e-LIR / Lexicon Assistenza e-LIR Contact Publicaziun Sponsurs	Lexicon Istoric Retic (LIR) Lemma Rumantsch Deutsch Italiano Chavazzin   A  B  C  D  E  F  G  H I  J  K  L  M  N  O  P  Q  R  S  T  U  V  W  X  Y  Z  Liver, Peter Loë, Clement (barun de)  Livign Vischnanca tal. da la provinza da Sunder, situada al cunfin svizzer en l'auta vallada dal medem num al nordvest da Buorm, tal. Livigno (uffiz.). L. ha appartegnì sco part da la Vuclina a las Trais Lias dal 1512-1620 e dal 1639-1797. La culegna da Trepalle è il pli aut abitadi da l'Italia (2079 m) abità l'entir onn. L. è collià cun Buorm tras il Pass da Fus-chagn (tal. Passo di Foscagno), cun Poschiavo tras la Fuorcla da L. (tal. Forcola di Livigno), cun S-chanf tras il Pass da Chaschauna e cun Zernez tras la Val dal Spöl. En il temp medieval era L. in abitadi sparpaglià sin ina vasta surfatscha (ina tschientina da bains purils en il 16. tsch.) ed in impurtant retroterra per l'economia alpestra da Buorm. Il Pass d'Alpisella colliava L. cun las minieras da la <elirlink href="aid:2976">Val Fraele</elirlink>, explotadas en il temp medieval. L. è stà in lieu da div. operaziuns militaras e guerrescas: il 1487, cura che las truppas engiadinaisas èn marschadas sur il Pass da Chaschauna a Buorm; il 1499, suenter la Battaglia a la Chalavaina, cura che l'armada imperiala ha invadì l'Engiadina; il 1635, cura ch'il Duca de Rohan ha victorisà sur ils Austriacs. Entant che L. era a ses temp surtut ina regiun d'emigraziun stagiunala da praders, fantschellas e lavurers da construcziun vers l'Engiadina, ha la localitad fatg in svilup enorm en il sectur terziar en il decurs dal 20. tsch.: sco exclava da duana (1919) e surtut sco regiun turistica dapi ils onns 1950 (telefericas, runals). Il lieu patescha dentant da las consequenzas dal traffic da cumpra. Il tunnel che collia l'Engiadina (tr. Zernez ed il Pass dal Fuorn) cun L. è vegnì avert en ils onns 1960 en connex cun la construcziun dal lai da fermada a L. che ha destruì ina part dal lieu.</p> Archiv: Ovras: Funtaunas: Litteratura: Pieth, Bündnergeschichte; D. Benetti, M. Guidetti, Storia di Valtellina e Valchiavenna, 1990, 219; M. Gaiaschi e.a., Storia di Livigno, 2 ts, 1995. Martin Bundi  Liver, Peter Loë, Clement (barun de)  © HLS: Tuts dretgs d’autur da questa publicaziun electronica èn tar il Historisches Lexikon der Schweiz, Berna. Per tut ils texts publitgads a moda electronica valan las medemas reglas sco per la publicaziun stampada. Redacziun LIS, Gerberngasse 39, Chaum postal 322, 3000 Berna 13, tel. +41 31 313 13 30, e-mail: