e-LIR / Lexicon
Assistenza e-LIR
Contact
Publicaziun
Sponsurs
|
Lexicon Istoric Retic (LIR)
A B C D E F G H I J K L M N O P Q R S T U V W X Y Z
Gadola, Guglielm
* 6-11-1902 a Mustér, † 12-7-1961 a Cuira, cat., da Schlans. Figl da Wilhelm Joseph (numnà Guglielm pign), scrinari, e da Ludivina n. Decurtins, da Tujetsch. Il tat era immigrà da Clavenna. ∞ Yvonne n. Mauron, da Friburg. Gimnasi a Mustér ed Engelberg/OW. Studi d'istorgia e da romanistica a Friburg e Turitg, dr.fil. 1930 («Geschichte der rätoromanischen Literatur des 17. Jahrhunderts»; ediziun rum.: «Historia litterara dil sentiment religius en Surselva de messa»). Prof. d'istorgia e da franzos a la Scola chant. a Cuira 1930-61. Autur d'ina quarantina novellas e raquints («Ina fiera de Ligiaun», 1930; «Brulf», 1941), da diesch biografias e da passa 50 tractats istorics, folcloristics e litterars, p.ex. «Historia della schurnalistica sursilvana, 1836-1928» (1928), «Historia dil teater romontsch» (3 ts, 1930) e da «Las marletgas da Paul Luziet» (1956, cun illustraziuns dad Alois Carigiet). Confundatur (1927) e redactur dal «Glogn» 1929-53 (ses organ da publicaziun principal), redactur da l'«Ischi» 1945-61. La contribuziun da G. a l'enconuschientscha da la societad purila e da la cultura politica, spiertala e religiusa da la Surselva è senza paregl. Ses raquints tradeschan ina fantasia inexauribla ed in grond gust e dun per l'umur. Undrà en il Curtin d'onur da la LG a Trun.</p>
Archiv:
Ovras:
BR, nrs 2477-2501.
Funtaunas:
Litteratura:
Bezzola, Litteratura, 542-54; Deplazes, Funtaunas 3; Deplazes, Die Rätoromanen; G. Deplazes, La spina ella spatla, en: Ischi, 80/2001, 171-86; LTS, 667 s.
Gion Deplazes
© HLS: Tuts dretgs d’autur da questa publicaziun electronica èn tar
il Historisches Lexikon der Schweiz, Berna. Per tut ils texts publitgads a moda
electronica valan las medemas reglas sco per la publicaziun stampada.
| |
|
Redacziun LIS, Gerberngasse 39, Chaum postal 322, 3000 Berna 13, tel. +41 31 313 13 30, e-mail:
|
|
Gadmer [Gadner], Christian