e-LIR / Lexicon Assistenza e-LIR Contact Publicaziun Sponsurs	Lexicon Istoric Retic (LIR) Lemma Rumantsch Deutsch Italiano Chavazzin   A  B  C  D  E  F  G  H I  J  K  L  M  N  O  P  Q  R  S  T  U  V  W  X  Y  Z  Currezia Currier d'uiara  Currier Avant il 1800 n'existiva nagin servetsch postal regular per las vals lateralas Avras, Lumnezia, Tujetsch, Medel, Scanvetg e Val Müstair. Ils vischinadis a las transversalas percunter profitavan da l'infrastructura dal traffic da transit. Il regal da posta appartegneva als cumins. En consequenza existivan numerus urdens da taxa ed ultra da quai anc in grond dischurden che provocava reclamaziuns senza fin da vart da la clientella. L'unificaziun da las taxas imponida dal Chantun il 1813 ha pudì vegnir realisada mo malamain. Il 1826 èn vegnids suttamess ils curriers a l'Uffizi chant. da posta. A partir da quel mument ha la direcziun da la posta dictà ils curs. Il currier da l'Engiadin'Ota gieva ina giada fin il 1831, alura duas giadas l'emna a pe sur l'Alvra fin a Cuira, a partir dal 1844, cun manadira, ina giada l'emna sur l'Alvra e trais giadas sur il Güglia (plirs curriers). A partir dal 1803 vegniva offert mintg'emna in, suenter il 1846 dus curs supplementars da Samedan a Tiraun. Il currier da l'Engiadina Bassa purtava la posta a S-chanf, nua ch'el surdava ella al currier da l'Engiadin'Ota (fin il 1833). Dapi il 1843 circulava in curs emnil tr. l'Engiadina Bassa e Danuder. Il currier da la Val Müstair transportava dapi il 1821 ina giada l'emna la posta a S-chanf e surdava quella là al currier da l'Engiadin'Ota. Il currier da la Bergiaglia absolveva mintg'emna in, suenter il 1846 dus viadis tr. Clavenna e Samedan. Il currier dal cumin da la Cadi transportava (prob. da vegl ennà), ultra da la posta uffiziala dal cumin, era posta da privats tr. Cuira e la Cadi (1754-1841 ina giada l'emna, dapi ca. 1800 cun chavals da sauma, suenter il 1823 cun char e chaval). El appartegneva sco currier (istoric: leifer) al stab da persunal dal cumin. Il 1832 ha Glion engaschà in segund currier. A partir dal 1846 vegnivan offerts tr. Cuira e Glion trais curs l'emna durant la stad e dus durant l'enviern; dal 1841-50 circulava in tal l'entir onn duas giadas l'emna tr. Glion e Mustér. Il 1846 è vegnì avert il curs da Cuira a Punt Martina. Il vegl currier da Tavau repartiva la posta tr. Cuira e Tavau ed in nov currier dal Flüela transportava quella da là davent fin a Susch e la surdava al currier da l'Engiadina Bassa. La qualitad dals servetschs postals (transports da posta e da persunas) è s'augmentada pir cun il monopol da manaschi ed administraziun da la Confed. (1849). Quai è stà da grond'impurtanza per il svilup dal turissem (<elirlink href="aid:2140">Posta</elirlink>; <elirlink href="aid:1380">Lindau</elirlink>).</p> Archiv: Ovras: Funtaunas: Litteratura: J. Lenggenhager, Beitrag zur Verkehrsgeschichte Graubündens: mit besonderer Berücksichtigung des Postwesens, 1911, 463-506; G. Gadola, Il pot de cumin, en: Il Glogn 12/1938, 29-45; J. Gartmann, Die Pferdepost in Graubünden, 1985. Adolf Collenberg  Currezia Currier d'uiara  © HLS: Tuts dretgs d’autur da questa publicaziun electronica èn tar il Historisches Lexikon der Schweiz, Berna. Per tut ils texts publitgads a moda electronica valan las medemas reglas sco per la publicaziun stampada. Redacziun LIS, Gerberngasse 39, Chaum postal 322, 3000 Berna 13, tel. +41 31 313 13 30, e-mail: