::lexicon istoric retic : e-LIR / Lexicon::

e-LIR / Lexicon

Assistenza e-LIR

Contact

Publicaziun

Sponsurs

Lexicon Istoric Retic (LIR)

A B C D E F G H I J K L M N O P Q R S T U V W X Y Z

Vias e pass
Gia en temps preistorics utilisav'ins numerus passadis natirals en las Alps grischunas. Las pli impurtantas colliaziuns nord-sid eran quellas sur il <elirlink href="aid:1995">Flüela</elirlink> ed il <elirlink href="aid:1997">Fuorn</elirlink>, l'<elirlink href="aid:1986">Alvra</elirlink> ed il <elirlink href="aid:1991">Bernina</elirlink>, il <elirlink href="aid:1999">Güglia</elirlink> ed il <elirlink href="aid:2002">Malögia</elirlink> resp. sur il <elirlink href="aid:2006">Set</elirlink>, il <elirlink href="aid:2008">Spleia</elirlink>, il <elirlink href="aid:2007">San Bernardin</elirlink> ed il <elirlink href="aid:2001">Lucmagn</elirlink>. A l'intern dal chantun Grischun existivan passadis da la Val da la Landwasser en l'Engiadina (Scaletta) e da las vals lateralas al sid da la Surselva en il Valragn (Piz Calandari e Cuolm <elirlink href="aid:224">Val</elirlink>). Vers il vest, il nord e l'ost existivan colliaziuns cun ils vischins en l'Uri (Cuolm d'<elirlink href="aid:225">Ursera</elirlink>), il Glaruna (<elirlink href="aid:3006">Veptga</elirlink>), la regiun da Sargans (<elirlink href="aid:1993">Cunclas</elirlink>), il Vorarlberg ed il Tirol. Suenter la conquista da las Alps tras ils Romans a partir da l'onn 15 a.C. han ins introducì in sistem da vias postalas cun <elirlink href="aid:2911">sustas</elirlink> (mansio) e staziuns da stgomi da chavals (mutatio). Ins na sa dentant betg quant enavant che questa rait da vias era charrabla. Las rutas èn doc. en l'«Itinerarium Antonini» ed en la «Tabula Peutingeriana», era sche las indicaziuns da lieus n'èn betg tuttas identifitgablas. Menziunads vegnan in Lapidaria (al Spleia) sco era in Murus (Müraia/Promontogno) ed in Tinnetio (Tinizong) al Güglia. Da questas staziuns/sustas menz. existivan cun segirtad mo Tinizong e Castelmur; Lapidaria è prob. Ziràn. A Curia (Cuira) s'univan las duas vias da pass e manavan ens. sur Magia a Brigantium (Briganza). Magia vegn supponì tr. Maiavilla e Balzers. Entant ch'il Set ed il Güglia eran transibels cun chars d'in ischigl, pudev'ins duvrar tals al Spleia prob. mo fin al pe dal pass. Sco <elirlink href="aid:2909">vias d'aua</elirlink> vegnivan en dumonda ils lais da l'Engiadin'Ota ed il Rain davent da Cuira. Ina caracteristica impurtanta dal sistem da vias rom. eran lur numerusas variantas cumprovadas tras las ruderas dals chars en il grip. La rait da las vias rom. ha furmà la basa da las vias da pass posteriuras. Cun la diminuziun dal <elirlink href="aid:3377">traffic</elirlink> da martganzia a distanza, che transportava en ses megliers temps vaschella da l'Africa dal Nord, amforas cun sosa da peschs da la Spagna e vins da la Gallia dal Sid u ieli d'ulivas da l'Istria en il Grischun, èn las vias da transit puspè daventadas simplas vias da sauma localas. Ils passadis alpins han dentant mantegnì lur impurtanza strategica, essend che l'Imperi carolingic e pli tard era quel german s'extendevan dad omaduas varts da las Alps. Quai demussan o.t. ils numerus viadis (da curunaziun e.a.) dals imperaturs a Roma. Er il barat cultural cun la patria lat. è sa mantegnì da tuts temps. Sin ils pass han ins erigì en il temp medieval tempriv ed en il temp autmedieval sanctuaris ed <elirlink href="aid:2102">ospizis</elirlink> per ils pelegrins e commerziants, uschia p.ex. sin il Set (S. Peder?), sin il Lucmagn (Sta. Maria) u sin las Planeiras (S. Cassian). Lur impurtanza sco avainas da la vita economica han las vias però cuntanschì pir puspè en il temp medieval tardiv cun la nova fluriziun da las citads e dal commerzi. La controlla da las vias garantiva entradas dals dretgs d'escorta, dals dazis sin vias e punts sco era da las taxas da sustas e tavernas. Ins enconuscha dus projects da vias da quel temp: il schlargiament dal Set per chars realisà il 1387 tras Jacob de Castelmur per incumbensa da l'uvestg da Cuira ed il nov trassé da la ruta dal Spleia en la <elirlink href="aid:3014">Viamala</elirlink> construì il 1473 tras las vischnancas a la Via Sut. La Viamala sviava definitivamain il traffic sur il Lucmagn, mantegnì da la claustra da Mustér, e diminuiva era quel sur il Güglia a donn e cust da l'uvestgieu. Ultra da questas colliaziuns nord-sid, da las qualas faschevan part era quellas main internaz. sur l'Alvra-Bernina, il Flüela-Fuorn u il Lucmagn, aveva mo anc la via da l'Engiadina in'impurtanza surregiunala. Quella era charrabla quasi sin l'entir tschancun ed aveva medemamain in'impurtanza strategica sco colliaziun la pli directa tr. il Tirol e Milaun. Il mantegniment da las vias, passà dals suverans episcopals u aristocratics a las vischnancas interessadas situadas als pass e <elirlink href="aid:2139">ports</elirlink>, vegniva savens negligì. Uschia èn las colliaziuns nord-sid (cun excepziun dal Set durant in tschert temp) restadas vias da sauma. Il mantegniment dals sulets access charrabels als pass tr. Maiavilla e Tusaun provocava savens lungas dispitas. La Dieta fed. aveva bain relaschà prescripziuns, sch'ella vuleva però sanar in tschancun da via, stueva ella accordar in augment da dazi a las vischnancas ch'exequivan las lavurs, ma che n'avevan nagins meds finanzials per construir las vias. Suenter la realisaziun da la <elirlink href="aid:2043">Punt da duana</elirlink> sut a la Landquart (1509) tras l'uvestg e da la <elirlink href="aid:2044">Punt da Tardis</elirlink> tras privats (1529) èn enconuschentas novas construcziuns da vias pir vers la fin dal 17. tsch.: il Crap da <elirlink href="aid:208">Bravuogn</elirlink> (1695), nua ch'ins ha siglientà per l'emprima giada grip cun pulvra naira. Il Cardinel ha obtegnì ina nova via a l'entsch. dal 18. tschientaner. Pir vers la fin dal 18. tsch. è la Via imperiala tr. il Pass da <elirlink href="aid:2013">Son Gliezi</elirlink> e Cuira vegnida schlargiada generusamain (1782-85). Las vias commerzialas han pudì vegnir terminadas pir suenter ils scumbigls da la Revoluziun franzosa. Cun sustegn finanzial da la Sardegna-Piemunt e dal chantun Grischun ha l'impressari tessinais Giulio Pocobelli construì il 1818-23, ens. cun ses assistent grischun Richard La Nicca, la via d'art dal S. Bernardin. Il medem temp è era vegnida amplifitgada la via dal Spleia cun sustegn finanzial da l'Austria. Il 1820 han ins cumenzà a schlargiar la ruta dal Güglia tr. Beiva e Silvaplauna. Il 1827-28 è suandada quella dal Malögia fin a Casaccia, ed il 1835-40, han ins realisà, sut l'egida da La Nicca, l' access al Güglia tr. Cuira e Beiva. Suenter ch'ils ports èn vegnids abolids il 1834, ha il Chantun surpiglià, sin basa dal nov urden da transit, il mantegniment da las vias. En la segunda mesadad dal 19. tsch. han ins amplifitgà la gronda part da las vias da colliaziun e dals access a las vals lateralas: il 1862-63 la via da posta sur il Cuolm d'Ursera, il 1864-66 la via da l'Alvra, il 1866-67 la via dal Flüela, il 1868-69 la via dal <elirlink href="aid:1928">Meir</elirlink>, il 1870-72 il Pass dal Fuorn, il 1876-77 il Lucmagn ed il 1890-95 la via en la Val d'Avras. Numerusas vischnancas han però obtegnì ina via d'access pir en il 20. tsch., e Landarenca en la Val Calanca ha perfin stuì sa cuntentar cun ina nova via da sauma fin ch'ella è vegnida rendida accessibla cun ina pendiculara il 1961. Entant avev'ins collià il Grischun cun la rait da viafier svizra tras la lingia da viafier Rorschach-Cuira averta il 1858. Ins planisava ussa intensivamain da realisar, cun participaziun da l'exteriur, ina nova viafier tras las Alps Orientalas. La nova transversala da las Alps dueva impedir ch'il Grischun vegniss separà dal traffic da transit internaziunal. Ils projects che sa concurrenzavan vicendaivlamain n'han dentant gì naginas schanzas cunter l'allianza pussanta dals amis dal Gottard, quai ch'ha paralisà la politica da traffic grischuna fin vers la fin dal 19. tschientaner. Tr. il 1889 ed il 1926 han ins persuenter construì ina rait da viafier a binari stretg che n'ha betg mo avert las valladas principalas dal Grischun, mabain era pussibilità in access a la rait tal. tras la <elirlink href="aid:3312">Viafier dal Bernina</elirlink> che maina a Tiraun. L'extensiun da las colliaziuns da traffic ha alura chattà cun quai ina fin mumentana. Il 1900 ha il Cussegl grond relaschà in scumond d'automobils per tut il chantun Grischun; pir il 1925, suenter diesch votaziuns dal pievel, è l'automobil vegnì admess generalmain. La rait da vias ha però stuì vegnir adattada, cun agid da salaschada e da catram, al traffic creschent. Surtut la realisaziun d'implants electrics ha chaschunà in grond traffic da lavur, uschia ch'il Chantun ed ils producents da forza electrica han stuì construir communablamain ulteriuras vias d'access. En ils onns 1960-67 ha la via alura survegì novs impuls d'ordaifer tras il project da las vias naziunalas. Il tschancun Sargans-Cuira da la A13 è vegnì realisà a dus vials, ma anc betg separà en las duas direcziuns; el ha distgargià ils centers stretgs dals vitgs dal traffic da transit ch'era daventà insupportabel. Questa fasa da construcziun ha culminà il 1967 en l'avertura dal tunnel dal S. Bernardin ch'ha surpassà gia l'emprim onn a gestiun tut las prognosas davart il traffic da transit. Sco colliaziun cun il Mesauc, segira era l'enviern, ha il S. Bernardin prest surpiglià la funcziun da giuntgida al Gottard. Ils access al sid ed al nord èn alura vegnids schlargiads successivamain a vias directas: ad in'autostrada fin a Tusaun, ad ina via svelta separada en las duas direcziuns en la part inferiura dal Mesauc. Cuntrari a l'amplificaziun permanenta da las vias d'access che ston vegnir adattadas al traffic creschent ed a la construcziun da vias da sviament per distgargiar ils vitgs turmentads da las lavinas d'autos, è l'infrastructura da la viafier restada ditg la medema. Suenter ina curta represa da la debatta davart ina Viafier da las Alps Orientalas, è la viafier sa cuntentada cun la construcziun d'ina via rudlanta tras il tunnel dal <elirlink href="aid:2012">Veraina</elirlink> che garantescha dapi il 1999 ina colliaziun segira da la <elirlink href="aid:3013">Viafier retica</elirlink> l'enviern tr. il Partenz (Selfranga/Claustra) e l'Engiadina (Sagliains/Lavin), effectuond ina sanaziun pli sperta da la via tras il Partenz cun ulteriurs sviaments da vitgs (Claustra/Sunnibergbrücke 1997-2005, Saas/tunnel 2003-2011). La construcziun ed il mantegniment da las vias ha consumà en il 19. tsch. ina buna part da las modestas entradas statalas. Oz è quest post main decisiv grazia a las subvenziuns da las vias naz. e grazia a las entradas dals dazis sin benzin. Essend ch'il Grischun sto mantegnair ina rait da vias topograficamain difficila e variada d'ina lunghezza da 1'630 km, è il traffic cun 25-30% dal total da las expensas annualas anc adina il post il pli grond. Surtut la rumida da la naiv chaschuna blers custs; l'enviern vegnan anc tegnidas avertas las rutas dal Güglia, Bernina, Fuorn e Lucmagn. 
Archiv:

Ovras:

Funtaunas:

Litteratura:
Strassen als Baudenkmäler, en: IVS 2, 1989; HbBG; Wege über die Alpen - von der Frühzeit bis heute, edì dad U.A. Oster, 2006.

Max Hilfiker

Vias dals Polacs

Victor

© HLS: Tuts dretgs d’autur da questa publicaziun electronica èn tar
il Historisches Lexikon der Schweiz, Berna. Per tut ils texts publitgads a moda
electronica valan las medemas reglas sco per la publicaziun stampada.

Redacziun LIS, Gerberngasse 39, Chaum postal 322, 3000 Berna 13, tel. +41 31 313 13 30, e-mail: