 1920/21 a Mustér (en il Hotel Lucmagn). Sia consorta, Zita von Bourbon-Parma, ha tschernì sco residenza da vegliadetgna la claustra da S. Gion a Zezras, nua ch'ella è morta il 1989. La lunga ed intensiva preschientscha dals H. resp. da l'Imperi habsburgais en il Grischun sa reflectescha era en las vopnas da las Lias, dretgiras e vischnancas.<br />Il topos da l'Austria sco inimia incharnada da la Confed., colportà en l'istoriografia svizra e grischuna o.t. dapi Aegidius Tschudi (16. tsch.), gioga ina rolla bler pli modesta en il Grischun. L'integraziun legala dals dominis e dals dretgs feudals austr. (Tarasp, Razén, Otg Dretgiras e.a.) en il corp politic e giuridic da la Republica da las Trais Lias e lur vischinanza, per ordinari paschaivla, n'han betg pudì far nascher ina tenuta antiaustriaca ferma avunda per nutrir in affect analog a quel da la tradiziun da libertad da la Confederaziun.<br /> </p> Archiv: Ovras: Funtaunas: RQGR. Litteratura: Schwarz, Gerichtsorganisation; Durnwalder, Repertorium; J. Küng, Der Verkauf und der Rückkauf des Münstertals (1728-1762), 1976; I. Müller, Die Herren von Tarasp, 1980, 136-77; S. Rageth, Die Rechtsgeschichte der Herrschaft Rhäzüns [...], 1981; I. Müller, Geschichte von Ursern, 1984, 10 s.; Metz, Graubünden 1; HbBG 2 e 3; IG; Simmen, Wappen; A. Collenberg, Die Habsburger in Disentis: 1919-1921, 2005. Adolf Collenberg  Haas, Peter Hackaert, Jan  © HLS: Tuts dretgs d’autur da questa publicaziun electronica èn tar il Historisches Lexikon der Schweiz, Berna. Per tut ils texts publitgads a moda electronica valan las medemas reglas sco per la publicaziun stampada. Redacziun LIS, Gerberngasse 39, Chaum postal 322, 3000 Berna 13, tel. +41 31 313 13 30, e-mail: