e-LIR / Lexicon Assistenza e-LIR Contact Publicaziun Sponsurs	Lexicon Istoric Retic (LIR) Lemma Rumantsch Deutsch Italiano Chavazzin   A  B  C  D  E  F  G  H I  J  K  L  M  N  O  P  Q  R  S  T  U  V  W  X  Y  Z  Bovelin, Melchior Braggio  Bovollino [Bavolin, Bonalin], Martino Attestà per l'emprima giada il 1497, † 13-3-1531 en vischinanza da Cantù (Lumbardia), da Mesocco. Figl da Guglielm, notar. Educaziun umanistica, notar a Mesocco 1497-1531, daspera poet e politicher. Ses relasch litterar cumpiglia poesias en il dialect lumbard (vernacolo), p.p. cun numerus latinissems. Il 1519 èn cumparids tar Gottardo de Ponte a Milaun otg sonets, imnis a Gian Giacomo Trivulzio: il terz sonet dechanta il signuradi da Trivulzio en il Valragn, danunder ch'il Rain portia la gloria dal marschal fin a la mar; il tschintgavel sonet glorifitgescha il chastè da Mesocco. B. è l'emprim poet grischun da lingua taliana. Sias poesias sumeglian en furma e ritmus als vers lad. che ses ami Gian Travers da Zuoz ha scrit il 1527 en sia «Chanzun da la guerra dalg Chiastè d'Müs». Il 1527 ha B. da Sunder deditgà in <em>carmen</em> en lat. a Travers. B. tgirava era ina correspundenza cun Erasmus von Rotterdam e cun il Venezian Pietro Bembo. Ses figl Lazarus ha studegià tar Glarean. B. è stà in dals emprims mess uffizials da las Trais Lias a Vaniescha (1523-24). Grazia a ses cumportament sabi e decidì ha la Republica da S. Marc renunzià a staziunar truppas en la regiun da l'Adda ed ha confermà ad el sia veglia amicizia cun il Stadi da las Trais Lias. Dal 1527-29 è B. stà vicari da la Vuclina a Sunder. Il 1529 han las Trais Lias delegà el tar il papa a Roma ed il 1530 ina segunda giada a Vaniescha, nua ch'el ha negozià per obtegnair l'agid diplomatic necessari per terminar la Segunda Guerra da Müsch. En ina missiun sumeglianta a Milaun è el vegnì assassinà a Cantù da sbirs dal chastellan da Müsch, Gian Giacomo Medici.<br /><br /><br /></p> Archiv: Ovras: Funtaunas: Litteratura: A.M. Zendralli, Il Grigioni italiano e i suoi uomini, 1934, 102-07; A.M. Zendralli, Eruditi di Mesolcina, en: QGI, 8/1938/39, 15-22; Bundi, Beziehungen, 89-101; R. Fasani, Martino B.: un poeta, en: QGI, 65/1996, 293-301. Martin Bundi  Bovelin, Melchior Braggio  © HLS: Tuts dretgs d’autur da questa publicaziun electronica èn tar il Historisches Lexikon der Schweiz, Berna. Per tut ils texts publitgads a moda electronica valan las medemas reglas sco per la publicaziun stampada. Redacziun LIS, Gerberngasse 39, Chaum postal 322, 3000 Berna 13, tel. +41 31 313 13 30, e-mail: