e-LIR / Lexicon Assistenza e-LIR Contact Publicaziun Sponsurs	Lexicon Istoric Retic (LIR) Lemma Rumantsch Deutsch Italiano Chavazzin   A  B  C  D  E  F  G  H I  J  K  L  M  N  O  P  Q  R  S  T  U  V  W  X  Y  Z  Dusch Economia  Ebel, Johann Gottfried * 6-10-1764 a Züllichau (Silesia prussiana, oz Sulechów/Pologna), † 8-10-1830 a Turitg, ref., Tudestg, Franzos natiralisà il 1796, dretg da burgais helvetic 1801, burgais da Turitg 1803. Figl dad in commerziant. Stud.med. a Frankfurt an der Oder, dr.med. 1789. Domicilià a Turitg dal 1790-92, nua ch'el ha publitgà il 1792 sia «Anleitung, auf die nützlichste und genussvollste Art die Schweiz zu bereisen». Quest guid da viadi, che tracta era aspects geologics, è daventà in'ovra classica; revedida e reedida pliras giadas, ha ella influenzà tr.a. il «Wilhelm Tell» da Schiller. En l'emprima ediziun na vegn il Grischun betg descrit pli detagliadamain, perquai ch'ins haja, sco quai che l'autur scriva, sincerà ad el ch'i na dettia nagut da magnific, extraordinari e bel en la natira grischuna. Aderent da la Revoluziun franz., è E. sa rendì il 1796 a Paris, nua ch'el è s'occupà era da refurmas politics per la Svizra ch'el ha visità pliras giadas a partir dal 1802. Cun l'ovra «Über den Bau der Erde in dem Alpen-Gebirge [...]» ha el empruvà il 1808, sco emprim, da far ina sintesa da la geologia da las Alps. A partir dal 1810 ha E. vivì  tar la fam. Escher-Gossweiler a Turitg, nua ch'el è era sa fatschentà, sco comm. da div. societads da scienzas natiralas, da domenas marginalas, sco l'utilisaziun da la batgetta magica u dal magnetissem animalic. Il 1813 è cumparì ses memorial «Abriss des politischen Zustandes der Schweiz» ed il 1826 «Die Bergstrassen durch den Canton Graubündten [...]» (introducziun e decleraziuns davart l'ediziun en colurs). Il turissem en svilup en Svizra ed en il Grischun va era enavos sin ses rapports da viadi. <br /> </p> Archiv: STAZH, relasch. Ovras: Funtaunas: Litteratura: M. Brunner, Johann Gottfried E., 1976; S. Margadant, Land und Leute Graubündens im Spiegel der Reiseliteratur 1492-1800, 1978, 22; P. Faessler, Johann Gottfried E. als Reiseliterat, 1983; C. Zortea, Graubünden im Spiegel der Reiseberichte, der landeskundlichen und topographischen Beschreibungen in der Zeit von 1800 bis 1850, 1987. Christoph Mörgeli  Dusch Economia  © HLS: Tuts dretgs d’autur da questa publicaziun electronica èn tar il Historisches Lexikon der Schweiz, Berna. Per tut ils texts publitgads a moda electronica valan las medemas reglas sco per la publicaziun stampada. Redacziun LIS, Gerberngasse 39, Chaum postal 322, 3000 Berna 13, tel. +41 31 313 13 30, e-mail: