e-LIR / Lexicon
Assistenza e-LIR
Contact
Publicaziun
Sponsurs
|
Lexicon Istoric Retic (LIR)
A B C D E F G H I J K L M N O P Q R S T U V W X Y Z
Son Nicolai
Anteriura claustra a Cuira, erigida tr. il 1280 ed il 1299. Penultima claustra da dominicans fundada en Svizra, translocada suenter il 1280 d'ordaifer a l'intern da la citad. Consecraziun dal chor da l'edifizi nov il 1299. Fluriziun en il 14. tsch., decadenza interna en il 15. tschientaner. A partir dal 14. tsch. ha existì ina confraternitad da S., a partir dal 1483 ina tala per commerziants esters. Suenter la refurmaziun da Cuira, ha secularisà la LCD il 1538 ils bains, cun excepziun da l'edifizi claustral e da la baselgia. Il 1539 ha ella fundà là ina scola da latin che ha existì dal 1539 fin il 1574 (incendi) e dal 1577 fin il 1624, in'ovra da piunier en l'istorgia da la scola grischuna. Il 1624 è la claustra vegnida restituida (Contract da Lindau dal 1622), e la baselgia è vegnida restaurada (fin il 1640). Il 1654 han ins schlià il convent. La baselgia è alura vegnida utilisada tr.a. sco arsenal e magazin da victualias. Il 1685 ha cumprà la citad da Cuira la claustra ed ha avert là il 1687 ina scola per mattas, il 1710 ina scola da musica. Dal 1699-1843 ha S. alloschà il Collegium Philosophicum, fundà da Johann Abys, dal 1811-50 la Scola chant. evangelica. En il nov tract oriental èn vegnids installads il Seminari scolastic (1850-64) e l'uschen. Musterschule (1885-92 e 1899-1902). S. serva actualmain da chasa da scola a la citad da Cuira.<br /><br /></p>
Archiv:
Ovras:
Funtaunas:
Litteratura:
Kdm GR 7, 275-82; C. Simonett, Geschichte der Stadt Chur 1, 1976; H. Seifert, Ehemaliges Dominikaner-Kloster St. Nikolai, en: Jber ADG DPG, 1997, 13-19; U. Jecklin, B. Keller, Der Knillenburger Prospekt, en: BM, 2000, 334-55.
Adolf Collenberg
© HLS: Tuts dretgs d’autur da questa publicaziun electronica èn tar
il Historisches Lexikon der Schweiz, Berna. Per tut ils texts publitgads a moda
electronica valan las medemas reglas sco per la publicaziun stampada.
| |
|
Redacziun LIS, Gerberngasse 39, Chaum postal 322, 3000 Berna 13, tel. +41 31 313 13 30, e-mail:
|
|
Son Martin