e-LIR / Lexicon Assistenza e-LIR Contact Publicaziun Sponsurs	Lexicon Istoric Retic (LIR) Lemma Rumantsch Deutsch Italiano Chavazzin   A  B  C  D  E  F  G  H I  J  K  L  M  N  O  P  Q  R  S  T  U  V  W  X  Y  Z  Terzen Testa, Giovanni  Tessin Il chantun T. (tal. Ticino) sa chatta da la vart sid da las Alps e furma, ens. cun las valladas grischunas <elirlink href="aid:1931">Mesauc</elirlink>, <elirlink href="aid:162">Calanca</elirlink>, <elirlink href="aid:135">Bergiaglia</elirlink> e <elirlink href="aid:2984">Puschlav</elirlink> (numnadas le Valli) la Svizra da lingua taliana. El è stà da tuts temps la retroterra linguistica e culturala per las vals Mesauc e Calanca, cun las qualas el ha in cunfin cuminaivel gist sco cun il <elirlink href="aid:3507">Valragn</elirlink>, la <elirlink href="aid:1390">Lumnezia</elirlink>, la Val S. Pieder (<elirlink href="aid:2985">Val</elirlink>) e la <elirlink href="aid:161">Cadi</elirlink>. Avant l'avertura dal tunnel dal S. Bernardin dependevan il Mesauc e la Calanca durant l'enviern cumplettamain dal provediment si da Blinzuna. L'influenza culturala dal sid è doc. gia en il temp preistoric a Castaneda (2800-1500 a.C.) sco era en la <elirlink href="aid:2970">Val dal Blegn</elirlink> che aveva durant il temp da bronz colliaziun sur la Greina cun Crestaulta/Lumbrein. La <elirlink href="aid:3250">Cultura da Golasecca</elirlink> (900-400 a.Cr.) è doc. a Coop/Mesocco e Castaneda, a Cama ed a Sta. Maria  Calanca. Las relaziuns politicas ed economicas fitg veglias cun ils Retoromans da la Lumnezia e da la Val Medel (<elirlink href="aid:1926">Medel/Lucmagn</elirlink> sa manifestan er en la semeglientscha da lur dialects locals. Sut il domini dad Otto I (962-973) e danovamain sut Friedrich I Barbarossa (1152-90) ha la claustra da Mustér obtegnì numerus feuds e donaziuns tr. il <elirlink href="aid:2001">Pass dal Lucmagn</elirlink> e la Lumbardia. Fin en il temp medieval tardiv ha il prinzi-avat, sco guardian al Lucmagn, era exequì la giurisdicziun civila en la Val dal Blegn. La fam. nobla blegnasca da Torre era colliada tras matrimonis cun ils baruns de Sax-Mesauc che controllavan l'access al S. Bernardin. In Reinher da Torre è vegnì elegì uvestg da Cuira il 1194 - in mussament da lur influenza en la Currezia da quel temp. Il domini dals de Sacco a Blinzuna cumpigliava en il 15.tsch. era il Valragn ed ils cumins da la Lumnezia, Foppa e Flem e la Val dal Blegn. Il 1376 ha l'abazia da Mustér fatg in contract cun ils Blegnascs per l'exemziun da dazi - in'emprova d'augmentar il traffic da sauma e da vegnir integrà en la politica da promoziun dal transit sur il Lucmagn, proseguida dals signurs feudals dal Grischun avant il conclus da la Lia da Glion dal 1395. <br /> El il center da las relaziuns tr. Grischuns e lur vischins tessinais stevan da tut temp l'utilisaziun da las alps grischunas e las dispitas en quest connex. Il 1255 han ils purs da Luorscha empruvà da sa patrunar da las alps claustralas Sassedo, Aranasc e Froda. Las alps da la claustra en la Val Tujetsch vegnivan utilisadas dapi il temp medieval tardiv era da purs da la Leventina (e da la Val d'Ursera), ed il 1371 appartegnevan quatter da sias alps sin il Pass dal Lucmagn a societads e vischinadis da la Val dal Blegn. Il medem vala era da div. temps per las alps Soliva, Stgegia e Puzzetta en la Val Medel. Dal temp medieval tardiv fin enturn il 1900 han Luorscha, Semione ed Aquila era possess ed utilisà alps sin la Greina e sin territori da Vrin (Blengias) ed han giugà ina rolla impurtanta en l'urbarisaziun da questa regiun. La colonisaziun dal conturn da Vrin en il temp medieval tardiv è colliada stretgamain cun la Val dal Blegn: Blegnascs avevan cumprà en il 15. tsch., per satisfar lur grond basegn da pascul, alps sin la Greina, dretgs da vias e pastgiras sin las alps Canal, Blengias e Scharboda ed avevan tr.a. colonisà parzialmain Vanescha. Els eran medemamain arrivads sur il Pass dal Soreda a Zervreila ed avevan utilisà a partir dal 1451 la Lampertschalp (che munta alp lumbarda/tal.) e la Lenta. Fin a l'access da Vrin a la via chant. a Glion il 1887 era quella vischnanca orientada predominantamain vers il Tessin Superiur. La Greina ha giugà cun il Pass Crap (tal. Passo della Greina) sco passadi tr. las vals dal Rain Anteriur (e Glaruna) e l'Italia fin enturn il 1900 ina rolla impurtanta per il commerzi da muvel bovin e manidel e per il commerzi en detagl pratitgà dals Sursilvans a las <elirlink href="aid:1093">fieras </elirlink>tessinaisas (Biasca, Blinzuna, Giubiastg, Luorscha, <elirlink href="aid:1387">Lucarn</elirlink>), sco era per ils avdants da la Val dal Blegn ch'han utilisà quest passadi a partir dal 15. tsch. per cuntanscher lur alps sin territori da la Surselva. <br /> Blinzuna è sta da vegl ennà il center da commerzi dominant per il Mesauc e la Calanca. Questas activitads èn adina stadas accumpagnadas da dispitas pervia da dazis. Las fieras dal Tessin han pers lur impurtanza per il Grischun vers la fin dal 19. tsch. - ina consequenza da l'avertura da la viafier dal Gottard il 1882. D'impurtanza per las Valli era il <elirlink href="aid:802">commerzi da laina</elirlink> cun il Tessin e la Lumbardia: voluminus en il Mesauc, main intensiv en la Bergiaglia ed il Puschlav. <br /> Tr. il 1818 ed il 1823 han ins construì (cunter l'opposiziun dal T.) sut la direcziun da l'inschigner tessinais Giulio Pocobelli la nova via sur il Pass dal S. Bernardin tr. Blinzuna e Cuira, e dapi il 1967 collia l'A13 cun in tunnel tr. S. Bernardino e Valragn il chantun T. e las vals Mesauc e Calanca cun il rest dal Grischun, garantind la colliaziun era durant l'enviern. Dal 1907 fin il 1972 ha ina <elirlink href="aid:3011">viafier</elirlink> electrifitgada surprendì il transport public tr. Blinzuna e Mesocco; dapi alura vegn quel procurà tras in servetsch d'autos da posta. In curs postal direct collia medemamain Blinzuna cun Cuira e S. Murezzan cun Lucarn. Il 1877 è vegnida averta l'emprima via chant. sur il Lucmagn (schlargiada en ils onns 1956-63 ed actualmain averta era durant l'enviern). Ils projects per ina viafier dal Lucmagn (19. tsch.) resp. dal Tödi-Greina (20. tsch.), sustegnids dals Blegnascs, n'èn betg vegnids realisads.<br /> A l'entsch. dal 20. tsch. han il Grischun rum. e tal. gì da cumbatter las ideas irredentisticas (<elirlink href="aid:1410">Irredentissem</elirlink>) dal tessinais Carlo Salvioni e.a. che alimentavan las quaidas da Benito Mussolini sin il T. ed il Grischun. Per in transfer cultural han procurà ils picturs artists Gerolamo Gola da Blinzuna en la baselgia da Roveredo (1545) ed in NN Gorla en il 17. tsch. a Sta. Maria en Calanca, auters tessinais èn suandads en il 18. tschientaner. Ils picturs artists grischuns Johann Jakob Rieg e Fernando Lardelli èn stads activs en il T. Era sin il champ da scola ha gì ed ha anc adina lieu in barat: scolars da Blinzuna han frequentà fin en il tranterguerras la scola reala resp. il collegi da S. Giulio (pli tard da S. Anna) a Roveredo, entant che uffants e giuvenils dal Mesauc e da la Calanca giudevan in'instrucziun en scolas ed interpresas tessinaisas. Il chantun T. scolescha ses selviculturs (ens. cun 11 auters chantuns) a la Scola da selviculturs a Maiavilla. In'ulteriura collavuraziun vegn realisada en il rom da la Cuminanza da lavur da las regiuns alpinas (ARGE ALP) e cun il post da radio e televisiun da la Svizra tal. a Cuira.</p> <elirbold> </elirbold> <p><br /> <br /><br /></p> Archiv: Ovras: Funtaunas: Litteratura: K. Meyer, Blenio und Leventina von Barbarossa bis Heinrich VII., 1911; G. Bolla, La storia di Olivone, 1931; Müller, Abtei Disentis; A.M. Deplazes-Haefliger, Die Freiherren von Sax und die Herren von Sax-Hohensax bis 1450, 1976; R. Boldini, I rapporti fra la Mesolcina e Bellinzona nei secoli, en: QGI, 47/1978, 104-13; Bundi, Besiedlung; Storia del Cantone Ticino, edì da R. Ceschi, 2 ts, 1998; Storia della Svizzera italiana, edì da R. Ceschi, 2000; L. Deplazes, Begegnung und Abgrenzung zwischen Nord und Süd in den Passtälern der Zentralalpen, en: Schwaben und Italien im Hochmittelalter, edì da H. Maurer, 2001, 203-28. Adolf Collenberg  Terzen Testa, Giovanni  © HLS: Tuts dretgs d’autur da questa publicaziun electronica èn tar il Historisches Lexikon der Schweiz, Berna. Per tut ils texts publitgads a moda electronica valan las medemas reglas sco per la publicaziun stampada. Redacziun LIS, Gerberngasse 39, Chaum postal 322, 3000 Berna 13, tel. +41 31 313 13 30, e-mail: