Logo und Banner  

Lexicon Istoric Retic (LIR)

Lemma
Chavazzin  

A
 B  C  D  E  F  G  H I  J  K  L  M  N  O  P  Q  R  S  T  U  V  W  X  Y  Z

stampa
lemma precedents GiacomettiGiacometti, Augusto lemma sequent

Giacometti, Alberto
* 10-10-1901 a Borgonovo, † 11-1-1966 a Cuira, ref., da Stampa. Figl da Giovanni. Frar da Bruno e Diego. ∞ 1949 Annette n. Arm. Scolas a Stampa fin il 1915, gimnasi ad Aschera, bandunà il 1919 per sa deditgar exclusivamain a l'art. Studis a l'Ecole des Beaux-Arts ed a l'Ecole des Arts Industriels a Genevra 1919-20. Durant in viadi en l'Italia ha el visità la Biennala a Vaniescha ed è s'entusiasmà per las ovras da Tintoretto e da Giotto e da las ruinas anticas. Furmaziun supplementara a l'Académie de la Grande Chaumière tar il sculptur Antoine Bourdelle a Paris 1922-27. Suenter avair terminà il studi il 1927 è el sa domicilià definitivamain a Paris. El è sa deditgà a la pictura ed a la plastica ed ha dissegnà a medem temp objects d'endrizzament per l'architect d'interiurs Jean-Michel Frank e cliniezs per la creatura da moda Elsa Schiaparelli. Il 1930 ha el exponì cun Hans Arp e Joan Miró tar Pierre Loeb a Paris ed è s'unì a la gruppa dals surrealists. El ha studegià intensivamain la figura umana ed ha realisà numerus bists da purtret. Il 1932 ha G. obtegnì sia emprima exposiziun individuala en la Galerie Pierre Colle ed en il Salon des Surindépendants («Gabbia», 1930-31). L'onn 1934 è el sa distanzià dal surrealissem ed è turnà a la lavur tenor la natira (il frar Diego serviva ad el da model). Il 1939 ha el fatg amicizia cun Jean-Paul Sartre e Simone de Beauvoir. Durant la guerra ha el vivì cun ses frar Diego a Genevra (1942-45). Il 1947 ed il 1950 ha el exponì en la Galerie Pierre Matisse a New York; il 1950 ha el conclus in contract cun la Galerie Maeght a Paris ed ha survegnì incumbensas per sculpturas da bronz. Il 1956 ha la Kunsthalle da Berna organisà l'emprima gronda retrospectiva da sia ovra. Il medem onn ha G. gudagnà il grond premi a la Biennala a Vaniescha, a la quala el ha represchentà la Frantscha, sia patria d'elecziun (gronda figura feminina: «Femme de Venise»). Il 1961 ha el concepì la scenaria per «Warten auf Godot» da Samuel Beckett. Il 1964 han sias ovras obtegnì ina plazza centrala en la Fondation Maeght inaugurada a Saint-Paul-de-Vence, ed il medem onn èn sias picturas e plasticas vegnidas preschentadas a l'Exposiziun naz. a Losanna. Malgrà ina viva opposiziun è vegnida constituida il 1965 la Fundaziun Alberto Giacometti a Turitg, e G. ha obtegnì il Grand prix national des Arts dal stadi franzos ed il dr.h.c. da l'Univ. da Berna.
G. è in dals artists ils pli impurtants da la Svizra dal 20. tschientaner. Cumbain ch'el è stà activ surtut a Paris, visitava el regularmain la Bergiaglia, la val da sia uffanza, cun la cuntrada da la quala el è s'occupà era sco artist. L'object principal da ses art è dentant la represchentaziun da l'uman en sia miseria existenziala. Sia ovra plastica è ina grondiusa producziun da construcziuns surrealisticas en furma monumentala cun ina reducziun simultana dal volum material a favur dal spazi liber.





Archiv:
Fundaziun Alberto G. en la Chasa d’art a Turitg.

Ovras:
Ecrits, 1990.

Litteratura:
BLSK, 394 s.; Alberto G., catalog d’expos. Turitg e New York, 2001; L. Dosch, Kunst und Landschaft in Graubünden, 2001, 287-300; Alberto G., edì da V. Todisco, 2002; M. Peppiatt, Alberto G., 2002; L. Wilson, Alberto G., 2003; Alberto G., Bergell - Rom - Paris: ein Leben im Widerhall der Berge, 2006; D. Rütimann, Alberto G.: écrire la déchirure, 2006; G., catalog d'expos. Fondation Beyeler, Basilea, 2009.

Elisabeth Ellenberger

lemma precedents GiacomettiGiacometti, Augusto lemma sequent

pagina precedenta


© HLS: Tuts dretgs d’autur da questa publicaziun electronica èn tar
il Historisches Lexikon der Schweiz, Berna. Per tut ils texts publitgads a moda
electronica valan las medemas reglas sco per la publicaziun stampada.





Redacziun LIS, Gerberngasse 39, Chaum postal 322, 3000 Berna 13, tel. +41 31 313 13 30, e-mail: