e-LIR / Lexicon Assistenza e-LIR Contact Publicaziun Sponsurs	Lexicon Istoric Retic (LIR) Lemma Rumantsch Deutsch Italiano Chavazzin   A  B  C  D  E  F  G  H I  J  K  L  M  N  O  P  Q  R  S  T  U  V  W  X  Y  Z  Colurs politicas Comander, Johannes  Com Citad e chapitala da la provinza da C., situada al sidvest dal Lai da C. al cunfin svizzer-talian, tal. Como. 1429 1'801 fieus; 1593 ca. 13'000 abit.; 1792 15'517; 1800 12'695; 1850 18'325; 1900 37'260; 1950 70'413; 1980 96'297; 2000 82'943. Colonia rom., fundada sin territori gallic per defender ils pass alpins. En il 2. tsch. s.C. è C. daventà  in <em>municipium</em> ed in impurtant lieu da martgà. En il temp medieval tempriv ha la citad appartegnì als reginavels langobards e francons ed a l'Imperi german. En il 11. tsch. è sa constituida la vischnanca politica da C. La citad furmava in center economic, artisanal e commerzial (fiera da muvel da S. Abundi e da chavals a Chiasso), favurisà tras la Via Regina che colliava la Germania e l'Italia. D'impurtanza èn era stadas la fabricaziun da navs ed il sectur da construcziun. C. ha profità da sia posiziun per s'enritgir ed imponer dazis e pedagis lung las vias e sin il lai. Suenter l'intervenziun da las pussanzas estras - tr. las qualas ils Confederads - en Lumbardia, ha Carl V attribuì il 1555 la regiun als Habsburgs spagnols. Il 1583 ha il cardinal Tolomeo Gallio fundà a C., ch'era la citad tal. la pli vischina al cunfin cun las regiuns ref., il collegi cun il medem num, frequentà era da scolasts e students da la part taliana da la Confederaziun. Il 1713 èn ils Habsburgs austr. suandads als spagn., senza dentant midar la structura administrativa. Il protecziunissem austr. ha effectuà in svilup da l'industria da saida, el ha dentant era favurisà la cuntrabanda cun la Svizra ed il Grischun. A C., ch'era ina citad magari conservativa e fidela als reschims dominants, existivan dentant era gruppas dissidentas, preschentas gia a l'epoca da l'uschen. Risorgimento (19. tsch.), ma activas o.t. durant il faschissem (Comitato Antifascista Comasco) e favurisadas tras la vischinanza cun la Svizra che furmava in punct da colliaziun tr. las organisaziuns democraticas europeicas ed in pajais da refugi per ils adversaris dals divers reschims politics. <br /> <br /> L'uvestgieu da C. è integrà en l'archidiocesa da Milaun. A quel han appartegnì da vegl ennà las plaivs dal Puschlav, da la Vuclina e dals contadis da Buorm e Clavenna. En il Puschlav possedeva l'uvestgieu da Cuira dretgs feudals (seculars), ma nagins dretgs da domini ecclesiastics. Il 1853 han pretendì intgins Pus'ciavins (Prospero Albrici e.a.) la separaziun. Suenter ch'il Cussegl fed. ha scumandà il 1853 giurisdicziuns exteriuras sin territori svizzer, èn vegnidas integradas las plaivs dal Puschlav uffizialmain en l'uvestgieu da Cuira ils 26-3-1871.<br /> </p> Archiv: Ovras: Funtaunas: Litteratura: V. Gosatti, Storia della separazione di Poschiavo e Brusio della diocesi di Como [...], en: QGI, 48/1979, 197-213, 255-83; M. Gianoncelli, Como e il suo territorio, 1982; F. Cani, G. Monizza, Como e la sua storia, 1993-94. Marco Dubini  Colurs politicas Comander, Johannes  © HLS: Tuts dretgs d’autur da questa publicaziun electronica èn tar il Historisches Lexikon der Schweiz, Berna. Per tut ils texts publitgads a moda electronica valan las medemas reglas sco per la publicaziun stampada. Redacziun LIS, Gerberngasse 39, Chaum postal 322, 3000 Berna 13, tel. +41 31 313 13 30, e-mail: