Juvalt, Ulrich von

Juvalta, Fortunat von

Situà sin in sparun grippus stretg e spundiv, era il chastè da Hochjuvalt (savens numnà faussamain Niederjuvalt) dividì en duas parts: l'areal da defensiun inferiur cun la fortezza externa, situada a la riva dal Rain Posteriur, e quel superiur cun l'implant principal. Da quest ultim existan restanzas da la tur principala da tschintg plauns, d'in edifizi annex, dals foss e paucs fastizs dal mir da tschinta. La zona d'entrada è per gronda part vegnida destruida e la veglia via d'access è cuverta da glera. Da la fortezza externa è sa mantegnida sulettamain ina part dal mir, donnegià durant la construcziun da la via. Hochjuvalt è vegnì erigì prob. en il 12. tsch. sco sedia dals signurs von J. En possess da l'uvestg da Cuira il 1352, è il chastè vegnì impegnà pliras giadas en il decurs dal 15. tschientaner. Donnegià probablamain il 1451 en la Faida da Schons, è el vegnì bandunà enturn il 1500 ed è menziunà gia enturn il 1550 sco ruina.

Situà sin in sparun grippus a l'ost da Giuvaulta, a l'entrada en la Tumleastga, era il chastè dad Innerjuvalt (savens numnà faussamain Oberjuvalt u Hochjuvault) dividì en ina part superiura ed ina inferiura. En l'areal superiur avevan ins erigì l'emprim (ca. 1250) ina residenza signurila a dus plauns, a la quala èn vegnids agiuntads pli tard la tur principala e l'edifizi d'abitar meridiunal. Ina cisterna ed in furn eran circumdads d'in mir da tschinta extern. En l'areal inferiur sa chattavan ulteriurs edifizis d'abitar e d'economia. Retschertgas archeologicas (1980, 1982, 1990) han furnì indicaziuns impurtantas davart l'istorgia da las construcziuns ed han purtà a la glisch pitschens chats da gronda valur. Erigì dals signurs von J. probablamain enturn il 1250, è Innerjuvalt vegnì bandunà pauc suenter il 1500 ed era il 1550 gia en ruina.

Juvalt, Ulrich von

Juvalta, Fortunat von