e-LIR / Lexicon
Assistenza e-LIR
Contact
Publicaziun
Sponsurs
|
Lexicon Istoric Retic (LIR)
A B C D E F G H I J K L M N O P Q R S T U V W X Y Z
Santa Maria en Val Müstair
Anteriura vischnanca polit., cirq. Val Müstair, distr. En, situada al spartavias per il Pass da l'Umbrail. Fusiunada il 2009 cun <elirlink href="aid:1139">Fuldera</elirlink>, <elirlink href="aid:1386">Lü</elirlink>, <elirlink href="aid:1957">Müstair</elirlink>, <elirlink href="aid:2952">Tschierv</elirlink> e <elirlink href="aid:2991">Valchava</elirlink> a la vischnanca polit. da Val Müstair. A l'anteriur abitadi, construì en furma da crusch, appartegnan las culegnas autas da Craistas, Büglios e Pütschai sco era l'aclaun da Sielva cun l'ospital cirquital. 1850 437 abit.; 1900 385; 1950 420; 2000 327. En il temp autmedieval èn naschids emprims bains a S., erigids sin iniziativa da la claustra da Müstair e tras urbarisaziuns exequidas da glieud libra. Enturn il 1167/70 è doc. la chaplutta da <em> Sancte Mariae in Silvaplana</em>, a la quala regorda il num odiern Sielva. La chaplutta episcopala è ida tras donaziun a la claustra da Müstair ed era ina giada ina renumada destinaziun da pelegrinadi. En il 13. tsch. existiva a S. in pitschen convent da canonis ed in ospizi. A la fin dal 15. tsch. è daventada la vischnanca da S. in'atgna pravenda. Grazia a la posiziun favuraivla al spartavias per l'Umbrail ed al passadi en la Val Fraele (tal. Valle di Fraéle) è ella daventada il lieu principal da la val. Durant la Battaglia a la Chalavaina (1499) ed ils Scumbigls grischuns (1621-22) è il vitg vegnì destruì, il 1630 è sa derasada la pestilenza ed il 1764 è arsa giu ina part da S.; l'incendiari culpaivel è vegnì executà. Dal 1799-1800 è S. vegnida implitgada en las campagnas dals Austriacs e Franzos. Da l'occupaziun dals cunfins dal 1914-18 existan anc numerus fastizs sin il Pass da l'Umbrail. La refurmaziun è vegnida introducida a S. tr. il 1526 ed il 1530. La baselgia gotic-tardiva dal 1492 ha servì durant in lung temp ad omaduas confessiuns. Suenter la mort da la davosa persuna cat. a S. il 1837 (ina dunna), è il maletg da l'altar deditgà a s. Maria vegnì purtà en ina processiun solenna en la claustra da Müstair. Il 1762 è la vischnanca sa cumprada libra dal domini temporar austriac. Ina vischnanca en il senn modern è daventada S. il 1854. L'agricultura gioga anc a l'entsch. dal 21. tsch. ina rolla impurtanta. Intgins manaschis industrials (tr.a. ina garascha ed ina stiva da taisser) sco era in turissem moderà (plirs hotels, restaurants e butias), il qual è sa sviluppà en la vischinanza dal Parc Naziunal e dal territori da skis da stad al Pass dal Stielva, offran ulteriuras pussaivladads da gudogn. Part da la populaziun da lingua rum.: 2000 69,7 %/81,7% (ML/Lindic). </p>
Archiv:
Ovras:
Funtaunas:
Litteratura:
C. Gustin, Santa Maria, 1982.
Paul Eugen Grimm
© HLS: Tuts dretgs d’autur da questa publicaziun electronica èn tar
il Historisches Lexikon der Schweiz, Berna. Per tut ils texts publitgads a moda
electronica valan las medemas reglas sco per la publicaziun stampada.
| |
|
Redacziun LIS, Gerberngasse 39, Chaum postal 322, 3000 Berna 13, tel. +41 31 313 13 30, e-mail:
|
|
Santa Maria en Calanca