e-LIR / Lexicon Assistenza e-LIR Contact Publicaziun Sponsurs	Lexicon Istoric Retic (LIR) Lemma Rumantsch Deutsch Italiano Chavazzin   A  B  C  D  E  F  G  H I  J  K  L  M  N  O  P  Q  R  S  T  U  V  W  X  Y  Z  Ospitals Ostagis  Ospizis En il  temp medieval albierts per passants esters, ma era per povers e malsauns. Il term è collià cun <em>hospitale </em>en il senn dal posteriur ospital. En il temp medieval tempriv cumpara per quest gener d'albiert il pled <em>xenodochium </em>(dal grec per chasa d'esters). L'onn 823 ha communitgà l'uv. Victor III a l'imp. Ludwig il Pietus che las chasas da povers (<em>senodochium susceptiones</em>) da sia diocesa sajan destruidas. L'onn 825 ha l'imperatur restituì a l'uvestg in <em>senodochium sancti Petri</em> betg localisà. Il 1070 è menz. in <em>hospital </em>a S. Martin en la citad da Cuira che vegniva manà d'in spiritual en la maniera dals vegls xenodochiums e che suttasteva sco institut autonom directamain a l'uvestg. Attestads èn alura en la Currezia ils suandants ospizis: ca. l'onn 1000 in <em>hospitale</em>/<em>ospicium </em>da S. Peder sin il Set, il pli vegl ospizi da pass enconuschent en il Grischun; il 1125 in <em>magister hospitalis</em> (administratur d'ospital) tar la claustra da Faveras; il 1136 in <em>ospicium </em>al sid dal Lucmagn tar la baselgia da San Sepolcro a Casatscha; il 1196 in <em>hospital </em>tar la claustra da Mariamunt a Barbusch en il Vnuost. Enturn il 1200 èn vegnids fundads l'ospizi da la claustra da Mustér al nord dal Lucmagn, consecrà a s. Gagl, e l'ospizi autonom cun chaplutta a Chapella en vischinanza da S-chanf, deditgà als ss. Niclà ed Ulrich; il 1210 è doc. in ospizi tar la claustra da Curvalda ed il 1233 in tal a Silva Plana sin territori da l'anteriur vischnanca da Sta. Maria en Val Müstair, destinà explicitamain a la recepziun da glieud povra ed a la consolaziun dals viandants arrivads sur las Alps crivas. En connex cun las cruschadas e la derasaziun da l'Urden dals johannits èn vegnids fundads en il 13. tsch. divers novs ospizis sco veritabels albierts per pelegrins. Uschia è naschì il 1218 in ospital dals johannits a Feldkirch), il 1219 il convent collegiat da S. Gion a San Vittore, il 1228 l'ospital dals johannits a Laad en il Vnuost ed il 1259 in ospital dals johannits a Tuer a l'entrada en la Val Müstair; in ospizi dals johannits a Soazza para d'esser stà ina filiala da San Vittore. Il 1252 è doc. in <em>xenodochium </em>al nord d'ina insla dal Rain, nua che Heinrich de Razén a sigillà cun represchentants da Clavenna; i sa tractava prob. d'in ospizi affilià da S. Gieri a Razén. Il 1258 è cumprovà l'ospital a S. Romerio en vischinanza da Brüsch, manà da fraters laics tenor las reglas da s. Augustin. In ospizi da S. Giachen a Claustra è enconuschent dapi il 1319, in auter deditgà a S. Gaudenzio a Casaccia dapi il 1336. Dal 1374 datescha l'ospizi da S. Maria sin il Pass dal Lucmagn (numnà era Cuolm da S. Maria). Il 1467 ha la vischnanca da Mesocco decidì d'eriger in ospizi sin il Pass dal S. Bernardin. A Zernez è attestà il 1528 in ospital per malsauns esters e passants che sa chattava prob. tar la chaplutta da S. Antoni. Il 1709 finalmain han ils chaputschins a Müstair erigì qua l'ospizi Chastè per agen diever. <br /> Il term <em>xenodochium </em>cumpara il 1551 ed il 1615 mo pli per l'ospizi da Chapella/S-chanf che vegniva designà a medem temp sco <em>hospitale </em>per povers e che disponiva d'in vast possess da terren e da grondas entradas. Div. ospizis dal temp medieval han contribuì fermamain a la colonisaziun e cultivaziun dal terren ed a la tgira da las culturas champestras. <br /> La plipart dals gronds refugis cun stallas che sa chattan sin div. pass e che vegnan designads sco ospizis dateschan dal 19. tschientaner. Il 1856 han las vischnancas da Susch e da Tavau erigì in nov refugi sin il Flüela, ed il 1864 han ils frars Ragazzi da Poschiavo laschà construir l'odiern hotel Bernina-Hospiz en vischinanza dal pass. Ils ospizis stattan a l'origin dals ospitals (<elirlink href="aid:2788">Sanitad</elirlink>).</p> Archiv: Ovras: Funtaunas: BUB 1-3. Litteratura: J.G. Meyer, Die Hospize und Spitäler Graubündens im Mittelalter, en: BM, 1949, 18-29; Schnyder, Handel und Verkehr; A. Melchior, Bündner Hospize, en: TG, 1985, nr 6, 35-39. Martin Bundi  Ospitals Ostagis  © HLS: Tuts dretgs d’autur da questa publicaziun electronica èn tar il Historisches Lexikon der Schweiz, Berna. Per tut ils texts publitgads a moda electronica valan las medemas reglas sco per la publicaziun stampada. Redacziun LIS, Gerberngasse 39, Chaum postal 322, 3000 Berna 13, tel. +41 31 313 13 30, e-mail: