e-LIR / Lexicon Assistenza e-LIR Contact Publicaziun Sponsurs	Lexicon Istoric Retic (LIR) Lemma Rumantsch Deutsch Italiano Chavazzin   A  B  C  D  E  F  G  H I  J  K  L  M  N  O  P  Q  R  S  T  U  V  W  X  Y  Z  Luck, Georg Peter Ludescher, Beat  Lucmagn, Pass dal Passadi alpin a 1918 m che collia la Val dal Blegn (TI) cun la Val Medel, situà a 20 km da Mustér ed a 19 da Luorscha. 1136 <em>Loco Magno</em>, ist. <em>Cuolm da S. Maria</em>. Frequentà già en il temp medieval tempriv, ha il L. gudagnà impurtanza en il temp autmedieval e medieval tardiv d'ina vart cun la politica da controlla dals pass alpins proseguida dals imperaturs germans ch'avevan extendì en il 12. e 13. tsch. per curtas periodas lur domini sin la Val dal Blegn, da l'autra vart cun l'intensificaziun dal traffic commerzial (prob. era quel dal muvel vers l'Italia dal Nord). En il temp medieval vegniva il L. utilisà savens da pelegrins. A partir dal 15. tsch. ha el pers sia impurtanza en favur dals pass dal Spleia, dal S. Bernardin e dal S. Gottard, servind mo pli al traffic local u sco ruta alternativa per la traversada da las Alps. En il temp autmedieval èn vegnids erigids ospizis cun chapluttas sin il L.: sin la spunda sid l'ospizi dals umiliads da Casatscha (menz. già il 1104, utilisà era sco susta) e quel da Camperio (menz. il 1254); sin la spunda nord ils ospizis da S. Gion, da S. Gagl (1261) e da S. Maria (erigì il 1374 tras l'avat da Mustér, restaurà il 1582 ed amplifitgà il 1928).<br />La claustra da Mustér, che possedeva grazia a donaziuns bains fin en Lumbardia, controllava la ruta sin la spunda nord dal L.; sin la spunda sid organisavan las <em>fagie </em>(unitads administrativas e fiscalas da la val) ed ils vischinadis il traffic e procuravan per il mantegniment da la via. Taxas da transit e da transport vegnivan incassadas lung la ruta. Il 1333 han la Val dal Blegn e Com signà in accord davart la segirezza da la via dal L.; il 1376 èn la Val dal Blegn e la Cadi sa garantidas vicendaivlamain il liber transit da las martganzias. En il temp medieval tardiv ha la claustra da Mustér impegnà als vischinadis da la Val dal Blegn e da la Leventina las pastgiras e las alps al L. ch'han anc oz ina tscherta impurtanza. En ils 1850 èn vegnids elavurads projects per la construcziun d'ina viafier sur il L., ma la Confed. ha optà il 1869 per la lingia dal Gottard. Pauc pli tard, il 1872, è vegnida inaugurada da la vart grischuna la nova via charrabla cun sias galarias pittorescas da Mompe Medel; quella da la vart tessinaisa è vegnida realisada il 1874-77. Il 1878 han ins instituì in servetsch da diligenzas (charrotschas da posta), ed il 1911 èn entrads en servetsch davart tessinaisa ils emprims autos postals, quai ch'ha favurisà l'arriv da turists. La via dal L. è alura vegnida amplifitgada e meglierada cun la construcziun da novs tschancuns (quel cun la galaria dal Scopì al nord e quel da Campra suenter Pian Segno al sid) en ils onns 1960-80. Per promover il turissem è il pass avert dapi il 2001 era durant la stagiun d'enviern.<br /><br /></p> Archiv: Ovras: Funtaunas: Litteratura: G. Bolla, Il valico del Lucomagno, 1929; Müller, Abtei Disentis, 28-32; B. Biucchi, Blenio, una valle ambrosiana nel Medioevo, 1981; I. Müller, Zum mittelalterlichen Lukmanierweg, en: BM, 1984, 155-61; L. Deplazes, Alpen, Grenzen, Pässe im Gebiet Lukmanier-Piora (13.-16. Jahrhundert), 1986; HS IX/1, 196-223; L. Condrau, Der Lukmanierpass, 1998; HbBG, 1 e 2; Richard La Nicca: Bilder der Baukunst, 2006. Sonia Fiorini  Luck, Georg Peter Ludescher, Beat  © HLS: Tuts dretgs d’autur da questa publicaziun electronica èn tar il Historisches Lexikon der Schweiz, Berna. Per tut ils texts publitgads a moda electronica valan las medemas reglas sco per la publicaziun stampada. Redacziun LIS, Gerberngasse 39, Chaum postal 322, 3000 Berna 13, tel. +41 31 313 13 30, e-mail: