e-LIR / Lexicon Assistenza e-LIR Contact Publicaziun Sponsurs	Lexicon Istoric Retic (LIR) Lemma Rumantsch Deutsch Italiano Chavazzin   A  B  C  D  E  F  G  H I  J  K  L  M  N  O  P  Q  R  S  T  U  V  W  X  Y  Z  L'Orsa [Luortza, Lortza] La Nicca, Richard  La Nicca, Richard * 16-8-1794 a Stussavgia Neukirch, † 27-8-1883 a Cuira, da Sarn e Cuira. Figl da Christian, plevon a Stussavgia, Neukirch e Tenna, e dad Anna n. Gredig. &#8734; 1) Ursula n. Fischer, figlia da Cyprian, colonel e speditur, da Cuira, 2) Cäcilia n. Hössli, figlia da Johann Jacob, podestat a Tegl (1781), da Novagnas. Scola chant. a Cuira 1809. Litinent en il regiment svizzer da Victor Emanuel I en il Piemunt. Studi da scienzas tecnicas a l'Univ. da Tubinga 1816-18. Sco assistent da Giulio Pocobelli en la construcziun da la via commerziala dal S. Bernardin (1818-21) ha el participà tr.a. a la realisaziun dal remartgabel Ponte Vittorio Emanuele da la vart meridiunala dal pass. Suenter in onn da studi a l'Univ. da Minca (1822-23), è el stà il 1823-53 emprim inschigner chant. dal Grischun. Sco tal ha el dirigì la construcziun dad impurtantas vias da pass (Güglia, Malögia, Bernina) e la reconstrucziun dad abitadis destruids da bovas (part nova da Favugn, a partir dal 1843) u d'incendis (part nova da Tusaun, a partir dal 1845). Il 1826 ha el projectà la correcziun dal Rain en la Tumleastga (exequida a partir dal 1832). Directur da la fortezza al Pass da S. Gliezi a partir dal 1831e sco tal responsabel per l'amplificaziun da quella. Confundatur da la Societad svizra dals inschigners ed architects 1837. Il 1839 ha el concepì ses emprim project per ina lingia da viafier sur il Pass dal Spleia. A partir dal 1845 ha L. alura concentrà ses plans per ina viafier tras las Alps sur il Lucmagn main aut. El è stà inschigner da la cumissiun da la Linth 1840-63 ed ha projectà l'emprima correcziun da las auas dal Giura 1840-42, realisada tr. il 1868 ed il 1891. El ha prendì part a la Guerra da la Lia separatista 1847 sco cumandant da las truppas da genia en il Tessin ed alura sco colonel fed. da genia. Il 1853 è el daventà directur tecnic da la Viafier dal sidost Rorschach-Cuira. Ils plans per realisar ina lingia da viafier da Flüelen a Mustér resp. da Cuira a Mustér e sur il Lucmagn, propagà dad el sco alternativa a la Viafier dal Gottard tr. il 1858 ed il 1871, n'han percunter betg gì success. </p> Archiv: Ovras: Funtaunas: Litteratura: Richard L., edì da M. Pieren, 2002; Richard L.: Bilder der Baukunst, 2006; D. Speich, Richard L. (1794-1883), en: Schweizer Pioniere der Wirtschaft und Technik 82, 2006, 59-66. Jürg Conzett  L'Orsa [Luortza, Lortza] La Nicca, Richard  © HLS: Tuts dretgs d’autur da questa publicaziun electronica èn tar il Historisches Lexikon der Schweiz, Berna. Per tut ils texts publitgads a moda electronica valan las medemas reglas sco per la publicaziun stampada. Redacziun LIS, Gerberngasse 39, Chaum postal 322, 3000 Berna 13, tel. +41 31 313 13 30, e-mail: