e-LIR / Lexicon Assistenza e-LIR Contact Publicaziun Sponsurs	Lexicon Istoric Retic (LIR) Lemma Rumantsch Deutsch Italiano Chavazzin   A  B  C  D  E  F  G  H I  J  K  L  M  N  O  P  Q  R  S  T  U  V  W  X  Y  Z  Schlumpf, Eveline Schmid, Abraham  Schlumpf, Leon * 3-2-1925 a Favugn, ref., da Mönchaltorf/ZH e burgais d'onur da Favugn (1964). Figl da Jakob, commerziant, e da Magdalena n. Brunold. &#8734; 1953 Trudi (Gertrud) n. Rupp, da Trin. Scola chant. a Cuira, studi da giurisprudenza a Turitg, dr.iur. 1951. Il medem onn ha el avert ses biro d'advocatura a Cuira. Comm. dal Cussegl grond per ils democrats 1955-65 (pres. 1964), mastral dal cirquit da Trin 1959-63. Cuss. guv. 1966-74 (Dep. da l'intern e da l'economia publica), sco tal ferm engaschament per l'equiliber social (tr.a. agid als purs da muntogna, perequaziun finanziala). Cuss. naz. 1967-74, comm. dal cussegl dals chantuns 1974-79. S. ha fatg part da div. cumissiuns impurtantas, tr.a. da quella d'experts per la revisiun totala da la Const. federala. En ils onns 1974-78 è el era stà survegliader fed. dals pretschs. El vala sco in dals architects da la fundaziun da la PPS (1971). Il 1979 è S. vegnì elegì en l'emprim scrutini en il Cussegl fed. ed ha surpiglià il Dep. da traffic ed economia d'energia. En la dumonda da la promoziun da l'energia nucleara sco alternativa a l'ieli ha il suveran refusà ad el il sustegn en la votaziun davart il nov artitgel d'energia (1983). En la politica da traffic ha "il bab dal tunnel dal Veraina" proseguì cun la Viafier 2000 la finamira da render la viafier cumpetitiva en confrunt cun la via, senza negliger l'amplificaziun da la rait da las vias naziunalas. La politica da traffic skizzada da S. è vegnida sbittada en ina votaziun dal pievel sut ses successur Adolf Ogi. Suenter il cumbat invan cunter emetturs privats illegals (Radio 24 e.a.) ha el stgaffì il 1984 cun l'artitgel da radio e televisiun il fundament per ina convivenza da la SSR ed ils mediums electronics privats. Il 1987 è S., qualifitgà sco um pragmatic solid cun sguard prospectiv, sa retratg nunspetgadamain da la politica. Cun excepziun dal presidi da la Pro Infirmis n'ha el betg pli surpiglià incumbensas publicas. Sut il pseudonim Rätus Telena era il giuven S. in enconuschent interpret da musica populara. </p> Archiv: Ovras: Preisüberwachung 1973-1978, 1979; Der Preisüberwacher hält Rückschau, en: BJb, 1980, 1-10; Medien, Energie, Verkehr, 1988; Reminiszenzen, 1997. Funtaunas: Litteratura: Leon S., 1984; Die Schweizer Bundesräte, edì dad U. Altermatt, 1991, 575-80; SO, 3-2-2005. Adolf Collenberg  Schlumpf, Eveline Schmid, Abraham  © HLS: Tuts dretgs d’autur da questa publicaziun electronica èn tar il Historisches Lexikon der Schweiz, Berna. Per tut ils texts publitgads a moda electronica valan las medemas reglas sco per la publicaziun stampada. Redacziun LIS, Gerberngasse 39, Chaum postal 322, 3000 Berna 13, tel. +41 31 313 13 30, e-mail: