e-LIR / Lexicon Assistenza e-LIR Contact Publicaziun Sponsurs	Lexicon Istoric Retic (LIR) Lemma Rumantsch Deutsch Italiano Chavazzin   A  B  C  D  E  F  G  H I  J  K  L  M  N  O  P  Q  R  S  T  U  V  W  X  Y  Z  Furlan Fürstenburg  Furna Vischnanca polit., cirq. Gianatsch, distr. Partenz/Tavau (avant il 2001 Landquart Sut). Abitadi sparpaglià situà a 1351 m sin la spunda ost dal Furner Berg (1824 m). F. cumpiglia las culegnas dad Usserberg, Mittelberg e Hinterberg sco era l'aclaun da Furnerberg (betg abità l'entir onn) cun Danusa, menz. sco abitadi gualser il 1394. 1479 Furnen. 1850 216 abit.; 1900 209; 1950 222; 2000 204. En il temp medieval tardiv possedevan l'uvestgieu da Cuira ed ils conts von Toggenburg terren a F. En il 14. e 15. tsch. èn sa domiciliads qua Gualsers sin bains sparpagliads ed han germanisà la vischnanca. F. ha appartegnì a la dretgira auta da Castels, pli tard a quella da Castels-Gianatsch. Ecclesiasticamain ha la vischnanca fatg part, avant e suenter la refurmaziun introducida il 1526, da Gianatsch. Dapi il 1672 è F. ina plaiv autonoma. La baselgia da S. Gieri è vegnida erigida enturn il 1490, la tur il 1690. Il 1879 è vegnida construida la via da Pragg a F., ed il 1936 è la vischnanca vegnida colliada cun la rait d'autos postals. F. è vegnì electrifitgà pir il 1968 (sco davosa vischnanca grischuna). La vischnanca ha ina scola primara e dispona d'ina modesta infrastructura turistica. Litteratura: Gem. GR, nr 55, 1984; Gem. GR, 2003, 124 s.; U. Gadient, Cherza, Pfunzla, Gasliecht, 2005. Otto Clavuot  Furlan Fürstenburg  © HLS: Tuts dretgs d’autur da questa publicaziun electronica èn tar il Historisches Lexikon der Schweiz, Berna. Per tut ils texts publitgads a moda electronica valan las medemas reglas sco per la publicaziun stampada. Redacziun LIS, Gerberngasse 39, Chaum postal 322, 3000 Berna 13, tel. +41 31 313 13 30, e-mail: