e-LIR / Lexicon Assistenza e-LIR Contact Publicaziun Sponsurs	Lexicon Istoric Retic (LIR) Lemma Rumantsch Deutsch Italiano Chavazzin   A  B  C  D  E  F  G  H I  J  K  L  M  N  O  P  Q  R  S  T  U  V  W  X  Y  Z  Rezia Rezia romana  Rezia Questa noziun pretenda ina differenziaziun tr. la midada da significaziun inerenta e sia applicaziun per designar epocas istoricas. Ils scripturs rom. numnavan <em>Raeti </em>ils pievels muntagnards residents al sid da las Alps (<elirlink href="aid:2776">Rets</elirlink>). A partir dal 2. tsch. s.C. è il num vegnì extendì sur tut ils pievels da la provinza rom. <em>Raetia</em>. Per Plinius e Livius eran ils Rets Etruscs stgatschads dals Gals da la planira dal Po. La derivanza dals nums <em>Raeti </em>(pievel) e <em>Raetia </em>(pajais) è contestada, ma prob. è ella illirica u ligurica. La «Notitia Dignitatum» (manual da l'Imperi rom. cun register dals dignataris civils e militars, redigì suenter il 390) menziunescha la divisiun da la Rezia, sut l'imp. Diocletian, en ils dus districts administrativs <em>Raetia prima</em> e <em>Raetia secunda</em>. Il center da la <em>Raetia prima</em> era <em>Curia Raetorum</em> (Cuira), quel da la Raetia secunda <em>Augusta Vindelicorum</em> (Augsburg). La denominaziun <em>Raetia prima et secunda</em> è attestada fin il 1192. Dapi il temp medieval tempriv èn però s'etablids per la Rezia alpina redimensiunada, daventada facticamain francona pir enturn il 800, il num <em>Raetia Curiensis</em>, p.ex. il 865 <em>Rhaetia major et etiam Curiensis</em> ed expressiuns sumegliantas utilisadas fin viaden il 12. tschientaner. Sper questa furma cumpara dapi l'onn 831 era il num <em>Curwala</em> (Curvala) e <em>Pagus Curiensis</em> resp. <em>Comitatus Curiensis.</em> La noziun Curvala (era <em>Curvalia</em>, <em>Crualla</em>, <em>Cruara</em>), ch'aveva remplazza il num Raetia fin la fin dal 15. tsch., designava la regiun da l'uvestgieu da Cuira da quel temp anc da lingua rumantscha. En il 16. tsch. han duvrà ils umanists e cronists il num Rezia/<em>Raetien</em> per designar il territori da la <elirlink href="aid:2836">Republica da las Trais Lias</elirlink>, inclus sias Terras subditas Vuclina, Buorm e Clavenna. Era la nova libertad da cretta e da conscienza vegniva numnada <em>Libertas Rhetica</em>. La tradiziun umanista vegn cuntinuada en la litteratura populara, p.ex. en «Rhetus, ilg velg Grischun» da Steffan Gabriel (1621) u en la poesia da Joseph Casanova «Cheu stevan ils Rhaetiers en pasch e ruaus» (19. tsch.) e surtut en las poesias per chant viril dal 20. tsch., p.ex. da Flurin Camathias («O Rezia, patria mia»; «Si sededesta, Rezia nossa»), da Gion Cadieli («Alla patria: Rezia, nobla tiar'alpina ...») e da Nuot Vonmoos («A mia Rezia»). La conscienza retica furma era la basa dal cudesch da chanzuns rum. «Rezia» per chors maschadads (1939). Dapi il 19. tsch. vegn duvrà l'adjectiv retic savens sco sinonim da grischun per numerusas firmas, instituziuns, interpresas ed events sco la Viafier retica, la Bieraria retica, l'Apoteca retica, il Museum retic, l'Ospital chant. retic, il «Freier Rätier», la Miss Raetia ed auter pli. En il senn istoric pli vast vegn el la finala applitgà da quest «Lexicon istoric retic». Il num Rezia designescha trais epocas e stgalims culturals: la Rezia dal temp preistoric (<elirlink href="aid:2143">Preistorgia</elirlink>), la Rezia dal temp roman (<elirlink href="aid:3373">Rezia romana</elirlink>) e la Rezia dal temp medieval (<elirlink href="aid:229">Currezia</elirlink>). Allusiun al passà retic dal Grischun fa il chantun <elirlink href="aid:2777">Rezia</elirlink>, part da la Republica helvetica dal 1801-03.</p> Archiv: Ovras: Funtaunas: Litteratura: P.C. Planta, Das alte Raetien: staatlich und kulturhistorisch dargestellt, 1872; H. Dietze, Rätien und seine germanische Umwelt in der Zeit von 450 bis auf Karl den Grossen unter besonderer Berücksichtigung Churrätiens, 1931; E. Meyer-Marthaler, Rätien im frühen Mittelalter, en: Beiheft der ZSG, 1948; RN 2, 810 s.; W. Drack, R. Fellmann, Die Römer in der Schweiz, 1988; G. Scaramellini, Valtellina, Valchiavenna e Grigioni italiano: le radici comuni di una regione alpina, en: Quaderni Valtellinesi, 2007, nr 98/99, 11-13; M. Bundi, Rätische Landschaften, Alpensagen und Geschichte, 2009. Martin Bundi  Rezia Rezia romana  © HLS: Tuts dretgs d’autur da questa publicaziun electronica èn tar il Historisches Lexikon der Schweiz, Berna. Per tut ils texts publitgads a moda electronica valan las medemas reglas sco per la publicaziun stampada. Redacziun LIS, Gerberngasse 39, Chaum postal 322, 3000 Berna 13, tel. +41 31 313 13 30, e-mail: