Logo und Banner  

Lexicon Istoric Retic (LIR)

Lemma
Chavazzin  

A
 B  C  D  E  F  G  H I  J  K  L  M  N  O  P  Q  R  S  T  U  V  W  X  Y  Z

stampa
lemma precedents Florin, Paul deFlorin [Deflorin], Gallus lemma sequent

Florin [Deflorin], de
Schlatta grischuna residenta en div. vischnancas da la Val dal Rain Anteriur (Tujetsch, Mustér, Rueun), da la Val dal Rain da Cuira (Cuira, Maladers, Zezras, Eigias), dal Partenz (Claustra) e da Tavau, dal Grischun Central (Vaz, Donat) e da la Val Müstair (Sta. Maria). Cumbain da derivanza diversa, sa deducescha il num F. dal medem prenum. Menziun spez. merita la fam. da purs che deriva prob. da la curt Flurin a Rueras. Johannes, scrivant e mastral a Mustér, è daventà  landrehter da la LG (1555-56 e 1564-65) ed è vegnì delegà il 1562 da l'avat da Mustér al Concil da Trent. Ses dus figls Paul e Johannes han giudì gronda stima. Paul ha occupà tut ils uffizis principals da la LG, entant che Johannes, daventà burgais da Cuira, ha fatg carriera sco emissari franz. en il Grischun. Omadus frars han occupà in suenter l'auter l'uffizi dal landfoct dal Signuradi. Johannes e ses figl Johann Simeon han laschà eriger intginas chasas signurilas a Cuira (Freieck, Türligarten) ed a Rueun (Casa Deflorin Sura).
La culminaziun da sia influenza politica ha la fam. F. cuntanschì en il 17. tschientaner. Cun ils dus exponents menziunads sura, Paul e Johann Simeon, cun Christian, Johann Simeon, Joachim († 1706) e Christian han occupà ils de F. tr. il 1591 ed il 1707 31 giadas l'uffizi dal landrehter, il pli savens sin proposta dal signur de Razén. Ils F. èn era stads repetidamain delegads da las Trais Lias ed in tozzel giadas podestats en Vuclina. Sco guvernaturs da la Vuclina èn stads activs Paul il 1585-87, Johann Simeon il 1641-43 e ses figl cun il medem num il 1683-85. Christian ha procurà per l'impurtanta collecziun da doc. dals F. che sa chatta actualmain en l'Archiv dal stadi dal Grischun. Cun Caspar († 1716) è mort il davos exponent masculin da la lingia da Rueun. Gallus, descendent d'ina lingia da Tujetsch, è daventà prinzi-avat da Mustér.


Litteratura:
Färber, Herrenstand; Maissen, Landrichter, 46-50; Collenberg, Amtsleute.

Ursus Brunold

lemma precedents Florin, Paul deFlorin [Deflorin], Gallus lemma sequent

pagina precedenta


© HLS: Tuts dretgs d’autur da questa publicaziun electronica èn tar
il Historisches Lexikon der Schweiz, Berna. Per tut ils texts publitgads a moda
electronica valan las medemas reglas sco per la publicaziun stampada.





Redaktion HLS, Hirschengraben 11, Postfach, 3001 Bern, tel. +41 31 313 13 30, E-mail: :