e-LIR / Lexicon Assistenza e-LIR Contact Publicaziun Sponsurs	Lexicon Istoric Retic (LIR) Lemma Rumantsch Deutsch Italiano Chavazzin   A  B  C  D  E  F  G  H I  J  K  L  M  N  O  P  Q  R  S  T  U  V  W  X  Y  Z  Buond Burkart, Walo  Buorm Vischnanca en la prov. da Sunder, cun aclas ed alps extendidas, tal. Bormio, tud. Worms (ant.). Lieu principal da la Vuclina superiura. Center da traffic cuntanschibel la stad da la Val Müstair sur l'Umbrail e dal Vnuost (Tirol dal Sid) sur il Stielva, durant l'entir onn da Livign sur il Pass da Fuscagn, dal Trentin sur il Pass dal Tonale, da la prov. da Brescha (Lumbardia) sur il Pass da Gavia e da Lai da Com sur la Vuclina. En il temp medieval cumpigliava B. era las vischnancas da Valfurva, Valdidentro e Livign (oz autonomas). Ils bogns da B. (<em>aquae Burmiae</em>) eran enconuschents gia en il temp rom. (Plinius il vegl) ed en il temp ostrogotic (Cassiodor, 535). Tr. il 10. ed il 13. tsch. ha B. cumbattì per l'autonomia com. en guerras privatas e cunter las revendicaziuns dals uvestgs da Com e da Cuira, represchentads dals pussants chastellans de Matsch. Incorporada en il domini da Com il 1377, ha la citadina da B. obtegnì privilegis impurtants cun la «»Magna charta della libertà bormiensi», confermads per gronda part dals Sforzas il 1450. <br />Grazia a sia impurtanta posiziun strategica ed a l'exclusivitad dals privilegis, ha la communitad vivì en il 14. e 15. tsch. ina perioda da gronda prosperitad. Enturn il 1400 disponiva B. da 32 turs e da 5'000 abitants ed era in lieu da deposit impurtant a la via commerziala tr. Vaniescha e la Germania. Il 1487 han ils Grischuns occupà B. ch'ha pers il monopol en il traffic da transit. Milaun ha concedì a las Trais Lias ils medems privilegis da dazi sco a B. La pestilenza e campagnas militaras han ultra da quai pegiurà la situaziun economica. Il 1512 è la citad da B. vegnida incorporada en furma da protecturat al domini da las Trais Lias. Il podestat grischun a B. n'aveva - cun excepziun da la licenza d'armas e dals monopols fiscals - nagins dretgs administrativs, ma sulettamain cumpetenzas giuridicas; el era il president da duas dretgiras dal contadi che sa basavan sin ils statuts da B. La Casa Pedranzini a B. mussa anc picturas da vopnas da las Trais Lias. Las sedutas publicas da la dretgira vegnivan convocadas sin il Kuèrc, ina plazza cuverta dal 12. tschientaner. En il 16. tsch. ha B. passentà in'ulteriura fluriziun economica. I regiva in traffic immens sin la Via imperiala (Via tudestga) che traversava la citad da B. Las minieras, la producziun da ponn, il commerzi cun vin da la Vuclina e sal dal Tirol e las grassas pastgiras alpinas han rendì B. ina da las regiuns las pli bainstantas da las Alps. La Val Fraele cun sias minieras, explotadas dapi il 12. tsch., era en il 16. tsch. ina vallada alpina fitg populada cun fundarias, cularias, in albiert, la baselgia da S. Giacomo (sfundrada en in lai da serra), ina via da sauma (Torre di Fraele, Passo delle Scale) ed ina duana. La plipart dals Grischuns e dals visitaders dals pajais vischins vegnivan a B. pervia da ses bogns chauds. Il 1558 è sa constituida qua ina pitschna pravenda evang., ed a la fin dal 16. tsch. han ins erigì ina baselgia ref. a B. La plipart dals protestants han pudì mitschar dal Murdraretsch en Vuclina (1620), div. famiglias èn emigradas en Val Müstair. La Guerra da trent'onns ed ils Scumbigls grischuns han manà devastaziuns e suffrientscha: il 1620 e 1621 han armadas spagn. ed imperialas sco era truppas grischunas occupà la citad da B., ed il 1635 ha il Duca de Rohan provocà ina guerra sanguinusa en las muntognas vuclinaisas. B. ha pers qua tras sia impurtanza economica. Il 1797 ha  la citad giavischà da restar cumpart dal Grischun, l'indecisiun dal suveran grischun ha dentant provocà la perdita da B. e sia annexiun a la Republica cisalpina. Il 1859 ha il cuss. naz. Andreas Rudolf de Planta cumprà ils Bagni nuovi da B. (construids il 1834-35) ch'el ha alura laschà engrondir e renovar (ils bogns èn ids pli tard ad ina societad tal.); el è era s'engaschà per l'amplificaziun da la via sur l'Umbrail (1867), ha procurà per servetschs postals privats sur il Stielva e da B. a Tiraun e per curs postals da Lecco sur Còlico a B. 1869 (sistids il 1873/76 per motivs finanzials).<br /><br /></p> Archiv: Ovras: Funtaunas: Litteratura: H. Balzer, Kulturgeschichtliches aus den ehemaligen bündnerischen Untertanenlanden, en: BM, 1938, 198-221; B. Credaro, Storia di Bormio, 1966; G. Peggion, G. Ramazzotti, Bormio, 1990. Martin Bundi  Buond Burkart, Walo  © HLS: Tuts dretgs d’autur da questa publicaziun electronica èn tar il Historisches Lexikon der Schweiz, Berna. Per tut ils texts publitgads a moda electronica valan las medemas reglas sco per la publicaziun stampada. Redacziun LIS, Gerberngasse 39, Chaum postal 322, 3000 Berna 13, tel. +41 31 313 13 30, e-mail: