e-LIR / Lexicon Assistenza e-LIR Contact Publicaziun Sponsurs	Lexicon Istoric Retic (LIR) Lemma Rumantsch Deutsch Italiano Chavazzin   A  B  C  D  E  F  G  H I  J  K  L  M  N  O  P  Q  R  S  T  U  V  W  X  Y  Z  Crap Alv Crap Taglieu  Crap Sogn Barcazi Fortezza sin in grip tr. Trin e Trin-Mulin. Exchavaziuns exequidas tr. il 1931 ed il 1936 han purtà a la glisch ils fundaments dal cumplex. In mir da tschinta suandava l'ur dal grip e circumdava in areal sacral (baselgia ed annexa), in palazi fortifitgà ed ina tur imposanta. Al sid ed al sidost da la fortezza sa chattavan ulteriurs edifizis. Tenor inqual publicaziun è la baselgia da S. Barcazi vegnida erigida tr. il temp meroving tardiv ed il temp carolingic, ma prob. è ella pli giuvna. Edifizis anteriurs èn pussaivels, ma betg cumprovads. La tur datescha dal 12. tsch., entant ch'il palazi fortifitgà a l'ur nord da l'areal appartegna als edifizis construids enturn il 1300 ed era abità, tenor chats pli pitschens (quadrels da pigna), fin viaden il 15. tschientaner. Ina cisterna radunda cun filter, realisada al vest da l'areal, furniva l'aua da baiver als avdants dal chastè. A chaschun da las lavurs d'exchavaziun dal 1936 han ins segirà sulettamain ils fundaments da la baselgia. Il rest da la miraglia è scrudà ed è per part creschì en. Tenor Poeschel era il C. oriundamain in chastè cun baselgia, transfurmà vers la fin dal 12. tsch. en in chastè feudal ed amplifitgà enturn il 1300 cun in palazi fortifitgà. La fortezza è identica cun il chastè da Hohentrins, il center dal signuradi da Trin. Ses origins n'èn betg clers; ils fundaturs dal signuradi da Trin pudessan esser stads ils de Sagogn-Wildenberg, essend ch'il signuradi cumpara sco possess dals conts de Werdenberg dapi il 1324. L'implant ha midà pliras giadas possessur. Suenter la mort da l'ultim cont de Werdenberg (1428), è il chastè passà als baruns de Hewen, attestads dapi il 1452 sco possessurs dal signuradi da Hohentrins. Menziunads èn differents chastellans dal signuradi. Il 1470 è il chastè daventà la victima d'in grond incendi ed è restà dapi alura ina ruina. La Fundaziun C. s'engascha per il mantegniment da la ruina.<br /><br /></p> Archiv: Ovras: Funtaunas: Litteratura: Poeschel, Burgenbuch, 227; Clavadetscher/Meyer, Burgenbuch, 186-88; M.P. Schindler, Auf dem Ochsenberg in Wartau stand kein Kirchenkastell, en: Werdenberger Jahrbuch, 7/1994, 88-107; LQ, 20-8-2007. Maria-Letizia Boscardin  Crap Alv Crap Taglieu  © HLS: Tuts dretgs d’autur da questa publicaziun electronica èn tar il Historisches Lexikon der Schweiz, Berna. Per tut ils texts publitgads a moda electronica valan las medemas reglas sco per la publicaziun stampada. Redacziun LIS, Gerberngasse 39, Chaum postal 322, 3000 Berna 13, tel. +41 31 313 13 30, e-mail: