e-LIR / Lexicon Assistenza e-LIR Contact Publicaziun Sponsurs	Lexicon Istoric Retic (LIR) Lemma Rumantsch Deutsch Italiano Chavazzin   A  B  C  D  E  F  G  H I  J  K  L  M  N  O  P  Q  R  S  T  U  V  W  X  Y  Z  Trivulzio Troccas  Trivulzio, Gian Giacomo * 24-6-1442 a Crema (Lumbardia), † 5-12-1518 a Chartres, cat., da Milaun, Lucerna (1513) ed Altdorf/UR (1518). Figl dad Antonio e da Franceschina Aicardi n. Visconti. &#8734; 1) 1466 Margherita n. Colleoni, figlia da Nicolino, 2) 1487 Beatrice n. d'Avalos, figlia dad Iñigo, grond chambrer dal Reginam da la Sicilia. Numnà era il Magno (il grond) pervia da ses duns da cumandar truppas militaras (condottiero). T. è stà in allià dals Sforzas. Encuraschà prob. da Ludovico Maria Sforza (il Mor), ha el acquistà il 1480 dal cont Johann Peter de Sax la suveranitad sur il Mesauc e la Calanca ed ha fundà uschia il rom dals T. dal Mesauc; il 1487 ha Friedrich III renconuschì quella midada. Era sch'el na residiava sez betg en il Mesauc, essend pli interessà al context tal., ha T. rinforzà sia posiziun cun acquistar il 1493 dals Werdenberg-Sargans il Valragn e la Stussavgia. Suenter la ruptura cun Ludovico Maria Sforza (1494), è el entrà en servetsch dal retg da la Frantscha (1495) per defender qua tras meglier ses territoris ed ha promovì l'adesiun dal Mesauc Inferiur a la LG (1496; Mesocco e Soazza eran s'unids <em>motu proprio</em> il 1480). Suenter la conquista da Milaun tras ils Franzos il 1499, el è vegnì numnà da Louis XII marschal da la Frantscha e guvernatur dal ducadi e marchese di Vigevano. Qua tras è T. s'acquistà sper il titel da barun da la LG il status da feudatari dal retg da la Frantscha. En la perioda da las Guerras d'Italia han ils Confederads invadì il Mesauc ed han incendià tr.a. il palaz dals T. Suenter la Battaglia da Novara (1513), è la regiun vegnida occupada da las Trais Lias che l'han administrada fin a la Pasch perpetna dal 1516 a quint da T. Suenter avair cumbattì per la Frantscha en la Battaglia da Marignano (1515), ha el pers la fiduzia da Franzestg I, retg da la Frantscha, ed è mort en disfavur.</p> Archiv: Apriv. T., Milaun; Archivio di Stato e Archivio storico civico, Milaun. Ovras: Funtaunas: Litteratura: S. Tagliabue, La signoria dei T. in Valle Mesolcina, Rheinwald e Safiental, 1927 (restampa 1996); M. Klein, Die Beziehung des Marschalls Gian Giacomo T. zu den Eidgenossen und den Bündnern, 1939; Clavadetscher/Meyer, Burgenbuch; L. Arcangeli, Gian Giacomo T. marchese di Vigevano e il governo francese nello stato di Milano (1499-1518), en: Vigevano e territori limitrofi alla fine del Medioevo, edì da G. Chittolini, 1997. Annamaria Valenti  Trivulzio Troccas  © HLS: Tuts dretgs d’autur da questa publicaziun electronica èn tar il Historisches Lexikon der Schweiz, Berna. Per tut ils texts publitgads a moda electronica valan las medemas reglas sco per la publicaziun stampada. Redacziun LIS, Gerberngasse 39, Chaum postal 322, 3000 Berna 13, tel. +41 31 313 13 30, e-mail: