e-LIR / Lexicon
Assistenza e-LIR
Contact
Publicaziun
Sponsurs
|
Lexicon Istoric Retic (LIR)
A B C D E F G H I J K L M N O P Q R S T U V W X Y Z
Conzett [-Knecht], Verena
* 28-11-1861 a Turitg, † 14-11-1947 a Kilchberg/ZH, ref., dad Aschera. Figlia da Johannes Knecht, survegliader en ina fabrica da palpiri, e da Barbara n. Mathis. ∞ <elirlink href="aid:673">Conrad Conzett</elirlink>. Essend ses bab daventà tschorv, ha C. lavurà gia cun 13 onns en ina tenscharia, alura en ina filandaria, nua ch'ella è vegnida en contact cun il moviment dals lavurers tras Johanna Greulich (la dunna da Herman Greulich). Fin a sia maridaglia è ella stada cusunza da cravattas e vendidra a Turitg. Sper la tgira da ses quatter figls ha C. surpiglià lavurs administrativas en la stamparia da ses um e retschavì en lur chasa persunalitads socialdemocraticas sco Paul Pflüger, Robert Seidel, August Bebel e Wilhelm Liebknecht. Comm. da la PS e da l'Associaziun da lavureras da Turitg. Pres. da l'Associaziun svizra da lavureras (fundada il 1890) ch'ella ha represchentà il 1896 a l'emprim Congress svizzer da dunnas. C. è s'engaschada o.t. per ina meglra protecziun da lavurers e lavureras, per l'assicuranza d'accidents sco era per temps da lavur reducids. Il 1896 è ella vegnida elegida en la suprastanza da l'Associaziun svizra da lavurers. Il 1897 ha ella represchentà la PS da la Svizra al Congress internaz. per la protecziun dals lavurers a Turitg. Suenter il suicidi da ses um ha C. surpiglià il 1898 la stamparia indebitada e transfurmà quella ens. cun ses associà, l'advocat Emil Huber, en in'interpresa moderna e prosperanta. L'ediziun da la revista da fam. infurmativa e divertenta «In freien Stunden» (abunament cumbinà cun in'assicuranza) è daventada in success. A l'entsch. dal 1900 è C. sa distanziada dal moviment dals lavurers per sa deditgar adina dapli ad incumbensas d'utilitad publica, p.ex. a la fundaziun da la chasa per mammas ed uffants Inselhof a Turitg ed a la protecziun da mammas nubilas. C. è stada ina da las persunalitads las pli extraordinarias en il moviment da lavurers da la Svizra. Ella è s'engaschada fermamain per interess sociopolitics e per l'organisaziun sindicala da las lavureras. Malgrà la mancanza d'ina furmaziun professiunala è ella stada in'interprendidra cun in grond success.<br /> </p>
Archiv:
Ovras:
Erstrebtes und Erlebtes, 1929.
Funtaunas:
Litteratura:
Schweizer Frauen der Tat 3, 1929; Volksrecht, 18-11-1947; 6-5-1988.
Brigitte Studer
© HLS: Tuts dretgs d’autur da questa publicaziun electronica èn tar
il Historisches Lexikon der Schweiz, Berna. Per tut ils texts publitgads a moda
electronica valan las medemas reglas sco per la publicaziun stampada.
| |
|
Redacziun LIS, Gerberngasse 39, Chaum postal 322, 3000 Berna 13, tel. +41 31 313 13 30, e-mail:
|
|
Conzett, Conrad