e-LIR / Lexicon Assistenza e-LIR Contact Publicaziun Sponsurs	Lexicon Istoric Retic (LIR) Lemma Rumantsch Deutsch Italiano Chavazzin   A  B  C  D  E  F  G  H I  J  K  L  M  N  O  P  Q  R  S  T  U  V  W  X  Y  Z  Son Benedetg Son Gagl  Son Gagl Dapi il 1803 chantun da la Confederaziun. Il territori chant. odiern cumpigliava dal 16. tsch. fin il 1798 ils signuradis da la prinzi-abazia da S., numnadamain la Alte Landschaft (Fürstenland) ed il contadi dal Toggenburg, ultra da quai la citad imperiala libra da S. e plinavant la podestataria da la Val dal Rain, la barunia da Sax-Forstegg, il signuradi da <elirlink href="aid:1145">Gams</elirlink>, ils contadis da Werdenberg e Sargans, la prinzi-abazia da <elirlink href="aid:261">Faveras</elirlink>, la podestataria da Gaster e <elirlink href="aid:3508">Weesen</elirlink>, il contadi dad Uznach sco era la pitschna citad suverana da Rapperswil. <br />Las relaziuns tr. il Grischun e S., surtut cun la regiun da Sargans (cunfinanta) e dal Werdenberg, tanschan lunsch enavos en la preistorgia, sco quai ch'ils chats dal medem tip da las differentas epocas cumprovan. Las relaziuns èn s'intensivadas durant il temp rom.: La Via rom. Cuira-Augusta Raurica traversava il Sarganserland e colliava la Helvezia (rom.) cun la Rezia prima, e la transversala lung il Rain al Lai da Constanza era medemamain da grond'impurtanza per il traffic ed il transit tr. la Lumbardia e la Rezia secunda. Ils transports organisads sin omadus tschancuns e la navigaziun sin il Lai Rivaun han mantegnì fin a la cumparsa da la viafier (1858 Rorschach-Sargans-Cuira, 1859 Turitg-Sargans-Cuira) lur impurtanza extraordinaria per il provediment dal Grischun. En il temp curretic tempriv era la claustra da Faveras, fundada enturn l'onn 730/750 o.t. cun participaziun dals Zaccons/Victorids, in center spiritual e cultural da la Rezia dal Nord; ella aveva in possess feudal considerabel en la Currezia ed era fermamain colliada cun l'uvestgieu da Cuira. Il «Liber viventium» da Faveras (suenter il 800) dat perditga da relaziuns stretgas e durablas tr. Faveras e las claustras da Mustér e Müstair. Mustér e Faveras eran colliadas tras l'uschen. Via dals paders sur il Cunclas. En consequenza dals Artitgels da Glion dal 1526 ha la claustra da Faveras pers sias dieschmas en la Republica da las Trais Lias sco era sia muntada economica e politica per il Grischun. L'archiv da la claustra da Faveras (transferì en l'archiv claustral da S.) è - sper quel episcopal da Cuira - l'archiv retic il pli impurtant per il temp d'avant il 1800. El cuntegna era ina copia da la «Lex Romana Curiensis» (avant il 750). En l'archiv claustral da S. sa chatta il codex 722, ils «Capitula Remedii». Quella claustra era medemamain in lieu da pelegrinadi (da mediocra muntada) per ils Grischuns. Il cunfin fixà enturn il 1155 tr. ils uvestgieus da Cuira e Constanza correspundeva a quel d'enturn il 900. El tanscheva da la Planira da la Linth sur il Churfirsten e la gruppa da l'Alpstein orientala fin al Hirschensprung e possedeva ina populaziun rum. germanisada a partir dal 11./12. tsch. nà dal Lai Rivaun e da la Val dal Rain inferiura (<elirlink href="aid:1116">Germanisaziun</elirlink>). Quest process ha durà enfin il 13.-15 tsch., en singuls cas enfin il 18. tsch. (p.ex. Vetten). Correspundentamain numerus èn ils toponims ed ils nums da famiglia rum. (Gafafer, Gabathuler e.a.) en questas regiuns. Quels èn san mantegnids tant meglier che las structuras economicas en il S. meridiunal ed en il Grischun eran en il temp medieval fitg sumegliantas, v.d. prevalentamain purilas. <br /> Impurtanta èn daventada en il 12. e 13. tsch. l'expansiun dominicala da las fam. da l'auta aristocrazia en las regiuns dal Grischun e dal S.: ils signurs de <elirlink href="aid:1163">Gräpplang</elirlink> en la regiun  da <elirlink href="aid:1034">Flums</elirlink>, ils Montforts e Werdenbergs, Vazs, Toggenburgs sco era ils Saxs. Ils Toggenburgs han ertà il 1338 tras maridaglia ils de Vaz, e la mort da Friedrich VII il 1436 ha provocà en il Grischun, tras la fundaziun da la Lia da las Diesch Dretgiras sco reuniun d'ina part dal domini dals Toggenburgs, ina nova orientaziun politic-territoriala. Il medem onn ha il contadi da Sargans fatg, cunter la voluntad da ses signur, in'allianza cun la Lia Grischa, la citad da Cuira ed ils baruns de Razén. La Refurmaziun en il Grischun ha survegnì in succurs decisiv e constant tras Vadian, ed a Cuira era activ Wolf Ulimann, oriund medemamain dal S. La Scola da mats a S. vegniva frequentada en il 16. tsch. fermamain dad Engiadinais.<br /> Las relaziuns politicas tr. las Trais Lias e la regiun al nord dal Hirschensprung eran marginalas - ina consequenza da la structura da pussanza particulara da S. avant il 1803. Colliaziuns economicas èn resultadas permanentamain da la vischinanza dal Sarganserland cun il Signuradi. Il Rain songagliais ha giugà ina rolla modesta per l'export grischun da mangiativas e rauba da diever, ma ina pli impurtanta per la flottaziun da laina da mutagl o.t. da la Surselva. Anc il 1800 vegnivan flottads martganzia e passagiers sin punteras duas giadas l'emna davent da Cuira. A Trübbach sa chattava ina gronda plazza da transtgargiada, e Rheineck era il port principal da vendita e da spediziun al Lai da Constanza. <br />La Constituziun dal chantun da S. dal 1814 s'orientava sco quella grischuna al princip da partitad confessiunala. En l'applicaziun da quella era il S. il chantun da referenza per il Grischun confessiunalmain paritetic. A S. èn s'orientadas en ils onns 1830 era las refurmas da scola cat.-lib. enturn Alois de Latour. Per il Grischun è il chantun da S. adina stà in partenari fitg impurtant en il 19. e 20. tsch. en il cumbat per ils differents projects da viafier (Spleia, Lucmagn) ed en connex cun la correcziun dal Rain.<br /> Il 1823 è vegnì fundà l'uvestgieu da S. e collià en uniun persunala cun la diocesa da Cuira (uvestgieu dubel). Sut pressiun da populaziun e da las duas regenzas chant. è el puspè vegnì abolì il 1836. Quest uvestgieu è vegnì guvernà ils emprims decennis da Grischuns (Karl Rudolf Buol von Schauenstein 1824-33; Johann Georg Bossi 1834-47 e Johann Peter Mirer 1847-62).<br /> Ina rolla politicamain impurtanta per ils cat.-cons. dal chantun da S. ha giugà durant il Cumbat cultural Gion Gieri Cavelti, oriund da Sagogn, sco manader da gestiun dal «Rheintaler Allgemeiner Anzeiger» ed editur dal «Fürstenländer» a Gossau. Sia ufficina ha era stampà ovras rum., tr.a. la «Fabiola en romontsch. Ina critica» dad Alfons Tuor (1903). Da vart lib. ha cumbattì Anton Philipp Largiadèr, oriund da Sta. Maria en Val Müstair, directur dal seminari scolastic songagliais a Rorschach 1869-76.<br />L'Univ. da S. (averta il 1899), ha adina giugà ina rolla (dal punct da vista quantitativ) plitost modesta per ils Grischuns. S. fa part dal consorzi da la Scola da selviculturs a Maiavilla.</p> Archiv: Ovras: Funtaunas: Litteratura: Sankt-Galler Geschichte 2003, 9 ts, 2003. Adolf Collenberg  Son Benedetg Son Gagl  © HLS: Tuts dretgs d’autur da questa publicaziun electronica èn tar il Historisches Lexikon der Schweiz, Berna. Per tut ils texts publitgads a moda electronica valan las medemas reglas sco per la publicaziun stampada. Redacziun LIS, Gerberngasse 39, Chaum postal 322, 3000 Berna 13, tel. +41 31 313 13 30, e-mail: