e-LIR / Lexicon Assistenza e-LIR Contact Publicaziun Sponsurs	Lexicon Istoric Retic (LIR) Lemma Rumantsch Deutsch Italiano Chavazzin   A  B  C  D  E  F  G  H I  J  K  L  M  N  O  P  Q  R  S  T  U  V  W  X  Y  Z  Troccas Truog, Jakob Rudolf  Trun Vischnanca polit., cirq. Mustér, distr. Surselva (fin il 2001 Rain Anteriur), cun ils aclauns e bains da Cumadè, Bardigliun, Campliun, Gravas, Caltgadira, Cartatscha, Flutginas, Darvella, Lumneins e la fracz. da <elirlink href="aid:3033">Zignau</elirlink>. La vischnanca è periclitada dapi tuts temps da lavinas (Munt, Cavistrau), da bovas e dad auas grondas (Zavragia, Zinzera, Rain). 765 <em>Tauronto</em>, tud. Truns (fin il 1943). 1850 1'047 abit.; 1900 974, 1950 1'598, 2000 1'322. A Caltgeras al nord da la via da T. a Darvella han ins scuvert ina colonia dal temp da bronz (ca. 1200 a. C.), a Darvella ina necropola dal temp preistoric ed a Grepault ina colonia dal temp da Hallstatt (a partir dal 400 a.C.). Il mir da defensiun dal temp medieval tempriv ed ina baselgia cun sala dal 6./7. tsch. dattan perditga d'ina colonisaziun permanenta a T. La foppa da T. è vegnida colonisada a fin il pli tard en il temp medieval tempriv. L'onn 765 ha l'uv. Tello regalà a la claustra da Mustér trais colons a T. che appartegnevan a la curt da Schlans. A partir dal temp medieval ha T. furmà, sco vischinadi dal cumin da la Cadi, cun Sumvitg la quarta curt. Chastels claustrals (Cartatscha sur T. da ca. 1100,  <elirlink href="aid:257">Farbertg</elirlink> a la via da Schlans da ca. 1248, <elirlink href="aid:3033">Ringgenberg</elirlink> menz. il 1283 e Phiesel, oz en muschna) marcavan il cunfin da la Cadi a T. vers ils signuradis da Vuorz/Munt S. Gieri. L'onn 765 è menz. in Presbyter Sylvanus a T., il 1272 il patrocini da s. Martin che renviescha al temp francon. La collatura ha gì fin il 1631 la claustra da Mustér. Ina baselgia filiala sa chattava a Zignau. Il 1663-64 è vegnida erigida ad Acladira la baselgia da pelegrinadi consecrada a Nossadunna da la Glisch (benefiziat, anc oz impurtanta). A T. è vegnida fundada 1424 la Lia Sura/Lia Grischa, e fin il 1798 è T. stà il lieu da dretgira, fin il 1814 il lieu da dieta da la LG. A sia impurtanza sco lieu central regordan l'ischi, simbol da la libertad conquistada, sut il qual la Charta da la LG dal 1424 è vegnida engirada e renovada periodicamain fin il 1778, la chaplutta da S. Onna (amplifitgada il 1701 cun in portic cun maletgs commemorativs) e la Cuort Ligia Grischa, anteriura curt claustrala, en la quala vegnivan salvadas las dietas da la LG (oz en possess da la Fundaziun Cuort Ligia Grischa ch'ha installà qua in museum). Il 1739 ha T. cumprà ora la dieschma claustrala. Dal 16. tsch. fin enturn il 1850 han ils da T. explotà argient sin l'Alp Nadels sco era minerals da fier e d'arom sin l'Alp Punteglias. Durant la Helvetica è T. stà il lieu principal dal district da las Funtaunas dal Rain e la sedia da la prefectura dal chantun Rezia. Il 1815 è T. daventà la sedia da la dretgira distr. dal Rain Anteriur. Fin il 1912 ha existì a T. in'impurtanta staziun da la posta a chavals. A T. sa chattava era la pli veglia e pli gronda interpresa industriala da la Surselva: ina filandaria da launa da nursas (1863) ed ina tessaria (serrada il 1868). A quella è suandada il 1875 ina fabrica da palpiri ed il 1911 la Fabrica da ponn Trun SA (falliment 2001). Questa industria e l'access a la VR (1912) han effectuà in stausch innovativ e chaschunà in augment da la populaziun. La lavur da fabrica e la mastergnanza da construcziun han piglià suramaun, entant ch'il dumber dals manaschis agriculs è sa diminuì cuntinuantamain. Dapi il 19. tsch. dispona T. d'in modest turissem da cultura, e dapi ils onns 1960 profita la vischnanca dals centers turistics vischins da la Surselva. Sper la chaplutta da S. Onna sa chatta il Curtin d'onur, installà per persunas meritaivlas da l'intschess da l'anteriura LG. Il 1966 è vegnida remplazzada la chasa da paupers dal 1889 tras ina chasa d'attempads, il 1977 è vegnida erigida la Casa Depuoz, ina dimora per persunas cun impediments. Part da la populaziun da lingua rum.: 2000 79,1%/87,8% (ML/Lindic).<br /><br /><br /></p> Archiv: Ovras: Funtaunas: Litteratura: P.A. Vincenz, Historia della vischnaunca de T., en: Annalas, 54/1940, 1-80; 55/1941, 1-66; Kdm GR 4, 411-42; Gem. GR, nr 187, 1985; C. Tomaschett, Die Orts- und Flurnamen der Gemeinde T., 1991; J. Rageth, Die ältereisenzeitlichen und spätbronzezeitlichen Siedlungsreste von T.-Darvella, en: JHGG, 2001, 1-35; A. Collenberg, Drei Berggemeinden, drei Entwicklungen - T., Andeer und Saas i.P. (1850-1950), 2002; T. - vargau e present, 2011. Adolf Collenberg  Troccas Truog, Jakob Rudolf  © HLS: Tuts dretgs d’autur da questa publicaziun electronica èn tar il Historisches Lexikon der Schweiz, Berna. Per tut ils texts publitgads a moda electronica valan las medemas reglas sco per la publicaziun stampada. Redacziun LIS, Gerberngasse 39, Chaum postal 322, 3000 Berna 13, tel. +41 31 313 13 30, e-mail: