e-LIR / Lexicon Assistenza e-LIR Contact Publicaziun Sponsurs	Lexicon Istoric Retic (LIR) Lemma Rumantsch Deutsch Italiano Chavazzin   A  B  C  D  E  F  G  H I  J  K  L  M  N  O  P  Q  R  S  T  U  V  W  X  Y  Z  Planta, von Plantair  Plantahof Anteriura scola da purs. Avertura uffiziala sut il num Plantahof il 1896, dapi il 2000 Center da furmaziun e cussegliaziun agricula (CFCA). Il 1811 ha Thomas Lareda da Preaz, pastizier a S. Petersburg, cumprà l'areal da la Schnideri Bündt e laschà eriger sin quel l'uschen. Russhof. Quest "bain dal Russ", che furmava a sias uras in'enclava da Zezras, è passà il 1913 ad Eigias-Landquart. Lareda aveva schlargià l'areal dal Russhof dad 1,7 sin 16,6 ha cun cumprar e colmatar terrens umids a la riva da la Landquart. El aveva alura transfurmà quel en in bain puril cun ina resgia e cun implants industrials (palpiri, maschinas, tievlas). Sia idea da far dal manaschi tras testament ina Fundaziun Thomas per orfans ed uffants paupers ha fatg, per motivs finanzials, naufragi. Il 1-10-1886, suenter pliras midadas da maun, ha Rudolf Alexander von Planta cumprà il cumplex ed amplifitgà quel per ca. 60 ha (o.t. pastgiras d'alp a Parpan ed a Vaz Sura). El ha alura erigì sin quel in bain da model per l'allevament da muvel e da chavals. Avant sia mort prematura ha el testamentà il bain cun tut ils terrens al chantun Grischun, cun la cundiziun da cuntinuar cun l'allevament da la razza brina e da transfurmar il Russhof en ina scola agricula. Il num è alura vegnì midà en sia onur en Plantahof. Il 1896 ha la scola d'agricultura odierna chattà alloschi en la part occidentala da l'edifizi principal. Ins ha dapi alura adina puspè adattà e renovà il bain, amplifitgà il manaschi ad actualmain 89 ha e schlargià la purschida d'instrucziun. Ultra da la scola purila, examens da maister (dapi il 1945) ed examens professiunals (dapi il 1946) cumpiglia il Plantahof dapi il 1992 ina classa da furmaziun supplementara, in curs da commerzi, turissem ed administraziun e, dapi il 1993, la Scola media professiunala agrotecnica. Al CFCA èn affiliads 91 manaschis d'emprendissadi domiciliads en ils chantuns Glaruna e Grischun. Quest center admetta, a basa d'in concordat, era scolaras e scolars dad auters chantuns (2006 ca. 20%) ed offra ina paletta da 15 curs agriculs specifics, tr.a. en ils secturs da la pumicultura e viticultura, dal marketing e da l'economia d'alp. Per l'emprim curs d'enviern 1896/97 eran s'inscrits a la scola da purs 29 scolars, il 1945/46 101. La part da scolars dal chantun Grischun era fitg gronda, ma la distribuziun regiunala variada. 28 vischnancas n'han betg tramess scolars al Plantahof tr. il 1896 ed il 1946, da gronds contingents disponivan percunter Poschiavo (135 scolars), Cuira (116), Breil (89), Tavau (80), Claustra (65) e Maiavilla (55). Il 2005 ha il CFCA indroducì ina classa d'attest, ed il 2006 ha la scola d'enviern fatg plazza ad ina scola professiunala da quatter quartals (<elirlink href="aid:3581">Scolas da purs e puras</elirlink>).</p> Archiv: Ovras: Funtaunas: Litteratura: H. Cresta, Das landwirtschaftliche Bildungswesen im Kanton Graubünden in seiner Entwicklung bis zur Gegenwart, 1947; Landwirtschaftliche Schule P. 1896-1996, 1996; HbBG 3, 56 s. Adolf Collenberg  Planta, von Plantair  © HLS: Tuts dretgs d’autur da questa publicaziun electronica èn tar il Historisches Lexikon der Schweiz, Berna. Per tut ils texts publitgads a moda electronica valan las medemas reglas sco per la publicaziun stampada. Redacziun LIS, Gerberngasse 39, Chaum postal 322, 3000 Berna 13, tel. +41 31 313 13 30, e-mail: