e-LIR / Lexicon Assistenza e-LIR Contact Publicaziun Sponsurs	Lexicon Istoric Retic (LIR) Lemma Rumantsch Deutsch Italiano Chavazzin   A  B  C  D  E  F  G  H I  J  K  L  M  N  O  P  Q  R  S  T  U  V  W  X  Y  Z  Renaschientscha Renesse, Camille Frédéric de  Renaschientscha retorumantscha Cun la <elirlink href="aid:2764">Refurmaziun</elirlink> e l'entsch. da la Refurma cat. en il 16. tsch. è daventà il rumantsch lingua da scrittira en pliras variantas. Las Baselgias en cumbat per la vardad religiusa pretendevan dals cartents bunas enconuschientschas da la <elirlink href="aid:753">Bibla</elirlink>. Uschia è la lingua rum. vegnida amplifitgada ed enritgida, sco quai che la litteratura religiusa, apologetica e spirituala ordvart ritga dal baroc fin a la fin dal 18. tsch. cumprova (<elirlink href="aid:770">Catechissem,</elirlink> <elirlink href="aid:1119">Gieus sacrals</elirlink>). Ina digren è sa manifestada pir cun l'Illuminissem che propagava l'orientaziun vers il terrester. La secularisaziun, iniziada suenter la Revoluziun franz., ha midà radicalmain la structura da la societad europeica. Progress ed interess per il bainstar gen. pretendan ina scola obligatorica per ils giuvens, organisaziuns publicas ed ina pressa per ils creschids. La scola, l'agricultura, il traffic, il commerzi ed il turissem han stuì vegnir sviluppads resp. meglierads en il Grischun. Las innovaziuns clamavan era in auter linguatg. I mancava a la Rumantschia la litteratura che correspundeva al spiert progressiv dal temp. Ins è sa gidà l'emprim cun translaziuns, per ordinari dal tudestg. Ma quai na bastava a la lunga betg per mantegnair la lingua, tant pli ch'ils aderents dal progress eran per part era profets da la mort imminenta dal rumantsch, giuditgà da blers sco in impediment sin la via dal progress ch'empermetteva paun e gudogn en las vals grischunas empè da l'emigraziun. Il rumantsch era pli e pli periclità, ma ina vieuta nunspetgada ha salvà el da la mort prematura. Gia il 1776 aveva Joseph Planta, bibliotecari a Londra, publitgà sia «Geschichte der romanischen Sprache» (engl.). En lur exil a Puntina (1799) han Placi a Spescha e Mattli Conrad discutà la situaziun dal rumantsch. Conrad, intimà da Wilhelm von Humboldt, ha publitgà ses vocabulari (1823). Linguists europeics èn s'interessads per il rumantsch, ed ils Rumantschs han cumenzà a rimnar litteratura veglia ed a far vocabularis: Mattli Conrad, Baseli Carigiet, Otto Carisch, Zaccaria Pallioppi ed auters. Caspar Decurtins ha rimnà gia da gimnasiast a Cuira ditgas e paraulas rum. e publitgà tr. il 1887 ed il 1916 la «<elirlink href="aid:822">Crestomazia retorumantscha</elirlink>». En il davos terz dal 19. tsch. è naschida la belletristica originala rum. en prosa, lirica e dramatica (<elirlink href="aid:1443">Litteratura rumantscha</elirlink>) che vuleva satisfar als basegns da la scola, da la pressa e dal pievel: Gion Antoni Bühler, Gion Antoni Huonder, Giacun Hasper Muoth, Giachen Michel Nay, Giovannes Mathis, Schimun Vonmoos, Balser Puorger, Peider Lansel, Zaccaria Pallioppi, Giatgen Mitgel Uffer, Alexander Lozza. <br />La renaschientscha è sa fatga valair a partir da l'onn 1863 era cun las tentativas da fundar ina <elirlink href="aid:2826">Societad Retorumantscha</elirlink> e cun il success da las «<elirlink href="aid:715">Annalas</elirlink>» sco organ public litterar, publitgadas dapi il 1886. Gion Antoni Bühler ha fatg in'emprima emprova pratica da fusiunar ils idioms rum. en ina lingua da scrittira cuminaivla (<elirlink href="aid:2785">Rumantsch grischun</elirlink>) ed ha publitgà litteratura en quella varianta en ses «Novellist». Enturn il 1900 èn naschidas las uniuns regiunalas <elirlink href="aid:2783">Romania</elirlink> ed <elirlink href="aid:2885">Uniun dals Grischs</elirlink>, e dus decennis pli tard la <elirlink href="aid:2768">Renania</elirlink> e l'<elirlink href="aid:2896">Uniun rumantscha da Surmeir</elirlink> che vulan cultivar, mintgina en ses territori, l'agen idiom, stgaffind perquai agens organs. Il 1919 han obtegnì questas uniuns cun la <elirlink href="aid:1436">Lia Rumantscha</elirlink> (LR) in'organisaziun da tetg che surpiglia incaricas che surpassan las forzas da las uniuns regiunalas, p.ex. l'ediziun da vocabularis, grammaticas, cudeschs da chant e litteratura da giuvenils. La LR represchenta e defenda la Rumantschia era vers l'exteriur - da gronda muntada durant l'<elirlink href="aid:1410">Irredentissem</elirlink> tal. dals onns 1920. Ils irredentists na vesevan en ils idioms rum. nagut auter che dialects tal. e quintavan a la lunga era da conquistar il territori. Cun forzas unidas da la Rumantschia e da la Svizra sensibilisada èsi reussì il 1938 da francar il rumantsch sco lingua naz. en la Const. federala. Ils 10 da mars 1996 ha il pievel svizzer renconuschì il rumantsch sco lingua semi-uffiziala. Il 1946 èn vegnidas fundadas l'Uniun da scripturs rum. (<elirlink href="aid:2882">Uniun da scripturas e scripturs rumantschs</elirlink>, oz Uniun per la litteratura rumantscha) e la Pro Radio Rumantsch (<elirlink href="aid:3638">Radio e televisiun)</elirlink>. La Societad Retorumantscha s'occupa dapi il 1885 da la perscrutaziun linguistica ed edescha il «<elirlink href="aid:1053">Dicziunari Rumantsch Grischun</elirlink>», entant che la LR e las uniuns regiunalas furman il center da l'acziun rumantscha. Il 1991 è vegnida fundada la <elirlink href="aid:1122">Giuventetgna Rumantscha</elirlink> (GiuRu) che reunescha sut in tetg la giuventetgna. Ordaifer il Grischun s'engaschan l'Uniun da las Rumantschas e dals Rumantschs en la Bassa (URB) e la Quarta Lingua per il mantegniment dal rumantsch en la diaspora.<br /><br /><br /></p> Archiv: Ovras: Funtaunas: Litteratura: P. Fink, Niedergang und Wiederaufstieg des Rätoromanischen, 1946; K. Huber, Der italienische Irredentismus gegen die Schweiz (1870-1925), 1953; H. Derungs-Brücker, Rätoromanische Renaissance, lic. Friburg, 1974; H. Derungs-Brücker, Renaschientscha retoromontscha 1919-1938, en: Annalas, 100/1987, 247-69; Deplazes, Funtaunas 3; Deplazes, Die Rätoromanen; A. Decurtins, Das Rätoromanische und die Sprachforschung, 1993. Gion Deplazes  Renaschientscha Renesse, Camille Frédéric de  © HLS: Tuts dretgs d’autur da questa publicaziun electronica èn tar il Historisches Lexikon der Schweiz, Berna. Per tut ils texts publitgads a moda electronica valan las medemas reglas sco per la publicaziun stampada. Redacziun LIS, Gerberngasse 39, Chaum postal 322, 3000 Berna 13, tel. +41 31 313 13 30, e-mail: